OMWTSI W’ERIGHA 23
OLWIMBO 28 Eribya mwira wa Yehova
Yehova anzire itwabya bagheni biwe
“[Ehema yaghe] yasyabya haguma nabo. Nage nasyabya [Mungu] wabo.”—EZEK. 37:27.
ENZUMWA NGULU:
Erituwatikya eriminya eribya bagheni omo hema y’oMungu nga ni bugha ambuki kandi ngoko akateghaya abagheni biwe.
1-2. Abaghombe ba Yehova bataleghula bawite olusunzo lwahi?
OMUNDU amabikubulya ati, Yehova nindi okw’iwe? Wanganamusubirya utiki? Alinga iwangamusubirya uti, ‘Yehova ni Tata waghe ni Mungu waghe kandi ni Mwira waghe.’ Hane awandi mena w’erisikya ogho wanganahulamo Yehova. Aliwe wanabirilengekania eribugha uti Yehova abirikukokya omo hema yiwe?
2 Omwami Daudi mwasosekania obwira obuli omo kati-kati ka Yehova n’abaramya biwe bataleghula ng’obwira obuli omo kati-kati k’omwinyenyumba n’abagheni biwe. Daudi mwabulya ati: “[Yehova], nindi wasyikala omo hema yawe kwehi? Nindi asyikala eSioni, ekitwa kyawe kibuyirire, kwehi?” (Esy. 15:1) Ebinywa ebi ebyasondolawa n’ekirimu kibuyirire bikatukanganaya ngoko twanganabya bagheni ba Yehova omo hema yiwe, ni bugha ambu eribya bira biwe. Olo ni lusunzo lunene!
YEHOVA ANZIRE ITWABYA BAGHENI BIWE
3. Nindi yo wabya mugheni w’erimbere wa Yehova, kandi Yehova mwayowa ati haghuma n’omugheni wiwe oyo?
3 Embere Yehova ahangyike ebindu byosi, abya iyuwene. Aliwe oko mughulu mulebe Yehova mwahangyika Mughala wiwe, ekyusa kiwe. Yehova abya mwinyenyumba oyukakokaya omugheni wiwe w’erimbere omo hema yiwe, kandi mwatsema kutsibu erikola atya. EBiblia yikatukanganaya ngoko Yehova “mwanza kutsibu” Mughala wiwe. N’omugheni wiwe w’erimbere naye, ‘mwatsema emigulu yosi embere [sya Yehova].’—Misyo 8:30.
4. Ni bandi bahi abo Yehova akokaya eribya bagheni omo hema yiwe?
4 Neryo Yehova mwahangyika n’abamalaika, nabo mubakokibwa eribya abagheni biwe. EBiblia yikahula abamalaika mo ‘abagala [b’oMungu]’ kandi yikakanganaya ngoko abamalaika bakabya n’obutseme eribya haghuma na Yehova. (Yobu 38:7; Dan. 7:10) Omo myaka mingyi, ebihangyikwa by’oMungu by’obunya-kirimu bisa byo byabya bagheni ba Yehova. Enyuma, mwahangyika n’abandu batoke eribya bagheni biwe. Ebiro bikalaba, Enoko, Noa, Abrahamu na Yobu mubabya bagheni biwe abo abya anzire kutsibu. EBiblia yikakanganaya ngoko babya bira ba Yehova kundi ‘mubalendera haguma’ naye.—Enz. 5:24; 6:9; Yobu 29:4; Isa. 41:8.
5. Ni mwatsi wahi ogho twangigha omo buminyereri obukabanika omo Ezekieli 37:26, 27?
5 Emyaka yikalaba, Yehova mwalola embere erikokya abira biwe eribya bagheni biwe. (Soma Ezekieli 37:26, 27.) Ng’eky’erileberyako, obuminyereri bwa Ezekieli bukatwighisaya ngoko, oko kwenene oMungu anzire abaramya biwe bataleghula ibabya n’obwira obunokire haghuma naye. Akalagha erikola “endagano eyʼobuholo haguma nabo.” Obuminyereri obu bukakanaya oko mughulu Yehova ahira oko baramya biwe abawite amaha w’erisyaya elubula, n’abawite amaha aw’erisyabya hano oko kihugho bakedisyabya omo bughuma omo hema yiwe y’ekisosekanio nge “kihangulo kighuma.” (Yoh. 10:16) Ekyo kinemukoleka munabwire!
NOMO TULI HAYI, OMUNGU AKATUTEGHAYA
6. Omundu akabya mugheni omo hema ya Yehova mughulu wahi, n’ehema eyo yikabanika hayi?
6 Kera ehema y’omundu ini mwanya w’eriluhukiramo kandi iyikamuteghaya oko mbula, omwisi, n’ebindi. Neryo omugheni inyakayilindirira okw’iteyibwa amabikokibwa omo hema. Omughulu tukaherera engebe yetu oko Yehova, tukabya bagheni omo hema yiwe ey’ekisosekanio. (Esy. 61:4) Tuwite akalyo kanene ak’obunya-kirimu kandi tuwite obwira n’abosi ababiriligha eribya bagheni ba Yehova. Aliwe ehema y’oMungu y’ekisosekanio siyiri omo mwanya mughuma musa. Kwamuhwa, wabirilenderera omo bindi bihugho, ukayahindana oko muhindano munene, neryo muwahindanayo abandi bandu abakatsema eribya omo hema ya Yehova. Ehema ya Yehova yikabanika ehosi-hosi eyo abaghombe biwe bataleghula bakabanika.—Erib. 21:3.
7. Tukaminya tuti ngoko abaghombe ba Yehova ababirihola bakine bagheni omo hema yiwe? (Ulebaye n’epitsa.)
7 Tubughe tutiki oko baghombe ba Yehova bataleghula ababirihola? Nina ky’amenge eribugha tuti nabo bakine bagheni omo hema ya Yehova? Inga! Busanaki? Kundi Yehova akinibukirebo. Yesu mwabugha ati: “Nikwa Musa akakanganaya ngoko abaholi bakendisyalubuka. Omo mwatsi w’ekisaka ekyakako omuliro, akahula Yehova mo ‘Mungu wa Abrahamu, Mungu wa Isaka, na Mungu wa Yakobo.’ Iye ni Mungu w’abaliho, si Mungu w’abaholi; kusangwa okw’iye, abosi baliho.”—Luka 20:37, 38.
Nibya n’abaghombe bataleghula ba Yehova ababirihola bakine bagheni b’omo hema yiwe (Ulebaye enungu 7)
EMIYISA EYO TUKABANA N’EBYO TWANGAKOLA TUTOKE ERIBYA BAGHENI BA YEHOVA
8. Erisighala omo hema ya Yehova kikatuletera ndundi syahi?
8 Ngoko ehema yanganabya mwanya w’eriluhukiramo kandi yanganateya oko mwisi, embula n’oko bindi, kutya n’ehema ya Yehova yikateghaya abaghombe biwe oko bindu ebyangatsandya obwira bwabo haghuma naye n’erihabo amaha w’omo biro ebikasa. Omughulu tukasighala hakuhi na Yehova, Sitani syangatukolako omwatsi owangatuhutalia kera na kera. (Esy. 31:23; 1 Yoh. 3:8) Omo kihugho kihya-kihya ekikasa, Yehova akendisyalola embere eriteya abira biwe bataleghula okw’ebyosi ebyangabahutalya bunya-kirimu, aliwe kandi n’oko luholo.—Erib. 21:4.
9. Yehova anzire abagheni biwe ibayighendya bati?
9 Ni lusunzo lunene eribya mugheni omo hema ya Yehova, kundi twanganabya n’obwira obuwene haghuma naye kandi obukendisyamala kera na kera. Neryo twamanza erilola embere eribya bagheni biwe, litolere itwayighendya tuti? Omughulu ukabirikirawa omo nyumba y’omundu mulebe, ukanza uti ngambe iwakola emyatsi eyangatsemesya omwinyenyumba eyo. Ng’eky’erileberyako, anganakusaba erilusya ebiryato embere sy’eringira omwiwe, naghu ighukendiligha. Ko bine bitya n’oko banzire erilola embere eribya bagheni omo hema ya Yehova. Ngambe ibaminya ebyo Yehova akabasaba. Olwanzo lwetu oko Yehova lukatukuna erikola ngoko twangatoka “erimutsemesya ndeke-ndeke.” (Kol. 1:10) Ni kwenene Yehova ni mwira wetu aliwe kandi ni Mungu wetu na Tata wetu uyutolere olukengerwa lwetu. (Esy. 25:14) Silitolere tukabirirwa omwatsi oyo n’ahake kandi mughulu wosi ngambe itwabya tukamusikya kutsibu. Erimusikya kutsibu lyanganatuwatikya eritendikola emyatsi eyo syanzire. Mughulu wosi twanzire “erirendera [n’oMungu] n’eriyikehya.”—Mika 6:8.
YEHOVA MWAKOLERA ABAISRAELI BUTSIRA KASOLOLO
10-11. Niki kyo kikakanganaya ngoko Yehova mwakolera Abaisraeli butsira kasololo omo mbwarara ye Sinai?
10 Yehova syalisolola abagheni biwe. (Rom. 2:11) Ngoko Yehova akolera Abaisraeli omo mbwarara ye Sinai kikatukanganaya ndeke-ndeke ngoko syawite akasololo.
11 Enyuma w’erilusya abandu biwe omo bukobe bwe Misri, Yehova mwahiraho abahereri batoke erimukolera omo tabernakulo. Mwasombola n’abalawi eribya bakakola oko yindi mibiiri omo hema eyo. Yehova mwanateya kutsibu ababya bakakolera oko tabernakulo kutse ababya hakuhi nayo kulenga ngoko abya akateya abandi? Mwatakola atya! Yehova syawite akasololo.
12. Ni myatsi yahi yo yikaleka itwaminya ngoko Yehova mwatasolola Abisraeli? (Eriluayo 40:38) (Ulebaye n’epitsa.)
12 Obuli Muisraeli, nomo abya akakolera omo hekalu kutse iyehe, kutse nomo abya ikere ehali nayo kutse hakuhi nayo, abya n’akanya ak’eribya mwira wa Yehova. Ng’eky’erileberyako, Yehova mwakola ekyosi-kyosi ekihanda kyosi kye Israeli kitoke erilangira ekitiko-tiko ky’ekitu n’enduyi y’omuliro ebyabya bikabya endata oko hema. (Soma Eriluayo 40:38.) Ekitu ikikabya kyabilua oko hema n’eritsuka erighenda, nibya n’abali ehali oko hema ibakalangirakyo, neryo ibakatsuka erikuma-kuma ebindu byabo n’erihimbula amahema wabo batoke erighenda kughuma n’ekihanda kyosi. (Emig. 9:15-23) Abosi ibakowa omulenge w’esyongunga ibiri esy’efeza esyabya sikabakangania ngoko batolere eritsuka olughendo. (Emig. 10:2) Kwesi omundu erikala hakuhi n’ehema sikyabya sikasonda eribugha kiti yuwite obwira obuwene na Yehova kulenga abikere ehali kuyo. Aliwe obuli Muisraeli abya n’akanya ak’eribya mugheni wa Yehova n’eriyiketera ngoko akendimusondola n’erimuteya. Kutya na munabwire nomo twikere hayi oko kihugho, Yehova atwanzire, atutsomene kandi akatuteghaya.
Ehema eyabya omo kati-kati k’ekambi iyikakanganaya ngoko Yehova syawite akasololo (Ulebaye enungu 12)
EBY’ERILEBERYAKO BYA MUNABWIRE EBIKAKANGANAYA NGOKO YEHOVA SYAWITE AKASOLOLO
13. Na munabwire, Yehova akakanganaya ati ngoko syawite akasololo?
13 Munabwire abangyi b’oko Bimiri ba Yehova bikere hakuhi n’obwikalo bukulu kutse hakuhi n’ebiro ey’Ebeteli. N’abandi banemukolera omo myanya eyo. Ekyo kikabaha akanya ak’erikola oko mibiiri eyikakoleka omo myanya eyo, nibya n’erihindana kibiri-biri n’abakatusondola. Aliwe abandi ni balebya b’omutimbo kutse bali omo yindi mibiiri mbiriri-mbiriri y’omughulu wosi. Wamabya isighuli oko bandu abo twamahula abo, uminye ngoko naghu une mugheni wa Yehova kandi akwanzire. Akwasi ndeke kandi akakuha ebyosi ebyo ulaghireko. (1 Pet. 5:7) Yehova akaha abandu biwe bosi akalyo k’obunya-kirimu, obusondoli n’obuteya obo balaghireko.
14. Ni kindi kyahi kyo Yehova abirituha ekikakanganaya ngoko syawite akasololo?
14 Ekindi ekikakanganaya ngoko Yehova syawite akasololo munabwire ni busana abiriha obuli mundu omo kihugho kyosi akanya ak’eribana eBiblia. Oko nzuko Ekinywa ky’oMungu kibuyirire mukyahandikwa omo mibughe isatu: Ekiebrania, Ekiaramu n’Ekigiriki. Neryo ekyo kinasondire eribugha kiti abanganasoma eBiblia omo mibughe eyisatu eyo bali n’obwira obuwene n’oMungu kulenga abandi? Iyehe, sibiri bitya.—Mat. 11:25.
15. Ni kindi kyahi ekilebirye eBiblia ekikakanganaya ngoko Yehova syawite akasololo? (Ulebaye n’epitsa.)
15 Yehova syalitukokaya eribya bira biwe kundi mutwasoma akalasi kanene kutse kundi tunasi emibughe eyo eBiblia yatsuka erihandikwamo. Yehova akaha amenge wiwe oko bandu bosi omo kihugho butsira oko abasoma kanene basa. Ekinywa kiwe eBiblia kyabiribindulwa omo mibughe mingyi, abandu bomo kihugho kyosi batoke eribana endundi omo makangirirya awakabanika mukyo n’eriminya ngoko bangabya bira biwe.—2 Tim. 3:16, 17.
EBiblia eribindulwa omo mibughe mingyi kikakanganaya kiti ngoko Yehova syawite akasololo? (Ulebaye enungu 15)
“USIGHALE” MUGHENI WA YEHOVA
16. Ngoko kiri omo Emibiiri 10:34, 35, ni byahi byo twangakola tutoke erisighala bagheni ba Yehova?
16 Ni lusunzo lunene erikokibwa na Yehova mo mugheni omo hema yiwe ey’ekisosekanio. Sihali oghundi uyukakokaya abandu n’olukogho, olwanzo lunene kandi butsira bughemu nga Yehova. Kandi syawite kasololo akakokaya obuli mundu butsira eritsomana nga ni mulume kutse mukali, eyo abutirawa, eyo akulira, akalasi ako asoma, erangyi y’engobi yiwe, ekihanda kiwe, kutse emyaka yiwe. Nomo bine bitya, Yehova akakokaya abakamowa basa.—Soma Emibiiri 10:34, 35.
17. Ni hayi aho twangabana eyindi myatsi eyangawatikya omundu eribya mugheni omo hema ya Yehova?
17 Omo Esyonyimbo 15:1, Daudi mwabulya amabulyo ano: “[Yehova], nindi wasyikala omo hema yawe kwehi? Nindi asyikala eSioni, ekitwa kyawe kibuyirire, kwehi?” Neryo kandi Yehova mwakolesya Daudi erisyasubirya oko mabulyo ayo omo Esyonyimbo 15. Omwatsi owakwamire akendikania oko myatsi milebe eyo twangakola tutoke eritsemesya Yehova n’erisighala bira biwe.
OLWIMBO 32 Ubye oko luhande lwa Yehova!
