Amabulyo erilua oko basomi betu
“[Omukali]” oyukanibweko mo Isaya 60:1 nindi, kandi ‘akahangana,’ ati ‘n’erikolerya’?
Isaya 60:1 ikabugha yitya: “Hangana, [mukali] ukoleraye, kusangwa ekyakakala kyawe kyamasa, nʼolukengerwa [lwa Yehova] lwabirikuhulukira.” Hano “omukali” oyo akakanganaya e Sioni kutse e Yerusalema, ow’abya muyi munene we Yuda oko mughulu oyo. a (Isa. 60:14; 62:1, 2) E Yerusalema yo yabya yikahanganira emyatsi y’ekihanda kyosi kye Israeli. Ebinywa bya Isaya ebyo, bikaleka itwayibulya amabulyo abiri ano: Ery’erimbere, ni mughulu wahi wo Yerusalema ‘ahangana’ n’erikolerya omo nzira y’ekisosekanio, kandi hayi? Ery’akabiri, Obuminyereri bya Isaya bunawite erindi bererera rinene ry’oko mughulu wetu?
Ni mughulu wahi wo Yerusalema ‘ahangana’ n’erikolerya oko nzira y’ekisosekanio, kandi hayi? Omo myaka 70 eyo Abayahudi babugha oko bunyewa mwe Babiloni, e Yerusalema n’ehekalu mubyasighala kihumya. Abamedi n’Abapersia babere bakinda Abababiloni, Abaisraeli ababya bikere omo biharo mbiriri-mbiriri mubahabwa obwiranda obw’erisuba ewabo eriyatasyasubya eriramya ry’erire. (Ezra 1:1-4) Eritsuka oko 537 E.M.W., abataleghula abasighala ab’omo bihanda byosi 12 nabo mubasubula. (Isa. 60:4) Mubatsuka eriherera Yehova y’amahere n’erikola ebiro bikulu, n’erihimba buhya ehekalu. (Ezra 3:1-4, 7-11; 6:16-22) Neryo kandi olukengerwa lwa Yehova mulwatsuka erikolerya buhya e Yerusalema, ni bugha ambu mubatsuka erikolerya abandu biwe. Nabo mubabya kyakakala ky’ekisosekanio oko bihanda ebyatabya byasi Yehova.
Aliwe, obuminyereri bwa Isaya mubwataberera obosi oko mughulu oyo. Abangyi b’oko Baisraeli mubatalola embere erisikya oMungu. (Neh. 13:27; Mal. 1:6-8; 2:13, 14; Mat. 15:7-9) Enyuma, mubaghana na Masiya, Yesu Kristo. (Mat. 27:1, 2) Omuyi we Yerusalema n’ehekalu yayo mubyatsandibwa ery’akabiri oko 70 M.E.
Yehova abya inyabiribugha embere ngoko ekyo kikendisyabya. (Dan. 9:24-27) Oko kwenene, sikyabya omwisonda rya Yehova, e Yerusalema y’oko kihugho yiberereraye obuli mwatsi w’omo buminyereri bwa Isaya esura 60.
Obuminyereri bya Isaya bunawite erindi bererera rinene ry’oko mughulu wetu? Inga, aliwe bunemuberera oko ghundi mukali w’ekisosekanio—“E Yerusalema y’endata.” Akanania kuyo, omukwenda Paulo mwahandika ati: “Ni mama wetu.” (Gal. 4:26) E Yerusalema y’endata ni kitsweka ky’elubula eky’endondeka y’oMungu eyirimo ebihangyikwa ebitaleghula eby’obunya-kirimu. Abana biwe, bahiriremo Yesu n’Abakristo 144 000 abahirirweko amaghuta, abawite amaha w’erisyaya elubula ng’omukwenda Paulo. Abakristo abahirirweko amaghuta kye “kihanda kibuyirire”—“e Israeli y’oMungu.”—1 Pet. 2:9; Gal. 6:16.
E Yerusalema ey’endata ‘muyahangana’ ‘n’erikolerya’ yiti? Mwakola atya erilabira abana biwe b’oko kihugho abahirirwe kw’amaghuta. Langira ngoko ebyabahikira bisosene n’ebyabughawa omo buminyereri bwa Isaya esura 60.
Abakristo abahirirye kw’amaghuta ‘mubahangana’ erilua omo mwirimya w’ekisosekanio ogho bayamo omughulu abakayisamambula oko bwikirirya mubakanyirira enyuma sy’abakwenda erihola. (Mat. 13:37-43) Oko mughulu oyo mubabya nga bali omo bunyewa bwa Babiloni Mukulu, ni bugha ambu ebisomo byosi by’amabehi. Mubasighala omo bunyewa erihika “oko biro by’enduli y’ekihugho,” ebyatsuka oko 1914. (Mat. 13:39, 40) Enyuma hake, oko 1919, mubatasyabya bwiranda neryo mubalw’ibatsuka erikolerya ekyakakala ky’obunya-kirimu bakatulira engulu mbuya y’Obwami. b Omo myaka eyakwama erihika munabwire, abandu erilua omo bihanda byosi babiringira omo kyakakala ekyo, nibya n’abasighalira be Israeli y’oMungu, abakaghulawamo “abami” omo Isaya 60:3.—Erib. 5:9, 10.
Omo biro ebikasa, Abakristo abahirirweko amaghuta bakendisyakolerya omo lulengo lunene ekyakakala erilua oko Yehova. Bati? Bakabya babihola, bakabya b’oko “e Yerusalema Nyihya-Nyihya,” kutse omulunga wa Kristo, abandu 144 000 abakakola ng’abami n’abahereri.—Erib. 14:1; 21:1, 2, 24; 22:3-5.
E Yerusalema Nyihya-Nyihya ikendisyabya y’omughaso munene omwiberera rye Isaya 60:1. (Linganisaya Isaya 60:1, 3, 5, 11, 19, 20 na Eribisulirwa 21:2, 9-11, 22-26.) Ngoko e Yerusalema yo yabya bwikalo bukulu bwe guvernema ye Israeli ya kera, kutya ne Yerusalema Nyihya-Nyihya na Kristo, bo basyabya e guvernema ey’ekihugho kihya-kihya. E Yerusalema Nyihya-Nyihya “ikakima erilua elubula ew’oMungu” yiti? Omwikola emyatsi eyikawatikaya erikokotya ekihugho. N’abandu abasaghire oMungu erilua omo bihanda byosi basyalendera omo “kyakakala kyagho.” Nibya sibendisyasyakola erilolo nibya erihola. (Erib. 21:3, 4, 24) Oko ndulya, omughulu “w’eritasyasubya emyatsi yosi mo mihya-mihya,” ngoko Isaya n’abandi baminyereri babugha akindisyahikerera. (Emib. 3:21) Eritasyasubya emyatsi mo mihya-mihya omo nzira nene eryo mulyatsuka omughulu Kristo abya Mwami kandi rikendisyahwa oko mwiso y’obutabali bwiwe bwe miaka 1 000.
a Omo Isaya 60:1; Embindula y’ekihugho kihya-kihya yikakolesaya ekinywa “omukali” omo mwanya we kinywa “Sioni,” kutse “Yerusalema,” kundi ekinywa ky’Ekiebrania “hangana” n’ekinywa “ukoleraye” bikakanaya oko mukali. Yo bakabwira bati ekyakakala “kyawe.”
b Eritasyasubya emyatsi mo mihya-mihya omo nzira y’obunya-kirimu eryabya oko 1919 naryo rinakanibweko omo Ezekieli 37:1-14, n’omo Eribisulirwa 11:7-12. Ezekieli mwabugha embere oko mwatsi w’eritasyasubya emyatsi mo mihya-mihya omo nzira y’obunya-kirimu eyilebirye Abakristo bosi abahirirweko amaghuta enyuma w’eribugha mughulu muli omo bunyewa. Obuminyereri ob’omo Eribisulirwa bukakanaya okw’ibutwa ry’ekisosekanio ery’akakuto kake ak’abaghala betu abahirirweko amaghuta abatsuka eritusondola enyuma w’eritenditoka erikolera Yehova yo ndeke-ndeke kundi mubabohwa butsira kosa. Omo 1919, mubayirwamo “mughombe mutaleghula n’ow’amenge.”—Mat. 24:45; ulebye ekitabu Ibada Safi ya Yehova Inarudishwa Tena!, aka. 118.
