OMWATSI W’ERIGHA 20
OLWIMBO 67 “Utule engulu yuwene”
Olwanzo lukukune erilola embere eritulira!
“Litolere engulu mbuya iyatsuka eritulaghanibwa oko bihanda byosi.”—MAR. 13:10.
ENZUMWA NGULU:
Ngoko olwanzo lukatukuna erikola omubiiri wetu w’eritulira n’omuhwa kandi n’omutima wetu wosi.
1. Mutwigha emyatsi yahi oko muhindano w’obuli mwaka owe 2023?
OKO muhindano a w’obuli mwaka owe 2023, mubatasyatwowisya ndeke amakangirirya malebe agho twabya twikirirye kandi mutowa n’emilaghe eyitsemesirye eyilebirye omubiiri wetu w’eritulira. Ng’eky’erileberyako, mutwigha ngoko abandu balebe bakendisyabya n’akanya ak’eribya oko luhande lw’abandu ba Yehova nibya n’enyuma sy’eritoghotibwa lya Babiloni Mukulu. Kandi mutwigha ngoko eritsuka oko Mwisi 11, 2023, abatuliri bosi sibakisabirwe eriteka eripoti ry’emyatsi yosi eyo byalyakola omo mubiiri w’eritulira. Emyatsi eyi yanamakangania ngoko omubiiri wetu w’eritulira syakiri w’omughaso kutse syakiri w’erikola luba? Ko bite bitya!
2. Ebiro bikalaba, busanaki omubiiri wetu w’eritulira akalola embere eribya w’omughaso, kandi ow’erikola luba? (Mariko 13:10)
2 Ebiro bikalaba omubiiri wetu w’eritulira akalola embere eribya w’omughaso kandi ow’erikola luba. Busanaki? Kundi hakisiya mughulu muke enduli iyahika. Tulebaye ebyo Yesu abugha oko omubiiri wetu w’eritulira omo biro by’enduli. (Soma Mariko 13:10.) N’ekitabu kya Matayo nakyo ngoko kibuyire, Yesu mwabugha ati engulu mbuya yasyatulaghanibwa omo kihugho kyosi embere “enduli” yihike. (Mat. 24:14) Hano, ekinywa “enduli” kikamaanisaya enduli y’ekihugho kibi kya Sitani. Yehova abirihiraho “ekiro n’endambi” eyo emyatsi yosi eyo yikendihikirako hano ho sesene. (Mat. 24:36; 25:13; Emib. 1:7) Obuli kiro, tukabya itunemuseghera hakuhi n’endambi eyo. (Rom. 13:11) Embere enduli yihike litolere itwalola embere eritulira.
3. Ebikatukuna eritulira ni byahi?
3 Hano hane eribulyo ly’omughaso eryo itwe bosi tutolere erilengekaniako: Busanaki tukatulira engulu mbuya? Ni busana n’olwanzo. Ebyo tukakola omo mubiiri w’eritulira bikakanganaya olwanzo lwetu, ni bugha ambu, olwanzo lwetu oko ngulu mbuya, olwanzo lwetu oko bandu, n’ekikulu oko byosi l’olwanzo lwetu oko Yehova n’oko rina liwe. Tukanaye oko buli mwatsi.
TUKATULIRA KUNDI TWANZIRE ENGULU MBUYA
4. Tukayiwata tuti omughulu twamabana engulu eyuwene?
4 Terilengekania ngoko ukayowa omughulu ukabana engulu eyuwene. Kwamuhwa, omundu mughuma w’omo kihanda kyenyu amabuta olumekeke kutse omundu mulebe amakuha omubiiri ogho wabya ulaghireko. Ahate n’eritika-tika, ukatseme kutsibu neryo iwabwira ab’omo kihanda kyaghu n’abira baghu oko mwatsi oyo. Alinga ko byanabya bitya omughulu wowa oko ngulu eyuwene kutsibu eyilengire esyosi, ni bugha ambu, engulu mbuya y’Obwami b’oMungu.
5. Muwayowa uti omughulu wigha engendo yaghu y’erimbere oko kwenene eyiri omo Kinywa ky’oMungu? (Ulebaye n’esyopitsa.)
5 Terilengekania ngoko wayowa omughulu wigha oko kwenene eyiri omo Kinywa ky’oMungu ngendo yaghu y’erimbere. Muwaminya ngoko Tata waghu w’elubula akwanzire, anzire iwabya mughuma w’oko ab’omo kihanda kiwe abakamuramaya. Muwaminya ngoko abirilagha ngoko akendisyabughaho amaghali n’amaligho kandi ngoko wanganasyalola oko banzwa baghu ababirihola babilubuka omo kihugho kihya-kihya, n’eyindi myatsi eyikatsemesaya. (Mar. 10:29, 30; Yoh. 5:28, 29; Rom. 8:38, 39; Erib. 21:3, 4) Ebyo wigha mubyatula oko mutima waghu ko kutsibu. (Luka 24:32) Muwanza ebyo wabya ukigha kandi muwanza eribya ukakanirya kubyo kw’abandi!—Tasyalebya na Yeremia 20:9.
Omughulu tukigha oko kwenene eyikalua omo Biblia, tukatsema kutsibu n’ekyo kikatukuna eryanza eribwira abandi oko kwenene eyo! (Ulebaye enungu 5)
6. Eky’erileberyako kya Ernest na Rose kyamatwighisyaki?
6 Tulebaye eky’erileberyako. Mughala wetu oyukahulawamo Ernest b abya hakuhi n’emyaka 10 omughulu baba wiwe ahola. Ernest akabugha ati: “Ingayibulaya niti: ‘Baba waghe abiriya elubula kwe? Kutse ninemwendisyamulolako kwe?’ Ingahonaya nabilangira abana abakinawite oko bo baba wabo.” Ernest inabeghere eriyakukama oko isinda ya baba wiwe n’erisaba ati: “Kisi Mungu, nyanzire eriminya baba wayi ng’ali hayi.” Hakuhi emyaka 17 baba wiwe inyabirihola, Ernest mwaligha erigha eBiblia. Mwatsema kutsibu eriminya ngoko abaholi sibasi kindu, bali ng’abandu abali omo highotseri hinene kandi ngoko eBiblia yikalagha ngoko abaholi bakendisyalubuka omo biro ebikasa. (Omug. 9:5, 10; Emib. 24:15) N’oko ndulya, mwabana ebisubiryo oko mabulyo agho abya akamukenderya oko myaka mingyi! Ernest mwatsemera kutsibu amakangirirya w’eBiblia agho abya akigha. N’omukali wiwe ye Rose, mwatsuka erigha. Naye mwatsemera ebyo abya akigha. N’oko 1978 mubabatisibwa. Mubatulira n’omuhwa abandu b’omo kihanda kyabo, abira babo n’abandi bandu oko myatsi eyo babya bakigha. Ekyo mukyaleka ibawatikya abandu banene oko 70 eriminya Yehova n’erihikira okw’ibatisibwa.
7. Bikabya biti omughulu ekwenene y’eBiblia yikahanda emirihi omo mutima wetu? (Luka 6:45)
7 Oko kwenene, omughulu ekwenene y’eBiblia yikahanda emirihi omo mutima wetu, sitwangatoka erihunirayo. (Soma Luka 6:45.) Tukayowa ng’abigha ba Yesu b’oko karne k’erimbere ababugha bati: “Sitwangaleka eribugha oko myatsi eyo twalangira n’eryowa.” (Emib. 4:20) Twanzire ekwenene yo kutsibu n’ekyo kikatukuna eribwira abandu bangyi oko kwenene eyo.
TUKATULIRA KUNDI TWANZIRE ABANDU
8. Ebikatukuna eribwira abandu oko ngulu mbuya ni byahi? (Ulebaye akasanduku “ Wanze abandu—Uyire abigha.”) (Ulebaye n’epitsa.)
8 Twanzire abandu nga Yehova na Mughala wiwe. (Misyo 8:31; Yoh. 3:16) Tukakwira obulighe abandu ‘abate n’oMungu’ kandi ‘n’abate n’amaha.’ (Efe. 2:12) Busana n’eriyitoberya omo maligho mangyi aw’engebe, abandu abo bali ng’abali omo kihuna kiri, neryo n’itwe tuwite oko kamba y’eribalusyamo. Ekamba eyo y’engulu mbuya y’Obwami b’oMungu. Olwanzo lwetu okw’ibo n’eribakwira obulighe, bikaleka itwakola ekyosi-kyosi ekyo twangatoka tukoke eribabwira oko ngulu mbuya. Engulu mbuya eyo yanganabaha amaha, iyabawatikya eribya n’engebe eyuwene lino n’eribaha akanya k’erisyatsemera “engebe y’ekwenene,” ni bugha ambu engebe y’erikota omo kihugho kihya-kihya ky’oMungu.—1 Tim. 6:19.
Eryanza bandu n’erikwirabo obulighe bikatukuna erikola ekyosi-kyosi ekyo twangatoka tutoke eribwirabo oko ngulu mbuya (Ulebaye enungu 8)
9. Tunemubwira bandu oko mwatsi wahi ow’erikunga owalebirye ebiro ebikasa, kandi busanaki? (Ezekieli 33:7, 8)
9 Olwanzo lwetu oko bandu nalo lukatukuna eribwirabo ngoko enduli y’ekihugho kibi kino yiri hakuhi. (Soma Ezekieli 33:7, 8.) Tukakwira abandu bosi abatekolera Yehova b’obulighe erihirako n’abandu b’omo kihanda kyetu. Munabwire abandu bangyi sibasi ngoko “eryaghalwa rinene eriteryatabya eritsuka okw’ihangyikwa ly’ekihugho kandi eritendisyasyabya enyuma syaho” linemwasa. (Mat. 24:21) Twanzire ibaminya ekikendisyabya omo mughulu w’eritswera oyo. Ebisomo byosi by’amabehi bikendisyatoghotibwa, n’enyuma w’aho ekihugho kibi nakyo ikyatsandibwa oko Armagedoni. (Erib. 16:14, 16; 17:16, 17; 19:11, 19, 20) Tukasaba tuti ngambe abandu bangyi ibahulikirira ebyo tukabakangiriraya n’eriyisogha erikolera Yehova lino haghuma netu. Neryo bikendisyabya biti oko bandu abakaghana erituhulikirira lino, erihirako n’abandu ab’omo kihanda kyetu abo twanzire?
10. Busanaki ni ky’omughaso munene erilola embere eribwira abandi oko myatsi eyikendibya hano ho sesene?
10 Ngoko twalangira omo mwatsi owalaba, Yehova anzire erisyasabula abandu abakendisyabindula emitima yabo babilangira eritsandibwa rya Babiloni Mukulu. Byamabya iko bikendisyabya bitya, kwesi ni ky’omughaso munene erilola embere eribwirabo lino oko mwatsi oyo. Uminye kino: Ebyo tunemubwirabo munabwire, byanganasyabawatikya eryibuka ebyo twabya tukababwira. (Tasyalebya na Ezekieli 33:33.) Alinga bakendisyibuka ebyo twabya tukababwira n’ekyo ikyabakuna eriramya Yehova kughuma netu endambi yiteyahwaho. Ngoko omuteya w’engomo owe Filipi mwabindula omutima enyuma sy’“omusiki munene” erilaba, kwamuhwa, abandu abatetuhulikirira munabwire banganasyabindula emitima yabo enyuma sy’erisuka-sukanibwa ly’ekihugho, Babiloni Mukulu akatsandibwa.—Emib. 16:25-34.
TUKATULIRA KUNDI TWANZIRE YEHOVA N’ERINA LIWE
11. Tukaha Yehova y’olukengerwa, n’erisikibwa n’obutoki tuti? (Eribisulirwa 4:11) (Ulebaye n’esyopitsa.)
11 Omwatsi mukulu owakatukuna eritulira engulu mbuya, ni kundi twanzire Yehova oMungu wetu n’erina liwe libuyirire. Tukalangira omubiiri wetu w’eritulira mo nzira y’eripipa oMungu oyo twanzire. (Soma Eribisulirwa 4:11.) Tukalighirana n’omutima wetu wosi ngoko Yehova Mungu wetu atolere erighabya olukengerwa, erisikibwa n’obutoki erilua oko baramya biwe bataleghula. Tukamuha olukengerwa n’erisikya omughulu tukabwira abandi oko mwatsi w’ekwenene ngoko ‘mwahangyika ebindu byosi’ kandi ngoko tuliho kundi n’iye yuwatuha engebe. Tukamuha obutoki, ni bugha ambu obutoki bwetu, omughulu tukakolesaya endambi yetu, akaghala ketu n’ebyo tuwiteko eritulira ngoko twangatoka. (Mat. 6:33; Luka 13:24; Kol. 3:23) Omo kikuhi, twanzire erikania oko Mungu kundi tumwanzire. Kandi twanzire eribwira abandi oko rina liwe kandi nga ni Mungu oyuly’ati. Busanaki?
Tukaha Yehova y’obutoki omughulu tukakolesaya endambi yetu, akaghala ketu n’ebyo tuwite erikola omubiiri w’eritulira ngoko twangatoka (Ulebaye enungu 11)
12. Tukayira tuti erina lya Yehova mo libuyirire tukatulira?
12 Olwanzo lwetu oko Yehova lukatukuna eriyira erina liwe mo libuyirire. (Mat. 6:9) Ekyo ni bugha ambu, twanzire eribwira abandi ngoko emyatsi mibi eyo Sitani abugha oko Yehova, ni mabehi. (Enz. 3:1-5; Yobu 2:4; Yoh. 8:44) Omughulu tukatulira, tukabya n’engumbu nene ey’erikanirya abosi abakatuhulikirira, Yehova nga nindi kandi nga ni Mungu oyuly’ati. Twanzire ibaminya ngoko olwanzo wo mubere mukulu w’oMungu kandi ngoko enzira yiwe y’eritabala yo yuwene kutsibu kandi yitunganene. Kandi ngambe ibaminya ngoko Obwami b’oMungu bo bukendibuwaho amaligho wosi n’eriletera abandu bosi b’obuholo n’obutseme. (Eys. 37:10, 11, 29; 1 Yoh. 4:8) Omughulu tukabwira abandu bosi oko myatsi yosi eyi, tukayira erina lya Yehova mo libuyirire. Kandi tutsemire kundi tunemuyikasa erikola ebyo tutolere itwakalo nga Bimiri biwe. Busanaki tukabugha tutya?
13. Busanaki tukatsemera eryahulwamo Abimiri ba Yehova? (Isaya 43:10-12)
13 Yehova akatwahulamo “Abimiri biwe.” (Soma Isaya 43:10-12.) Emyaka milebe eyamabilaba, ebaruha ey’Ekyahanda Ekikasondola muyabugha yiti: “Olusunzo lunene olo obuli bughuma w’okw’itwe awite, ry’eryahulwamo Mwimiri wa Yehova.” c Busanaki tukabugha tutya? Tukanaye oko eky’erileberyako. Wamanza erisombola omundu mulebe abye mwimiri waghu oko lubanza lulebe oko tribinali, ukasombola omundu oyo wasi, oyo uyiketere, oyo asibwe ndeke, n’oyo abandi banganayiketera. Yehova eritusombola tubye Abimiri biwe, akakanganaya ngoko atwasi ndeke, kandi ayiketere ko tukendibwira abandi ngoko n’iye Mungu mughuma musa w’ekwenene. Tukalangira ini lusunzo lunene eribya Abimiri biwe, kyo kikaleka itwakolesya obuli kanya eriminyikalia erina liwe n’erikangania ngoko emyatsi mibi yosi eyo babirimubughako ni mabehi. Umwikola tutya tukabyaho erikwamana n’erina eryo tuhekire, ni bugha ambu, Abimiri ba Yehova!—Esy. 83:18; Rom. 10:13-15.
TUKENDILOLA EMBERE ERITULIRA ERIHIKA OKO NDULI
14. Ni myatsi yahi eyikatsemesaya eyo tunemulinda hano ho sesene?
14 Tunalindirire n’omuhwa emyatsi eyikatsemesaya yihike hano ho sesene! Erilabira obuwatikya bwa Yehova tuli n’amaha w’erilangira abandu bangyi bakaligha ekwenene embere eryaghalwa rinene litsuke. Kandi tuli n’obutseme ngoko, nibya n’omo mughulu owakalire kutsibu ow’atewatabya, ni bugha ambu, omughulu w’eryaghalwa rinene, abandu banganasyalua omo kihugho kya Sitani n’eripipa Yehova haghuma netu!—Emib. 13:48.
15-16. Tukendilola embere erikolaki, n’erihika mughulu wahi?
15 Tukalindirira ekyo, tunawite olusunzo lw’erikola oko mubiiri w’omughaso munene, omubiiri ogho syendisyasyakoleka. Omubiiri oyo ry’eritulira engulu mbuya y’Obwami b’oMungu omo kihugho kyosi. Oko mughulu mughumerera ono, litolere itwalola embere eribwira abandu oko myatsi eyikendibya hano ho sesene. Abandu batolere eriminya ngoko enduli y’ekihugho kibi kino yiri hakuhi. Neryo omughulu endambi y’eritswera eyo yikendihika, bakendisyaminya ngoko omulaghe ogho twabya tukatulira abya akalua oko Yehova Mungu.—Ezek. 38:23.
16 Neryo tuyisohire kundu erikolaki? Kwesi, tutolere itwalola embere eryanza engulu mbuya, eryanza abandu, n’ekikulu oko byosi eryanza Yehova Mungu n’erina liwe, bitukune erilola embere eritulira n’obutseme kandi tulangire omubiiri oyo mo w’erikola luba erihika ekiro Yehova asyabugha ati: “Mutwirirye aho!”
OLWIMBO 54 “Enzira y’eyi”
a Omuhindano w’obuli mwaka owakolawa ekiro 7 Omwisi 10, 2023 omo Kisenge ky’emihindano minene-minene eky’Abimiri ba Yehova kye Newburgh ekiri e New York, omo Amerika. Enyuma eprograme yosi muyahirwa oko JW Teledifizyo—ekitswe ky’erimbere mukyahirwako ekiro 1 Omwisi 11, 2023 n’ekitswe ky’akabiri mukyahirwako oko Mwisi 1, 2024.
b Ulebaye omwatsi “Biblia Inabadilisha Maisha ya Watu—Nilifurahia Majibu ya Biblia Yenye Kuwa Wazi na Yenye Kueleweka,” owahuluka omo Akaleberyo k’Omuteya k’ekiro 1 Omwisi 2, 2015.
c Ulebaye ekitabu Annuaire des Témoins de Jéhovah ekye 2007 aka. 3.