OMWATSI W’ERIGHA 22
OLWIMBO 127 Nitolere inabya omundu oyuly’ati?
Ebyo wangakola obwira bwenyu bw’eritahania butoke erilaba ndeke
“Omundu w’emwisi . . . [ni wo] bughuli bunene.”—1 PET. 3:4.
ENZUMWA NGULU:
Ebyo omulume n’omukali abali omo bwira bw’eritahania kutse obuchumba bangakola butoke erilaba ndeke, kandi ngoko n’abandi omo ndeko banganawatikyabo.
1-2. Abandu balebe bakayowa bati omughulu bali omo bwira bw’eritahania?
OMUGHULU omulume n’omukali bali omo bwira bw’eritahania kutse obuchumba, oyo anganabya omughulu w’obutseme bunene. Wamabya ighuli omo bwira bw’eritahania lino, ahate eritika-tika wanzire eritsemera omughulu oyo. Emyatsi ko yiri yitya n’oko bandu banene abali omo bwira obw’eritahania. Mwali wetu Tsion, a owe Etiopia, akabugha ati: “Omughulu ingye n’iba waghe twabya omo bwira bw’eritahania, oyo wo wabya mughulu w’obutseme bunene omo ngebe yaghe. Itukakaniranaya oko myatsi y’omughaso kandi itukaseka. Munatsema eribana omundu oyunianzire naghe inimwanzire.”
2 Aliwe, mughala wetu Alessi owe Hollande akabugha ati: “Munatsema eriminya ndeke omukali waghe omughulu twabya omo bwira bw’eritahania, aliwe, obwira bwetu bwanabyamo n’amaligho.” Omo mwatsi ono, tukendikania oko maligho malebe awanganahuluka n’oko syokanuni silebe sye Biblia esyangawatikya omulume n’omukali abali omo bwira bw’eritahania batoke eriyisogha ndeke. Kandi tukendilangira ngoko n’abandi omo ndeko bangawatikyabo.
EKUSUDI Y’OBWIRA BW’ERITAHANIA
3. Ekusudi y’obwira bw’eritahania niki? (Emisyo 20:25)
3 Nomo bwira bw’eritahania bwanganatsemesya, aliwe kandi ni kika ky’omughaso ekikakolaya oko ndwa. Ekiro ky’endwa, abalunga bakalaghana embere sya Yehova bati bakendianzana n’erisikania omughulu wosi ogho bakendisyabya ibaneho. Embere sy’eriyilagha lyosi-lyosi, litolere itwalengekania kutsibu oko myatsi. (Soma Emisyo 20:25.) Oko kwenene, ko biri bitya n’okw’ilaghana ly’endwa. Obwira bw’eritahania bukaleka omulume n’omukali ibaminyana ndeke n’eriyisogha ndeke. Ndambi silebe, obwira obo bwanganakolyabo oko ndwa; kutse kandi bwanganahwa. Obwira bw’eritahania bwamabihwa, ekyo si bugha ambu mubakataluka. Omo mwanya w’ekyo bukabya ibwabirihikira ekusudi yabo, ni bugha ambu, ibwabiriwatikyabo eriyisogha ndeke.
4. Busanaki litolere itwabya n’amalengekania awuwene oko bwira bw’eritahania?
4 Busanaki ni ky’omughaso eribya n’amalengekania awuwene oko bwira obw’eritahania? Abasimbi abali n’amalengekania awuwene, sibangatsukisya obwira obw’eritahania isibali n’ekusudi y’erilunga. Aliwe, si b’abasimbi basa bo batolere eribya n’amalengekania awuwene oko bwira obw’eritahania. Itwe bosi litolere itwabya n’amalengekania awuwene oko bwira obw’eritahania. Ng’eky’erileberyako, abandu balebe bakalengekanaya bati omughulu omulume n’omukali bane omo bwira obw’eritahania litolere ibwabakolya oko ndwa. Ekyo kikaleka Abakristo basimbi ibayowa bati? Mwali wetu musimbi ye Melissa, owe Amerika, akabugha ati: “Abandu balebe abasi ngoko muli omo bwira bw’erisyatahania bakabahatikana bati ko munalunge. Ekyo kikanaleka abandi ibakwa obuba obw’eritwa obwira bwabo n’omo babirilangira ngoko sibatolerene. N’abandi basimbi bakalububaha eritsukisya obwira bw’eritahania. Akahatikano ako kakaleka ibahangya-hangya kutsibu.”
MUYIKASE ERIMINYANA NDEKE
5-6. Ni myatsi yahi eyo omulume n’omukali abali omo bwira bw’eritahania batolere ibaminyanako? (1 Petro 3:4)
5 Mwamabya imune omo bwira bw’eritahania, niki kyo kyangabawatikya eriyisogha nga mukendilunga kutse iyehe? Ry’eriyikasa eriminyana ndeke. Alinga muwaminya emyatsi milebe oko mundu embere utsukisaye naye obwira bw’eritahania. Aliwe, lino uwite akanya ak’eriminya “omundu w’emwisi.” (Soma 1 Petro 3:4.) Ekyo kihiriremo eriminya bingyi oko bunya-kirimu bwiwe, emibere yiwe, kandi ngoko akalengekanaya. Ebiro bikalaba, wanganatoka erisubirya oko mabulyo awali ng’ano: ‘Omundu oyu, ananitolere kwe?’ (Misyo 31:26, 27, 30; Efe. 5:33; 1 Tim. 5:8) ‘Tunemwendisyatoka erilola embere eryanzana n’eritsomanana? Tunemwendisyabya tukahulikirirana?’ b (Rom. 3:23) Mukalola embere eriminyana ndeke, wibuke kino: Ekikulu ekikakanganaya ngoko abandu babiri banamatolera erikala haghuma si ry’erisosana oko mibere, aliwe b’obutoki b’obuli mughuma w’okw’ibo eribeghera emibere y’oghundi eyitasosire eyiwe.
6 Ni yindi myatsi yahi eyo litolere imwaminyanako omughulu muli omo bwira bw’eritahania? Embere sy’eryanzana kutsibu, litolere imwakania oko myatsi y’omughaso, ng’ebyo ghundi akalandamirira. Aliwe, tubughe tutiki oko myatsi eyilebirye omundu iyuwene, ng’amakoni, emyatsi y’esyofranga, kutse emyatsi eyamuhikira embere eyikaleka inyalengekania kutse erikola emyatsi omo nzira nyilebe? Eky’eriminya, emyatsi yosi si y’erikaniako mukanatsuka obwira bw’eritahania. (Tasyalebya na Yohana 16:12.) Wamabilengekania uti endambi ey’erikania oko myatsi milebe siyiriyahika, ubwire omwira waghu. Aliwe, ebiro bikalaba, omwira waghu anganalagha okw’iminya emyatsi eyo, atoke eriyisogha ndeke. Aliwe kandi hane eyindi myatsi eyo litolere iwabugha ekwenene yosi.
7. Omulume n’omukali abali omo bwira bw’eritahania bangaminyana ndeke bati? (Ulebaye n’akasanduku “ Obwira bw’eritahania bw’ehali.”) (Ulebaye n’esyopitsa.)
7 Wangatoka uti eriminya ndeke oghundi mundu? Enzira nguma eyuwene ry’erikanirania omo kwenene butsir’ibisana emyatsi, eribulya oghundi amabulyo n’erihulikirira ndeke akabugha. (Misyo 20:5; Yak. 1:19) Kwamuhwa, mwanganasombola erikola emyatsi milebe haghuma, ng’erirya akalyo kughuma, erilenderera ah’akabya abandu bangyi kughuma, n’eritulira haghuma. Emyatsi eyo yanganabawatikya erikanirania ndeke. Kandi wanganaminya emyatsi milebe oko ghundi omughulu mukalabaya endambi haghuma n’abira benyu na b’omo kihanda kyenyu. Kandi wanganateghekania emyatsi eyanganakuwatikya erilangira ngoko oghundi akayiwata omo mibere mbiriri-mbiriri, n’ahali abandu mbiriri-mbiriri. Langira ebyo Aschwin, owe Hollande akayikasa erikola. Akakania oko bwira bwabo bw’eritahania haghuma na Alicia, Aschwin akabugha ati: “Itukasondekanaya emyatsi eyangatuwatikya eriminyana ndeke. Kangyi-kangyi iyikabya myatsi mike-mike, ng’eritulira haghuma, erihuka akalyo kughuma kutse erikola emibiiri y’eka yo kughuma. Tukakola emyatsi eyiri ng’eyo, obuli mundu inyakayilangirira emibere eyuwene y’oghundi n’obulema bwiwe.”
Abali omo bwira bw’eritahania bamabya bakakola emyatsi yo kughuma eyangaleka ibabana akatambi k’eribya bakakanirania, ekyo kyanganabawatikya eriminyana ndeke (Ulebaye enungu 7-8)
8. Omulume n’omukali abali omo bwira bw’eritahania bakabana endundi yahi omw’ibya bakigha kughuma?
8 Kandi mwanganaminyana omw’ibya mukigha emyatsi y’obunya-kirimu yo kughuma. Mwamabilunga imukendibya mukakola eriramya ly’eka mutoke erihira oMungu embere omo ndwa yenyu. (Omug. 4:12) Neryo lino, imwanganahiraho akatambi ak’eribya mukigha kughuma. Nomo bine bitya, omughulu abandu bali omo bwira bw’eritahania, bakabya isibalibabya kihanda; neryo omulume isyalyabya mutwe w’omukali. Aliwe, eribeghera eribya mukigha haghuma, kyanganabawatikya eriminya obunya-kirimu b’obuli mundu. Max na Laysa abatahenie abe Amerika mubabana eyindi ndundi. Max akabugha ati: “Oko nzuko y’obwira bwetu mutwatsuka erigha oko bitsapo ebikakanaya oko bwira bw’eritahania, endwa, n’amaisa w’obunyumba. Ebitsapo ebyo, mubyatuwatikya erikanirania ndeke oko myatsi mingyi y’omughaso eyo twabya isitwangatoka erikaniako bweghu-bweghu.”
EYINDI MYATSI Y’ERILENGEKANIAKO
9. Ni myatsi yahi eyo omulume n’omukali abali omo bwira bw’eritahania batolere ibalengekaniako omughulu bakasonda eriyisogha ab’eribwira oko bwira bwabo?
9 Ni bahi bo mutolere eribwira oko bwira bwenyu bw’eritahania? N’inywe mutolere eriyisogha. Obwira bwenyu bukanatsuka, mwanganayisogha eribwira abandu bake basa. (Misyo 17:27) Omwikola mutya, mwanganayihighula oko kahatikano n’awandi mabulyo awalebirye obwira bwenyu. Aliwe, mwamatendibwira omundu wosi-wosi, imwanganatsuka eribya mukayibisa-bisa mukasagha muti abandu bakendiminya ngoko muli bira. Ekyo kyanganabakolya ahatuwene. Neryo kwesi, ni ky’amenge eribwira abandu balebe abangabaha amahano awuwene n’eribawatikya omo nzira nyilebe. (Misyo 15:22) Ng’eky’erileberyako, mwanganabwira abandu balebe b’omo kihanda kyenyu, abira benyu abakulire kutse abasyakulu b’endeko.
10. Omulume n’omukali bangakolaki emighendere yabo yitoke eritsemesya Yehova omo bwira bwabo? (Emisyo 22:3)
10 Mwanganalola muti embere erisikya obwira bwenyu? Olwanzo lwenyu lukakula, mukendiyowa imwabiritsemerana kutsibu. Ni byahi ebyangabawatikya erilola embere eribya n’emighendere ey’erire? (1 Kor. 6:18) Isimwabya mukakanirania emyatsi eyangababukyamo esyongumbu nyibi, isimwabya mukabya haghuma inywibene, kandi isimwabya mukanywa obwabu bo kutsibu. (Efe. 5:3) Emyatsi eyo yanganakanyirirya esyongumbu nyibi neryo ikyabakalako erikola ekyuwene. Ni ky’amenge eribya mukakanirania kangyi-kangyi oko ebyo mwangakola mutoke erilola embere erisikania n’erisikya esyokanuni sya Yehova. (Soma Emisyo 22:3.) Langira ebyawatikaya Dawit na Almaz abe Etiopia. Bakabugha bati: “Itukalabaya endambi haghuma omo myanya eyikabyamo abandu bangyi, kutse itukabya n’abira betu. Isitulibya itwibene omo mutoka kutse omo nyumba. Neryo ekyo ikikatuwatikaya eriyihighula oko myatsi eyangaleka itwakola ekibi.”
11. Ni myatsi yahi eyo omulume n’omukali abali omo bwira bw’eritahania batolere erilengekaniako omughulu bakayisogha erikanganania olwanzo?
11 Tubughe tutiki okw’ikanganania olwanzo? Olwanzo lwenyu lukakula, mwanganayisogha eribya mukakanganania olwanzo omo nzira silebe esitolere. Aliwe, esyongumbu syenyu sy’erikola emyatsi y’engyingo syamabikanyirira, ikyanganabakalako kutsibu eriyisogha n’amenge. (Olwi. 1:2; 2:6) Kandi omughulu mukakangananaya olwanzo, kyanganabakalako eriyikakirya neryo imwakola emyatsi eyitetsemesaya Yehova. (Misyo 6:27) Neryo, obwira bwenyu bukanatsuka, mukanaye oko syokanuni sya Yehova n’oko ebyo simwendisyabya mukakola mukakanganania olwanzo. c (1 Tes. 4:3-7) Muyibulaye muti: ‘Abandu b’eyo twikere bakatulangira bati omughulu tukakangananaya olwanzo? Ngoko tukakanganania olwanzo, ekyo kyanganabukya esyongumbu nyibi omo mughuma w’okw’itwe?’
12. Litolere imwaminyaki mwamatendibya mukahulikirirana omo bwira bwenyu bw’eritahania?
12 Mwangasogha muti esyombanza n’eritendihulikirana? Mwamatendibya mukahulikirirana kangyi-kangyi, ekyo kinasondire eribugha kiti simutolerene? Ko bite bitya. Nibya n’ababirilunga hakanabya omughulu ibatahulikirirana. Endwa eyuwene ye y’abandu babiri abakakola haghuma eribughaho eritendihulikirirana omo kati-kati kabo. Neryo kwesi, ngoko mukasoha esyombanza syenyu munabwire, kyanganakangania endwa yenyu nga yinemwendisyuwana kutse iyehe. Muyibulaye muti: ‘Tukanakanaya oko syombanza itunatulere kandi itunasikenie? Tukanalw’itwaligha amakosa wetu n’eriyikasa erikokotya emyatsi? Tukanamakirira amalengekania wetu? Tukanalw’itwasabana obughanyiri? Tukanalw’itwaghanyirana?’ (Efe. 4:31, 32) Aliwe, mwamatendibya mukahulikirirana kangyi-kangyi kutse mwamabibya mukasokongolana omo bwira bwenyu, alinga emyatsi isiyanguwana mwabilunga. Mwamabilangira nga simutolerene, eritwa obwira kyanganabya eriyisogha eryuwene okw’inywe babiri. d
13. Ni myatsi yahi eyangawatikya omulume n’omukali, eriminya obwira bwabo nga bukendibugha omughulu mungahi?
13 Obwira bwenyu butolere ibwabugha mughulu mungahi? Kangyi-kangyi, emyatsi siyirighenda ndeke twamatendimya akatambi k’erilengenia buli. (Misyo 21:5) Neryo kwesi, omughulu w’obwira bwenyu atolere inyabya mughulu owatosire mutoke eriminyana ndeke. Nomo bine bitya, siritolere omughulu w’obwira bwenyu inyabya muli isihali ekikaleka. Kandi eBiblia ikabugha yiti: “Amaha awakalindirirawa akaleka omutima iniasimba.” (Misyo 13:12) Kutya, obwira bwenyu bukalola embere kyanganoloba eritoghera omo kitegho ky’obusingiri. (1 Kor. 7:9) Omo mwanya w’erilindirira mughulu muli, wanganayibulya uti: ‘Nikinalaghire eriminya eyindi myatsi yahi okw’iye nitoke eriyisogha?’
ABANDI BANGAWATIKYA BATI?
14. Abandi bangawatikya bati abali omo bwira bw’eritahania? (Ulebaye n’epitsa.)
14 Twamabya itunasi omulume n’omukali abali omo bwira bw’eritahania twangawatikyabo tuti? Twanganabirikirabo eka oko kalyo, kutse okw’iramya lyetu ly’eka, kutse oko fete. (Rom. 12:13) Twamabikola tutya, ako kanganabya akanya ak’eribawatikya eritasyaminyana ndeke. Wanganabawatikya eribana omundu w’akasatu ow’eribakwamanisya, kutse wanganabawatikya eribana etrasporo, kutse wanganabawatikya eribana aho bakendikanirya emyatsi yabo y’esiri. (Gal. 6:10) Alicia, oyo twabirikaniryako aho mbere, akibuka ebyo iye na Aschwin babya bakatsemera. Alicia akabugha ati: “Itukatsema kutsibu omughulu abaghala n’abali betu balebe bamatubwira bati twamabilagha oko mwanya w’erikaniryamo, itwababwira, omo mwanya w’eribya ah’abiseme.” Bamabikusaba erilabya endambi nabo, ulangire ako mo kanya k’eriwatikyabo. Isiwabya ukasighaniabo ibibene, aliwe kandi kumbe, iwaminya omughulu bamalagha eribya ibibene batoke erikania oko myatsi eyibalebirye.—Filip. 2:4.
Wamabya ighunasi abali omo bwira bw’eritahania, wanganarondya ehyanya hy’eribawatikya (Ulebaye enungu 14-15)
15. Ni kindi kyahi ekyo abandi bangakola batoke eriwatikya abali omo bwira bw’eritahania? (Emisyo 12:18)
15 Kandi twanganawatikya abali omo bwira bw’eritahania omo ebyo tukabugha n’ebyo tutakola. Ndambi silebe litolere itwayikakirya. (Soma Emisyo 12:18.) Ng’eky’erileberyako, wangananza eribwira abandi ngoko lebe na lebe babiritsuka obwira bw’eritahania, kwesi ibo ibanzire ibatula omwatsi wabo ibibene-bene. Situtolere eribya tukabugha-bugha kutse eribugha muhanda oko myatsi yabo. (Misyo 20:19; Rom. 14:10; 1 Tes. 4:11) Kandi siritolere eribya tukabugha emyatsi eyangaleka ibayowa muhanda, kutse eribya tukababulya amabulyo awangaleka ibayowa nga babirihatikanwa. Mwali wetu oyukahulawa mo Elise n’iba wiwe bakabugha bati: “Itukayowa muhanda bamabitubulya oko programe y’endwa yetu nibya itwe isitulitwatapangayo.”
16. Twanganayiwata tuti omughulu abali omo bwira bw’eritahania bamatwa obwira bwabo?
16 Neryo, byangabya biti abira bamabiyisogha eritwa obwira bwabo? Situtolere eriyingirya omo mwatsi wabo kutse eribya oko luhande lulebe. (1 Pet. 4:15) Mwali wetu oyukahulawa mo Lea akabugha ati: “Munowa ngoko abandi babiribya bakayibulya-bulya nga tulyatwa obwira bwetu busanaki. Oko kwenene, munitatsema.” Ngoko tunalyalangira aho mbere, omulume n’omukali eritwa obwira si bugha ambu bamataluka. Omo mwanya w’ekyo, obwira bwabo bukabya ibwabirihikira ekusudi yabo, ni bugha ambu eriwatikya omulume n’omukali eriyisogha ndeke. Aliwe eriyisogha eryo, lyanganaleka ibayowa muhanda kandi lyanganaleka ibayowa omo mbwera. Neryo kwesi, twanganasondekania esyonzira esy’eribawatikya.—Misyo 17:17.
17. Litolere abali omo bwira bw’eritahania ibalola embere erikolaki?
17 Ngoko twabirilangira, obwira bw’eritahania bwanganabya n’amaligho wabo, aliwe kandi, bwanganatsemesya. Jessica akabugha ati: “Eribugha ekwenene obwira bwetu mubwatusaba mubiiri munene. Munatsema kundi mutwakolesya endambi n’akaghala ketu tutoke eriminyana ndeke.” Mwamabya imuli omo bwira bw’eritahania, mulole embere erikola kutsibu mutoke eriminyana ndeke. Mwamabikola mutya, obwira bwenyu ibukendibakolya okw’iyisogha eryuwene.
OLWIMBO 49 Eritsemesya omutima wa Yehova
a Amena malebe mwakabindulawa.
b Eriminya amabulyo mangyi w’erilengekaniako ulebaye ekitabu Maswali Ambayo Vijana Huuliza—Majibu Yafanyayo Kazi, Buku 2, aka. 39-40.
c Eritula-tula oko bitsuko by’olubuto by’oghundi mundu ni ghundi muhanda w’obusingiri. Ekyo kyanganaleka abasyakulu b’endeko ibakola akatunga k’eritswera. Eritula-tula oko mabere, erihandikirana kutse erikanirania emyatsi eyitisirirye oko telefone n’oghundi nalyo lyanganaleka omundu iniaya omo katunga k’eritswera; aliwe, emyatsi yosi siyirisosana.
d Eriminya eyindi myatsi, ulebaye, “Amabulyo erilua oko basomi betu” omo Akaleberyo k’omuteya ak’ekiro 15 Omwisi 8, 1999.
