1. Eparadiso y’obunya-kirimu niki, kandi litolere itwayisogha kundu erikolaki?

 MUNABWIRE, oko kihugho kune eparadiso y’ekisosekanio eyoswiremo abandu abakakola emyatsi mingyi eyuwene. Yoswiremo amamilioni w’abandu abanemutsemera obuholo bw’ekwenene. Abali omo paradiso eyo babiriyisogha eritendilua muyo n’ahake. Kandi banzire abandu bangyi nabo ibasa omo mibere y’embaghane eyo. Emibere eyo niki? Ye paradiso y’obunya-kirimu! a

2. Ekikaswekaya oko paradiso y’obunya-kirimu niki?

² Omo nzira y’eriswekya, Yehova abirikola omwanya w’ekisosekanio aho abandu biwe bali omo bughuma n’obuholo, nomo banikere omo kihugho kibi kya Sitani ekyoswiremo eriponana n’emyatsi mingyi eyangahutalya. (1 Yoh. 5:19; Erib. 12:12) OMungu anemulangira ngoko ekihugho kibi kino kinemwaghalia abandu, aliwe akawatikaya abaghombe biwe eribya buholo batoke erilola embere erimukolera omo butseme. Ekinywa kiwe kikasosekanaya eparadiso y’obunya-kirimu ‘ng’ah’erisagira’ kandi ‘ng’eririma elyahirawa mw’amagetsi.’ (Isa. 4:6; 58:11) Kundi Yehova akatsumulabo, abali omo paradiso eyo bane n’obutseme n’obuholo omo biro by’enduli bino ebikalire.​—Isa. 54:14; 2 Tim. 3:1.

3. Obuminyereri obuli omo lsaya esura ye 65 mubwabererera buti kera?

³ Yehova mwakolesya omuminyereri Isaya erikangania ngoko amaisa akendisyabya oko bandu abakendisyabya omo paradiso y’ekisosekanio. Omwatsi oyo akanibweko buli omo Isaya esura ye 65, eyabererera ery’erimbere omo 537 E.M.W. Oko mughulu oyo, Abayahudi abayisubako mubalusibwa omo bunyewa e Babiloni neryo bamasubula omo kihugho kyabo.  Yehova mwatsumula abandu biwe n’eribawatikya eritasyahimba omuyi we Yerusalema owabya inyabiritsandibwa atoke eritasyaghamba. Kandi mwawatikyabo eritasyasubya ehekalu ye Yerusalema eribya ahakulu ah’erikolera eriramya ry’erire omo Israeli.​—Isa. 51:11; Zek. 8:3.

4. Erisako rye Isaya esura ye 65 linemubererera liti munabwire?

⁴ Eribererera ry’akabiri ry’obuminyereri bwa Isaya muryatsuka oko 1919 M.W. abaramya ba Yehova b’oko mughulu wetu babere babilua omo bunyewa bwa Babiloni Mukulu. Enyuma w’aho eparadiso y’obunya-kirimu muyatsuka erilangirika omo kihugho. Abatuliri b’Obwami ab’omuhwa mubatsuka eryusula omo syondeko n’erikangania emibere y’Ekikristo. Abalume n’abakali ababya kera n’emibere mibi ng’esyonyama mubabya “n’emibere mihya-mihya eyabumbawa n’oMungu erikwamana n’erisonda riwe.” (Efe. 4:24) Oko kwenene emiyisa mingyi y’oko miyisa eyikanibweko omo Isaya, yasyabererera ndeke-ndeke omo biro ebikasa ni bugha ambu omo kihugho kihya-kihya. Nomo bine bitya, lino tunemutsemera emiyisa mingyi. Muleke tulangire emiyisa eyo tukabana omo paradiso y’obunya-kirimu kandi busanaki siritolere erilua muyo.

ABALI OMO PARADISO Y’OBUNYA-KIRIMU BAKABANA EMIYISA YAHI?

5. Ngoko kyabughawa omo Isaya 65:13, tunemutsemera emiyisa yahi omo paradiso y’obunya-kirimu?

⁵ Eryughuta n’eriluhukibwa. Obuminyereri bwa Isaya bukakanganaya eritendisosana rinene eriri omo kati-kati k’engebe ey’abali omo paradiso y’obunya-kirimu n’eyabatemo. (Soma Isaya 65:13.) Yehova akaha abaghombe biwe ebyosi ebyo balaghireko batoke erisighala hakuhi naye. Tuwite ekirimu kibuyirire, eBiblia n’ebitsapo bingyi ebiseghemere eBiblia tutoke ‘erilya, . . . eripulya, . . . n’eritsema.’ (Tasyalebya na Eribisulirwa 22:17.) Aliwe abate omo paradiso y’obunya-kirimu bali omo yindi mibere. Ibo ‘bakwire enzala . . . , bakwire enyota . . . , kandi banemuhemuka.’ Sibasi oMungu.​—Amos. 8:11.

6. Ngoko kiri omo Yoeli 2:21-24 ni bihembo byahi ebyo Yehova akatuha, netu twangabana tuti endundi mubyo?

⁶ Omo buminyereri bwiwe, Yoeli mwakolesya emyatsi y’omughaso ng’engano, ebinyu, n’amaghuta w’omuzeituni erikangania ngoko Yehova akaha butsira buhemu abandu biwe ebyo balaghireko erihirako n’akalyo k’obunya-kirimu. (Yoe. 2:21-24) Akakola atya erilabira eBiblia, ebitsapo ebiseghemere eBiblia, esite yetu ye Enternete, emihindano yetu ey’endeko n’emihindano yetu minene-minene. Obuli kiro twanganabana endundi omo myatsi eyo, neryo itwaghuta n’eriluhukibwa.

7. Niki kyo kikatuha ‘obutseme bʼomutima’? (Isaya 65:14)

⁷ Eribya n’obutseme n’eritsemera ebyo tuli nabyo. Abandu b’oMungu ‘bakuta obogo’ b’obutseme erikangania erisima lyabo linene oko Yehova. (Soma Isaya 65:14.) Amakangirirya awakawataya obwikirirya bwetu n’esyondaghane esikakiranaya esiri omo Kinywa ky’oMungu n’amaha wetu awaseghemere embanulo ya Kristo bikaleka itwabya ’n’obutseme bʼomutima.’ Eribya tukakania oko myatsi eyo haghuma n’abaghala n’abali betu ab’obunya-kirimu kikatsemesaya kwenene-kwenene!​—Esy. 34:8; 133:1-3.

8. Ni myatsi ibiri yahi y’omughaso munene eyiri omo paradiso y’obunya-kirimu?

⁸ Olwanzo n’obughuma obuli omo kati-kati k’abandu ba Yehova ni myatsi ibiri y’omughaso munene ey’omo paradiso y’obunya-kirimu. ‘Olwanzo olukamatanaya’ olo, lukaleka itwalangira ngoko engebe yikendisyabya omo kihugho kihya-kihya, eyo abaghombe ba Yehova bakendisyatsemera olwanzo lunene n’obughuma nibya kulenga ngoko bali munabwire. (Kol. 3:14) Mwali wetu mughuma mwakangania  ngoko ayowa omughulu ahindana ery’erimbere haghuma n’abangombe ba Yehova. Akabugha ati: “Nabya isinili natayira obutseme n’ahake, nibya n’omo kihanda kyaghe. Ngendo yaghe y’erimbere y’erilangira abandu bakakanganania olwanzo lw’ekwenene, m’omughulu nahindana n’Abimiri ba Yehova.” Obuli mundu oywanzire eribya n’obutseme bw’ekwenene n’erisima atolere eryasa omo paradiso y’obunya-kirimu. Nomo abandu b’omo kihugho kino bangabya n’amalengekania wahi oko baghombe ba Yehova, bawite erina eryuwene embere sya Yehova n’embere sy’abandu bosi abakamuramaya.​—Isa. 65:15.

9. Erisako rye Isaya 65:16, 17 rikabughaki oko bindu ebikaleka itwaghalwa n’erihangya-hangya?

⁹ Eritulera n’eritendihangya-hangya. Erisako rye Isaya 65:14 rikabugha riti abakasombola erisighala eyihya w’eparadiso y’obunya-kirimu “basyalira omo bulige obʼomutima, kandi basyayilakira busana nʼekirimu kibunikire.” Aliwe tubughe tutiki oko bindu byosi ebikaghalaya abandu b’oMungu n’erileka ibahangya-hangya? Oko kwenene, ebindu ebyo “byasyabibiriranwa, n’eribisama oko meso [w’oMungu].” (Soma Isaya 65:16, 17.) Yehova asyabughaho amaligho wosi awakatwaghalaya, nibya n’oko ndulya sitwendisyibuka ngoko abya akatwaghalya.

10. Busanaki ukalangira ini lusunzo lunene eribya kughuma n’abagha n’abali betu b’obunya-kirimu? (Ulebaye n’epitsa.)

¹⁰ Nibya na munabwire, tukayowa itwabiritulera omughulu tuli oko mihindano y’Ekikristo, eyo tukayowa buholo n’eribirirwa ebikaleka itwahangya-hangya ebiswire omo kihugho kibi kino. Tukawatikaya abaghala n’abali betu eritulera omughulu tukakanganaya olwanzo, obutseme, obuholo, omutima owunene, n’obolo. Emibere eyo nayo ni y’oko mibere y’ekirimu ky’oMungu. (Gal. 5:22, 23) Tuwite olusunzo lunene eribya omo ndondeka y’oMungu! Abakasighala omo paradiso y’obunya-kirimu basyayilangirira omughulu oMungu asyaberererya endaghane yiwe ey’erikola “olubula luhya-luhya n’ekihugho kihya-kihya.”

11. Ngoko kiri omo Isaya 65:18, 19, eparadiso y’obunya-kirimu eyo Yehova akakola yikaleka itwayowa tuti?

¹¹ Erisima n’eriyisyandira. Kandi, Isaya mwakangania busanaki litolere ‘itwatsema n’eritsanga’ omo paradiso y’obunya-kirimu. Eparadiso ey’ekisosekanio eyo yahirawaho na Yehova. (Soma Isaya 65:18, 19.) Sikiriswekaya erilangira ngoko anemutukolesya eriwatikya abandu erilua omo bitunga mbiriri-mbiriri by’ekihugho ebitebakangiriraya ekwenene oko Mungu n’eriwatikyabo eryasa omo paradiso y’ekisosekanio eyighambire kutsibu! Tukayisyandira busana n’emiyisa eyotukabana kundi  tuli omo kwenene, n’ekyo kikaleka itwabya n’omuhwa ow’eribwira abandi oko miyisa eyo.​—Yer. 31:12.

12. Esyondaghane esikabanika omo Isaya 65:20-24 sikaleka iwayowa ghuti, kandi busanaki?

¹² Kandi tukasima n’eritsema busana n’amaha agho itwe bakalani b’omo paradiso y’obunya-kirimu tuwite. Terilengekania oko myatsi yosi eyo tukendisyalangira n’erikola omo kihugho kihya-kihya ky’oMungu! EBiblia ikatulagha yiti: “Sihendisyaswabya lumekeke lwʼebiro bike, kutse musyakulu oyute waberererya ebiro biwe.” ‘Twasyahimba amanyumba nʼeriikala mugo [kandi] twasyahera amalima wʼebinyu nʼerirya ebiguma byago.’ ‘Sitwendisyakolera busa’ . . . ‘kusangwa itwabiribya bandu abo [Yehova] abiritsumula.’ Akatulagha engebe eyirimo obuholo, eyikatsemesaya, kandi eyiri n’ekusudi. “Omugulu bakinabuga,” kandi akendisyughutya “obwaga bwʼabosi.”​—Isa. 65:20-24; Esy. 145:16.

13. Isaya 65:25 ikakanaya yiti oko syombinduka esyo abandu bakakola omo syongebe syabo omughulu bakatsuka erikolera Yehova?

¹³ Eribya buholo kandi abatanzire omwagha. Omo buwatikya obw’ekirimu ky’oMungu, abandu bangyi ababya kera n’emibere eyiri ng’ey’esyonyama babirikola esyombinduka sinene omo ngebe syabo. (Soma Isaya 65:25.) Babiriyikasa kutsibu erilekana n’emibere yabo mibi. (Rom. 12:2; Efe. 4:22-24) Nomo bine bitya, abandu b’oMungu sibalibahika-hikana. Busana n’ekyo twanganatasyakola amakosa. Aliwe Yehova anemuhindania haghuma “abandu b’emihanda yosi” abamwanzire kandi abanzene, n’ekyo kikaleka ibabya omo buholo bw’ekwenene n’omo bughuma. (Tito 2:11) Ekyo ni kitiko-tiko eky’oMungu omutoki w’ebyosi musa yuwangakola!

14. Isaya 65:25 muyabererera yiti oko mughala wetu mughuma?

¹⁴ Kwenene-kwenene, abandu banganatoka eribindula emibere yabo? Eky’erileberyako kya kino. Omulwana mughuma oywatsuka eribohwa inyawite emyaka 20, ini mutsibu kandi inyawite emibere mingyi mibi. Inyabiribohwa busana n’eriba emitoka, eritula amanyuma n’ebindi bitsibu. Isyalisagha omundu. Abere abyowa amakangirirya w’eBiblia ngendo yiwe y’erimbere n’eritsuka erihindana n’Abimiri ba Yehova, mwalangira inyamabibana ekusudi y’engebe, ni bugha ambu eriramirya Yehova omo paradiso y’obunya-kirimu. Enyuma w’eribatisibwa inyakalengekanaya kangyi-kangyi ngoko Isaya 65:25 muyabererera okw’iye. Iye, oywabya akalire ng’esimba, abiribya molo ng’embuli.

15. Busanaki twanzire eribirikira abandi nabo base omo paradiso y’obunya-kirimu, kandi tukakola ekyo kyo tuti?

¹⁵ Isaya 65:13 ikatsuka yitya: “Omukama [Yehova] ati.” Omulondo we 25 akabughirira omo binywa bino, “[Yehova] atya.” Biro byosi, ebyo Yehova abirilagha bikabererera. (Isa. 55:10, 11) Eparadiso y’obunya-kirimu yinalangirikire ndeke-ndeke munabwire. Yehova abirihiraho ekihanda kinene eky’abaramya biwe ekitekyangabanika ehandi. Kundi tuli b’oko kihanda ekyo, tuwite obuholo bunene, kandi tukayowa mbolere omo kihugho kino ekyuswiremo obutsumbu-tsumbu. (Esy. 72:7) Busana n’ebyo, twanzire eriwatikya abandu bangyi ngoko twangatoka eryasa omo kihanda kyetu kinene eky’Abakristo. Tukakola ekyo omwihira omubiiri w’eriyira abigha w’embere omo ngebe yetu.​—Mat. 28:19, 20.

NGOKO TWANGAWATIKYA ABANDI ERYASA OMO PARADISO Y’OBUNYA-KIRIMU

16. Ebyangawatikya abandu eryasa omo parasido y’obunya-kirimu ni byahi?

¹⁶ Obuli mughuma w’okw’itwe anawite eby’erikola atoke erihira omo bandi mw’engumbu ey’eryasa omo parasido yetu y’obunya-kirimu. Litolere itwigha Yehova imwitwatoka  erikola ekyo kyo ndeke. Iye syalikasa abandu eryasa omo ndondeka yiwe. Omo mwanya w’erikola atya, omo bolo ‘akabaleta’ okw’iye. (Yoh. 6:44; Yer. 31:3) Abandu b’emitima myolo bakabya babigha olwanzo lwa Yehova n’emibere yiwe eyuwene, bakalw’ibasa okw’iye bweghu-bweghu. Emibere n’emighendere eyuwene yanganawatikya yiti erihira omo bandu mw’engumbu y’eryasa omo paradiso y’obunya-kirimu?

17. Twangahira tuti omo bandi mw’engumbu y’eryasa omo paradiso y’obunya-kirimu?

¹⁷ Enzira nguma eyangaleka abandi ibabya n’engumbu y’eryasa omo paradiso y’obunya-kirimu ry’eribya tukabakolera ebibuya n’eribakangania olwanzo. Twanzire abakahindana oko mihindano yetu y’Ekikristo engendo yabo y’erimbere ibayowa ngoko abahindana n’Abakristo be Korinto ba kera bayowa. Mubabugha bati: “OMungu ali omo kati-kati kenyu.” (1 Kor. 14:24, 25; Zek. 8:23) Tutolere itwakwama erihano erikabugha liti “mubye omo buholo.”​—1 Tes. 5:13.

18. Niki kyo kyanganaleka abandi ibanza eryasa omo ndondeka yetu?

¹⁸ Litolere itwabya tukalangira abaghala n’abali betu ngoko Yehova akalangirabo. Tukakola tutya omwilebya emibere yabo mibuya omo mwanya w’erihanda omunwe oko makosa wabo, awatendisyabyaho kera na kera. ‘Twamabibya tukakolerana ndeke, erikwira abandi b’obulighe, n’erighanyirana omwanza’ itwanganabughaho omo lwanzo eritendihulikirirana lyosi omo kati-kati ketu. (Efe. 4:32) Twamabikola ebyo, abandu abanzire erikolerwa omo lwanzo, ibakendyanza eryasa omo paradiso yetu y’obunya-kirimu. b

 USIGHALE OMO PARADISO Y’OBUNYA-KIRIMU

19. (a) Ngoko kikanganibwe omo kasanduku “ Mubaghenda kandi bamasubula,” abandu balebe mubabughaki babisuba omo paradiso y’obunya-kirimu? (b) Tuyisoghire kundu erikolaki? (Ulebaye n’epitsa.)

¹⁹ Tukasima kutsibu busana n’eparadiso yetu y’obunya-kirimu! Yinemulola embere eribya nyibuya kulenga kera, kandi yinemusulamo abaramya ba Yehova. Twanzire erilola embere erikangania erisima lyetu busana n’eparadiso y’obunya-kirimu eyo Yehova abiritukolera. Obuli mundu oywanzire eriluhukibwa, eritsemera ebyo awite, eritulera, n’eribya buholo atolere eryasa omo paradiso y’obunya-kirimu n’eritendilua muyo n’ahake! Aliwe, ngambe itwayiteya kutsibu kundi Sitani anemuyikandanga atoke eritulusya muyo. (1 Pet. 5:8; Eri. 12:9) Ngambe isitwamulighira. Kwesi tubye tukayikasa eriteya obubuya, obubuyirire n’obuholo bw’eparadiso yetu y’obunya-kirimu.