Omughulu tukasonda eriyighisya, ngambe itwaminya ebyo tukasonda eriyigha. Aliwe, ritolere itwaminya ngoko, nomo twanganalengekania tuti sihali omwatsi muhya ogho tukendigha, ekyo sikibughire kiti sihakiri emyatsi mihya-mihya eyo Yehova anzire itwigha. Twangakola tuti tutoke erigha emyatsi mihya omughulu tukayighisaya?

Usabe amenge. Usabe Yehova akuwatikaye utoke eriminya ebyo anzire iwowa lino. (Yak. 1:5) Isiwasighira lisa oko ebyo wasi oko mwatsi kutse oko risako rilebe.​—Misyo 3:5, 6.

Ulighire akaghala k’Ekinywa ky’oMungu kakole omo ngebe yaghu. “Ekinywa ky’oMungu kiriho.” (Ebr. 4:12) Neryo omughulu tukasoma “Ekinywa” ky’oMungu kyanganatukangirirya omwatsi muhya-muhya kandi kyanganatuwatikya omo sindi nzira omo ngebe yetu. Aliwe, ekyo kyanganabya omughulu twamalighira Ekinywa ekyo kikole omw’itwe.

Utsemere emyatsi yosi eyo Yehova akatuha busana n’eritukangirirya. Akalyo kiwe k’obunya-kirimu kali ‘ng’erirya inene ryʼebindu ebinunire.’ (Isa. 25:6) Ubye ukasoma n’emyatsi eyo ukalengekanaya uti siyangakutsemesya. Aho ighukendilighira oMungu erikuwatikya eribya omundu oyuwene kandi ighukenditsemera kundu eribya ukayighisya!