1. Ni byahi ebikawatikaya bandu ba Yehova erilola embere erimuramya nomo banemulaba omo maligho?

 EBIBLIA yikabugha ngoko tuli omo “emighulu eyikalire.” (2 Tim. 3:1) Okw’itomeka oko maligho agho obuli mundu anemubana omo kihugho kibi kino, abandu ba Yehova banemwendereribwa busana n’erikolera Yehova. Ni byahi ebikatuwatikaya erilola embere eriramya Yehova nomo tunemubana amaligho ayo? Ekindu kikulu ekikaleka itwalola embere erikolera Yehova ry’eryibuka emyatsi mibuya eyo Yehova abirituwatikiryamo n’eriminya ngoko “ni [Mungu] oyuliho.”​—Yer. 10:10; 2 Tim. 1:12.

2. Ni myatsi yahi eyo twasi oko Yehova eyangaleka itwabya n’akaghala?

² Yehova akabya inyanalangire amaligho wosi agho tukabya itunemulabamo kandi mughulu wosi anzire erituwatikya. (2 Emya. 16:9; Esy. 23:4) Omughulu tukibuka ngoko Yehova atutsomene kandi ngoko mughulu wosi anayiteghekire erituwatikya, ebyo byanganaleka itwabya n’akaghala ak’eriyiyinia omo maligho wosi-wosi. Tulebaye emyatsi eyo nga muyawatikya yiti Omwami Daudi omo ngebe yiwe.

3. Daudi mwasonda eribugha atiki omughulu abugha ati “Yehova aliho”?

³ Daudi mwaminya Yehova n’eriyiketera iye. Omughulu Omwami Sauli n’abandi, basonda eriita Daudi, Daudi mwasaba Yehova y’obuwatikya. (Esy. 18:6) OMungu abere abisubirya oko misabe yiwe n’erimusabula, Daudi mwabugha ati: “[Yehova] aneho!” (Esy. 18:46) Daudi mwasonda eribugha atiki? Daudi abya akasonda eribugha ngoko Yehova ni Mungu w’ekwenene kandi oyo akawatikaya abaghombe biwe mughulu  wosi. Daudi mwaminya ngoko Yehova anasi ebyo anemulabamo kandi anayiteghekire erimuwatikya. Ekyo mukyahira omo Daudi mo muhwa w’erilola embere erikolera Yehova n’erimupipa.​—Esy. 18:28, 29, 49.

4. Tukabana endundi syahi erilangira Yehova ng’oMungu oyuliho?

⁴ Erikirirya ngoko Yehova ni Mungu oyuliho kyanganatuwatikya erimukolera n’omuhwa. Itukendibya n’akaghala ak’eriyiyinia omo maligho n’ekyo ikyatuhiramo omuhwa w’erilola embere erikolera Yehova yo kutsibu omo mubiiri wiwe. Kandi itwanganayitsinga kundu erisighala abira ba Yehova.

OMUNGU OYULIHO AKENDIKUHA AMAKA

5. Niki kyo kyangatuwatikya eriyiketera Yehova omughulu tunemulaba omo maligho? (Abanya Filipi 4:13)

⁵ Twamabya tukibuka ngoko Yehova aliho kandi anayiteghekire erituwatikya ikikenditwolobere eriyiyinia omo maligho awakalire na make-make. OMungu anganatuwatikya oko maligho wosi kundi sihali ekindu ekyangamulema. Ni w’Obutoki bosi kandi akatuha akaghala ak’eriyiyinia. (Soma Abanya Filipi 4:13.) Ekyo kikaleka itwayiketera iye omughulu tunemulaba omo maligho. Kandi omughulu tukalangira ngoko Yehova anemutuwatikya omo hyatsi hike-hike, ekyo kikaleka itwayiketera ngoko anemwendisyatuwatikya n’omo maligho awakalire.

6. Ni myatsi yahi eyahuluka omo ngebe ya Daudi, eyaleka inyatasyayiketera Yehova?

⁶ Tulebaye emyatsi ibiri eyahika omo ngebe ya Daudi eyaleka inyayiketera Yehova. Inyakine mulwana edubu n’esimba mubyaheka embuli nguma-nguma oko syombuli sya baba wiwe inyanemulisyasyo. Omo butubaha Daudi mwakwamirira obuli nyama n’erisaghula esyombuli esyo. Aliwe Daudi mwatabugha ati mwakakola emyatsi eyo omo kaghala kiwe. (1 Sam. 17:34-37) Mwaminya ngoko Yehova yulyamuha akaghala ak’erikola ebyo. Daudi mwatibirirwa na hake emyatsi eyo. Omwilengakania oko myatsi eyo, Daudi mwatasyayiketera oMungu oyuliho ngoko akendisyamuha akaghala omo mughulu owakasa.

7. Daudi mwahira amalengekania wiwe okuki, kandi busanaki ekyo mukyamuwatikya erilwa na Goliata?

⁷ Enyuma, Daudi inyakine mulwana, isyalyayira n’emyaka 20 mwayalenderera ekambi ya basuda be Israeli. Daudi mwahindana abasuda abo ibabirikwa obuba busana n’omufilistini embangyi eyikahulawamo Goliata oyo wasyasonda omwagha oko “milondo ya Israeli.” (1 Sam. 17:10, 11) Abasuda mubakwa obuba kundi mubahwererya amalengekania wabo oko Goliata ngoko abya asosire n’ebyo abya akababwira. (1 Sam. 17:24, 25) Aliwe Daudi iye mwatalangira emyatsi y’atya. Daudi mwaminya ngoko erisekererya emilondo ye Israeli, Goliata abya akatsuma “emilondo [y’oMungu] oyuliho.” (1 Sam. 17:26) Daudi abya akalengekania oko Yehova. Daudi mwayiketera ngoko oMungu oywamuwatikaya omughulu abya mulisya akendimuwatikya omo myatsi eyabya akalabamo. Inyanayiketere akalagha k’oMungu, mwalwa na Goliata n’erimukinda!​—1 Sam. 17:45-51.

8. Niki kyo kyangatuwatikya erikirirya ngoko Yehova akendituwatikya omughulu tunemulaba omo maligho? (Ulebaye n’epitsa.)

⁸ Netu twanganatoka erikinda amaligho twamabyibuka ngoko oMungu oyuliho anayiteghekire erituwatikya. (Esy. 118:6) Eribya tukalengekania okw’ebyo Yehova atukolera kera kyangaleka itwikirirya ngoko akendituwatikya. Twanganabya tukasoma oko myatsi eyiri omo Biblia eyikatwibukaya ngoko Yehova asabula abaghombe biwe. (Isa. 37:17, 33-37) Kandi twanganakwama esyovideo kutse itwasoma emyatsi oko jw.org ebikakanganaya  ngoko Yehova mwawatikya abaghala n’abali betu ba munabwire. Twibuke esyongendo syosi esyo Yehova abirituwatikiryamo. Kwamuhwa, wanganayibwira uti, ibwa ingye Yehova ko syalyatanikolera omwatsi ow’eriswekya ng’erinisabula omo buno bw’esimba kutse obw’edubu! Aliwe ekwenene y’eno: Yehova abirikola emyatsi mingyi omo ngebe yaghu! Yehova abirikukokya eribya mwira wiwe. (Yoh. 6:44) Erihika munabwire, unemutoka erimukolera kundi anemukuwatikya. Neryo usabe Yehova akuwatikaye eryibuka emighulu asubiraya oko misabe yaghu, emighulu akuwatikaya oko akatambi akatolere kutse emighulu akuwatikaya ighunemulaba omo myatsi eyikalire. Eribya ukalengekania oko myatsi eyo kikendikuwatikya eriyiketera kundu ngoko Yehova akendisyalola embere erikuwatikya.

9. Litolere itwibukaki omughulu tukalaba omo maligho? (Emisyo 27:11)

⁹ Eribya tukalangira Yehova mo mundu oyuliho kikatuwatikaya eribya n’amalengekania awuwene oko maligho wetu. Kiti? Tukatsuka erilangira amaligho wetu omo yindi nzira. Tukalangira ikamabya kanya ako Yehova anganakolesya erisubirya e Sitani. Kundi Sitani mwabugha ati twamabibya omo maligho itukendileka Yehova. (Yobu 1:10, 11; Soma Emisyo 27:11.) Aliwe omughulu tukayiyinaya omo maligho, tukakanganaya ngoko twanzire Yehova kandi tukakanganaya ngoko Sitani ni mubehi. Kwamuhwa unemwendereribwa n’eleta, wabiribula esyofranga, abandu banemughana erikuhulikirira ukatulira, kutse n’ebindi. Wamabya ighune omo mibere eyo, uminye ngoko emyatsi eyo ikakuha akanya ak’eritsemesya omutima wa Yehova. Wibuke ngoko oMungu syangaleka tukaghalwa kulenga ngoko twangatoka eriyiyinia. (1 Kor. 10:13) Akendikuha akaghala ak’eriyiyinia.

OMUNGU OYULIHO ASYAKUHEMBA

10. OMungu oyuliho akendisyakoleraki abaramya biwe?

¹⁰ Mughulu wosi Yehova akahemba abaramya biwe. (Ebr. 11:6) Lino akatuha obuholo  n’erituwatikya eritsemera ebyo tuwiteko kandi n’omo biro ebikasa akendisyatuha engebe y’erikota. Twanganahira amaha wetu oko Yehova itunayiketere ngoko ananzire kandi awite obutoki bw’erituhemba. Busana n’ekyo, tukayikasa erimuramya ngoko twangatoka ngoko abaghombe biwe ba kera bakola. Ekyo kyo Timoteo akola.​—Ebr. 6:10-12.

11. Busanaki Timoteo abya akakola kutsibu omo ndeko? (1 Timoteo 4:10)

¹¹ Soma 1 Timoteo 4:10. Timoteo mwayiketera kundu ngoko oMungu akendisyamuhemba. Ekyo kyo kyaleka inyakolera Yehova yo kutsibu n’erikolera abandi. Mwakolaki? Omukwenda Paulo mwamuhana eritasyuwania enzira yiwe y’erikangirirya omo ndeko n’omo mubiiri w’eritulira. Kandi Paulo mwabwira Timoteo ati abye ky’erileberyako ekyuwene oko Bakristo balikyabo, oko balere n’abakulire. Kandi mwahabwa emibiiri milebe eyikalire, ng’erikunga abalaghire okw’ikungwa aliwe akole atya omo lwanzo. (1 Tim. 4:11-16; 2 Tim. 4:1-5) Nomo ihakanabya endambi abandi ibatalangira omubiiri ogho Timoteo abya akakola kutse nibya ibatamusima, iye inyikirirye kundu ngoko Yehova asyamuhemba.​—Rom. 2:6, 7.

12. Busanaki abasyakulu bakakola kutsibu omo ndeko? (Ulebaye n’epitsa.)

¹² Munabwire abasyakulu b’endeko nabo, banganayiketera ngoko Yehova akalangira emibiiri yabo eyuwene kandi akalangirayo mo y’obughuli. Eritomeka oko mubiiri wabo ow’obulisya n’ow’erikangirirya n’eritulira, abasyakulu bangyi bakawatikaya oko mibiiri y’obuhimbe n’omughulu hamabya ebitsinduli. Abandi bakakola omo Hitunga hy’emyatsi y’olupitali kutse omo Hikuto hy’abakalebaya abakoni. Abasyakulu basi ngoko endeko si ya mundu, aliwe ni ya Yehova. Ekyo kikaleka ibakola n’omutima wabo wosi emibiiri yabo n’eriyiketera kundu ngoko oMungu akendisyabahemba oko ebyo bakakola.​—Kol. 3:23, 24.

13. Yehova akalangira ati ebyo tukamukolera?

 ¹³ Si mundu wosi yo wangabya musyakulu w’endeko. Aliwe obuli omundu anawite ekyo angaha Yehova. OMungu wetu akatsema kundu omughulu tukayikasa erimukolera ngoko twangatoka. Akabya inyanalangire ngoko tunemuteka ebihembo eriwatikya oko mubiiri w’omo kihugho kyosi n’omo situwite oko bingyi by’eriteka. Akatsema omughulu tukayikasa erikinda obuba bwetu tukakangania ebyala eriteka ekisubiryo oko mihindano, kandi akatsema omughulu tukaghanyira abalyatukosera. Nomo wanganapokya ebyo ukakolera Yehova, uminye ngoko iye anganasimabyo kutsibu. Akwanzire busana n’ebyo ukalola ebyo, kandi akendisyakuhemba.​—Luka 21:1-4.

UYITUNDE HAKUHI N’OMUNGU OYULIHO

14. Eriyitunda hakuhi na Yehova kikatuwatikaya kiti erisighala bataleghula? (Ulebaye n’epitsa.)

¹⁴ Sikiritukalako erisighala bataleghula oko Yehova omughulu tuli n’obwira obuwene haghuma naye. Ekyo mukyalangirika oko Yozefu. Mwaghana erisingira kundi abya n’obwira obuwene haghuma n’oMungu kandi mwatanza erikola emyatsi eyangahitanirye oMungu. (Enz. 39:9) Twamanza eribya n’obwira na Yehova litolere itwabya tukamusaba n’erigha Ekinywa kiwe. Twamabikola tutya, obwira bwetu naye ibukendikula. Netu, twamabibya n’obwira obuwene na Yehova nga Yozefu, isitwendibya tukanza erikola emyatsi eyangahitania Yehova.​—Yak. 4:8.

15. Twanganigha esomo yahi oko Baisraeli omughulu babya omo mbwarara? (Abaebrania 3:12)

¹⁵ Abakibirirawa ngoko Yehova ni Mungu oyuliho banganaleghula bweghu-bweghu okw’iye. Tulebaye ebyahikira Abaisraeli omo mbwarara. Babya ibanasi ngoko Yehova aneho, aliwe mubatsuka eritikatika n’eriyibulya Yehova ng’anemwendibaha ebyo balaghireko. Nibya mubatsuka eribulya bati: “[Yehova] ali haguma netu kutse iyihi kwehi?” (Eril. 17:2, 7) Ekyo mukyaleka ibayisamambula oko Mungu. Oko kwenene, sitwanzire erikwama  eky’erileberyako kyabo ekituwene ekyo ekikatukunga. Soma Abaebrania 3:12.

16. Ekyangalenga oko bwikirirya bwetu niki?

¹⁶ Ekihugho kino kikaleka ikyatukalako eriyitunda hakuhi na Yehova. Abandu bangyi bikirirye ngoko oMungu syaliho. Kandi kangyi-kangyi, abakaghana oMungu bakabya nga batsemire omo ngebe. Omughulu tukalangira emyatsi eyiri ng’eyo, obwikirirya bwetu banganalengwako. Nomo sitwangatsuka eribugha tuti oMungu syaliho, twanganatsuka eritikatikira obuwatikya bwiwe. Omuhandiki w’ Esyonyimbo 73 naye mwanayowa atya oko mughulu mulebe. Mwalangira abatesikaya oMungu ababya bamutimbireko nga bane n’amaisa awuwene. Ekyo mukyaleka inatsuka eriyibulya nga nina ky’amenge erisighala mutaleghula oko Mungu.​—Esy. 73:11-13.

17. Ekyangatuwatikya erisighala bataleghula oko Yehova niki?

¹⁷ Ekyawatikaya omuhandiki w’esyonyimbo eribindula amalengekania wiwe niki? Mwalengekania kutsibu oko ebikahikira abakaghana eriyiketera Yehova. (Esy. 73:18, 19, 27) Kandi mwalengekania oko ndundi eyo abakakolera oMungu bakabana. (Esy. 73:24) Netu twanganalengekania oko miyisa yosi eyo Yehova abirituha n’eriyibulya engebe yetu nga y’endisosa yiti nga sitwabya Bimiri ba Yehova. Twamabya tukibuka busanaki kyuwene erikolera Yehova, ekyo ikikendituwatikya erisighala bataleghula okw’iye. Neryo ng’omuhandiki w’esyonyimbo, netu itwanganabugha tuti: “Nikwa ingye, ni kibuya eribya hakuhi [n’oMungu]!”​—Esy. 73:28.

18. Busanaki situtolere eryubaha ebiro ebikasa?

¹⁸ Twanganakinda obuli buligho obukatuhikira omo biro by’omwiso bino kundi tuli “baghombe b’oMungu oyuliho.” (1 Tes. 1:9) OMungu wetu ni mundu oyuliho oyukawatikaya abakamuramaya biro byosi. Mwawatikya abaghombe biwe ba kera, netu munabwire ane netu. Hano ho sesene tukendihikirwa n’eryaghalwa rinene eritelyatabya oko kihugho. Aliwe Yehova syenditulekerania. (Isa. 41:10) “Ekyo kikaleka itwatasagha, neryo itwatoka eribugha tuti: ‘Yehova ni muwatikya waghe, sinendisyasagha.’”​—Ebr. 13:5, 6.