Omo mwatsi oyo, mutwigha ngoko hane omwatsi w’omughaso munene kutsibu owalebirye obuli mundu n’abamalaika. Omwatsi oyo ry’eriyira erina likulu lya Yehova mo libuyirire. Yehova eribya Mutalabi Mukulu, ni bugha ambu enzira yiwe y’eritabala yo yuwene, omwatsi oyu nagho ni kitsweka ky’oko mwatsi w’omughaso munene. Nibya, n’omwatsi w’omundu erisighala mutaleghula oko Mungu, nagho ni kitsweka ky’oko mwatsi w’omughaso munene.

Busanaki tukahiraho omuwato tuti omwatsi w’omughaso munene ry’erina lya Yehova n’eriyiralyo mo libuyilire? Tulangire ebikaleka bisatu.

Eky’erimbere, Sitani mwabugha muhanda oko rina lya Yehova, omwirima lye Edeni. Eribulyo eryo Sitani abulaya Eva mulyasonda eribugha liti Yehova ni mutsibu n’ebikakiryo ebyo ahiriraho Adamu na Eva sibitolere. Neryo aho Sitani mwabugha ebyo Yehova atabugha, mwalegha oMungu ati ni mubehi. Aho mwatsandirya Yehova y’erina. Eritsuka aho mwabya “Diabolo,” ni bugha ambu “Omutsongeri.” (Yoa. 8:44) Kundi Eva mwikirirya amabehi wa Sitani, mwayisamambula oko Mungu n’ekyo kyamakangania ngoko syanzire oMungu abye mutabali wiwe. (Enz. 3:1-6) Erihika munabwire, Sitani akinalola embere eribugha amabehi oko Yehova akamutsandirya erina. Erikirirya amabehi ayo kikakuna abandu eritendikwama Emighambo ya Yehova. Neryo, abandu b’oMungu bikirirye ngoko eribugha muhanda oko rina ribuyirire lya Yehova kye kitsibu kinene oko byosi. Ekyo kyo kileka kinene ekikaleka abandu ibaghalwa, n’ekikaleka ihabya ebitsibu omo kihugho.

Eky’akabiri, Yehova abiriyisogha kundu erilwira oko rina liwe n’eryeryalyo ebihangyikwa byosi bitoke eribana endundi. Oyo wo mwatsi w’omughaso munene oko Yehova. Kyo kikaleka iniabugha ati: “Nasyimira ekibuyirire kyʼerina lyage inene.” (Ezek. 36:23) Yesu naye mwakangania omwatsi w’omughaso munene ogho abaghombe bosi ba Yehova batolere eribugha omo misabe yabo omughulu abugha ati: “Erina lyawe ribye ribuyirire.” (Mat. 6:9) Kangyi-kangyi eBiblia ikatwibukaya omughaso w’eripipa erina lya Yehova. Tulebaye eby’erileberyako bilebe: “Mupipe erina [lya Yehova] lyʼolukengerwa.” (1 Emy. 16:29; Esy. 96:8) “Mwimbe olukengerwa lwʼerina liwe.” (Esy. 66:2) “Nasyasikya erina ryawe kera na kera.” (Esy. 86:12, NTN62) Omulenge wa Yehova iyuwene-wene mowika ngendo nyingyi. Kiro kighuma, kandi omulenge wa Yehova mowika erilwa elubula oko hekalu e Yerusalema omughulu Yesu abugha ati: “Uwe Tata, ulete olukengerwa oko lina lyawe.” Yehova mwasubirya ati: “Nabirihamyalyo, kandi nasyaswahamyalyo.”​—Yoa. 12:28. a

Eky’akasatu, Biro byosi erisonda lya Yehova ryasyahambana n’erina liwe. Tulebaye erina lya Yehova nga likendisyabya na mughaso wahi enyuma sy’erilengwako ly’omwiso erikendisyabya oko nduli y’Obutabali bwa Kristo obw’emyaka elfu moya. Abamalaika n’abandu basyayowa bati busana n’erina lya Yehova oko mughulu oyo? Eribana ekisubiryo oko ribulyo eryo, twatasyayibukya emyatsi ibiri eyihambene  n’omwatsi w’eriyira erina lya Yehova mo ribuyirire. Emyatsi eyo y’eno; omundu erisighala mutaleghula oko Mungu, na Yehova eribya Mutabali Mukulu. Oko mughulu oyo si ky’endisyasyasabwa oko bandu erikangania obutaleghula bwabo. Bakendisyabya ibabirihika-hikana kundi ibabirilengwako eritosire. Bakendisyabya ibabiribana engebe yʼerikota. Kandi si ky’endisyasyatolera erikangania enzira ya Yehova y’eritabala nga yo yuwene kutse iyehe. Oko mughulu oyo abosi omo lubula n’oko kihugho bakendisyabya omo bughuma n’eriligha eritabalwa na Yehova. Neryo, kandi erina lya Yehova linemwendisyabya iwakine mwatsi w’omughaso munene oko bandu biwe kwe?

Oko mughulu oyo obuli mundu asyabya inyabiriminya ekwenene oko Yehova, erina liwe likendisyabya iryabiribya ribuyirire olosi. Aliwe, erina lya Yehova si ryendisyumbya eribya igho mwatsi w’omughaso munene oko baghombe biwe bosi omo kihugho n’omo lubula. Busanaki? Kundi bakendisyalola embere erilangira Yehova akakola eby’eriswekya. Nga kino: Yesu asyayikehya n’erisubya obutabali bosi oko Yehova, busana n’ekyo, oMungu “asyatabala ndeke oko byosi.” (1 Kor. 15:28) Enyuma waho, abandu bosi oko kihugho basyabya “bwiranda nʼolukengerwa lwʼabana [b’oMungu].” (Rom. 8:21) Neryo Yehova asyaberererya erisonda liwe ery’eribya n’ekihanda kighuma eky’abana biwe b’omo lubula n’oko kighugho ekiri omo bughuma.​—Efe. 1:10.

Enyuma sy’ebyosi ebyo, ekihanda kyosi kya Yehova eky’omo lubula n’eky’oko kihugho kyasyayowa kiti? Oko kwenene, tukendisyalola embere eribya n’engumbu nene y’eripipa Yehova. Omwimbi w’Esyonyimbo ye Dawidi mwasondolwa n’ekirimu erihandika ati: “Mupipe [Yehova Mungu] . . . Mupipe erina liwe lyʼolukengerwa kera na kera.” (Esy. 72:18, 19) Tukendisyalola embere eribana emyatsi mingyi mihya-mihya n’eyikaswekaya, eyikendisyatukuna eripipa Yehova kera na kera.

Erina lya Yehova likamutulako iye wosi. Erina lya Yehova rikatwibukaya olwanzo lwiwe. (1 Yoa. 4:8) Mughulu wosi tukendisyabya tukibuka ngoko Yehova mwatuhangyika busana n’olwanzo, mwateghekania embanulo busana n’olwanzo, kandi busana n’olwanzo, mwakangania enzira yiwe y’eritabala ngoko yitunganene. Aliwe tukendisyalola embere erilangira olwanzo lwa Yehova okw’itwe kera na kera. Tukendisyabya n’omuhwa w’eriyitunda hakuhi na Tata wetu n’eripipa erina liwe libuya kera na kera.​—Esy. 73:28.