Amabulyo erilua oko basomi betu
Ebinywa eby’omo Esyonyimbo 12:6, 7 bihambene biti?
Omo Esyonyimbo 12:1-4, Daudi mwabugha ati, “abateregula bakabula omo katikati kʼabandu.”
Kandi omo Esyonyimbo 12:5-7, mwabugha ati:
[Yehova] ati, lino ngandihika,
Kusangwa abʼobwaga bakanubibawa,
Nʼabakendereribawa bakasimba eriagalwa.
Nasyahabo obuholo obo bakasonda!
Ebinywa bya [Yehova], ni binywa bibuya,
Ni bibuya ngʼebitsipa ebyabirilaba omo luhitsa ebitukwire ngendo sirinda.
Uwe [Yehova], utulembere buholo,
Ututegaye oko bandu abo. [Wasyateyabo oko lulengo olu kera na kera.]
Omulondo 5 akakanganaya ebyo oMungu akabugha busana n’ab’obwagha. Ati, ngandihika kutse ngendisabulabo.
Omulondo 6 akatasyatomekako ati “ebinywa bya [Yehova], ni binywa bibuya,” ‘ngʼebitsipa ebyabirilaba omo luhitsa.’ Abakristo b’ekwenene bakalighirana n’ebinywa ebyo.—Esy. 18:30; 119:140.
Omo Biblia silebe, Esyonyimbo 12:7 sikabindulawa sitya: “Wasyateyabo.”
Kandi kundi omulondo 6 akabya inyabiryahula “ebinywa bya [Yehova]” abandu balebe bakalw’ibalengekania bati omulondo oyu akasonda eribugha ati oMungu akateghaya ebinywa biwe. Kandi tunasi ngoko ni kwenene oMungu abiriteya eBiblia nomo esyonzighu syabya sikasonda erighaniayo n’eritoghotyayo.—Isa. 40:8; 1 Pet. 1:25.
Aliwe kandi, kwenene Yehova akateghaya abandu abakanibweko omo mulondo 5. Yehova akawatikaya kandi akendisyalola embere erikola atya oko bandu “abʼobwaga” n’oko bandu ‘abakanubibawa.’—Yobu 36:15; Esy. 6:4; 31:1, 2; 54:7; 145:20.
Neryo ngoko kiri omo mulundo 7 Yehova akateghayaki? Akateghaya abandu kutse akateghaya Ekinywa kiwe?
Tukabya twayiteghererya ndeke omulondo oyu, kikalw’ikyalangirika ngoko akakanaya oko bandu.
Omo Esyonyimbo 12:1, Daudi akakanaya oko baghombe bataleghula ba Yehova ababiritebibwa n’abandu babi. N’omo mulondo awakwamire Daudi akakanganaya ngoko Yehova akenditwa eminywa y’abandu babi abo. Esyonyimbo sikatuwatikaya eriyiketera ngoko akendisyateya abandu biwe kundi ebinywa biwe ni bibuya.
Neryo kwesi, ngoko kikanganibwe omo mulondo 7, abo Yehova akateghaya bo bandu b’obwagha abakanubibawa n’ababi.
Nikwa, busanaki esindi mbindula sy’eBiblia sikabugha oko mulondo oyu siti, “wasyateyabo”? Ekyo ni kundi bakakwama esindi kopi esy’eriyiketerwa esy’Amasako w’Ekiebrania. Aliwe Amasako w’Ekigiriki awe Septante akabindulaho ati “Asyatusabula” kandi “Asyatuteya” neryo ikyowika ndeke ngoko b’abandu bataleghula ab’obwagha n’abakanubibawa. Bakendisyateyibwa “oko bandu abo” abakapipa ebibi. (Esy. 12:7, 8) EBiblia nguma eyabindulawa erilua omo Kiebrania eriya omo mubughe we Kiaramu yikabindulaho yiti: “Iwe, MUKAMA, wasyateya uyutungenene, wasyamuteya oko kizazi kibi kino kera na kera.” Eki nakyo kikalw’ikyakangania ndeke ndeke ngoko Esyonyimbo 12:7 sisiryahula ebinywa by’oMungu.
Kwesi omulondo oyu akaha amaha oko “abandu abakakenga [oMungu]” ngoko oMungu akendisyawatikyabo.
