1-2. Ekikaleka abandu b’oMungu ibabya n’obutseme niki? (Yakobo 1:22-25)

 YEHOVA haghuma na Mughala wiwe mwanzwa, banzire itwabya n’obutseme. Omuhandiki w’ Esyonyimbo 119:2 akabugha ati: ‘Obutseme buli nʼabakakwama [Yehova] nʼebihano biwe, abakamukenga nʼomutima wabo gosi.’ Yesu mwabugha ati: “Abatsemire, ba bakowa ekinywa ky’oMungu n’erikolakyo!”​—Luka 11:28.

² Itwe baramya ba Yehova tuli bandu b’obutseme. Busanaki? Hali myatsi mingyi eyikaleka; nikwa omwatsi mughuma w’omughaso, ni kundi tukasoma Ekinywa ky’oMungu biro byosi, kandi tukayikasa erikolesya ebyo tukigha.​—Soma Yakobo 1:22-25.

3. Omughulu tukakolesaya ebyo tukigha omo Kinywa ky’oMungu tukabana endundi yahi?

³ Omughulu ‘tukakolesaya ekinywa ky’oMungu’ tukabana ndundi nyingyi. Ng’eky’erileberyako, omughulu tukakolesaya ebyo tukigha omo Kinywa ky’oMungu tukatsemesaya Yehova; n’ekyo kikatuletera obutseme. (Omug. 12:13) Omughulu tukakolesaya ebyo tukigha omo Kinywa ky’oMungu, ekyasondolawa n’ekirimu kiwe, tukabya n’obutseme omo kihanda kyetu, n’eribya n’obwira obuwene haghuma n’abaramya balikyetu. Kwamuhwa, naghu wabiriyilangirira ekyo. Kandi tukayihighula oko syombanza esyo abandu abatekolera Yehova bakabana. Ni kwenene, ko kine ngoko Omwami Daudi abugha. Enyuma sy’erikania oko mughambo, ebyalayiro, n’eritswera lya Yehova omo lwimbo lwiwe, Omwami Daudi mwabughurira ati: “Nʼoyukakwamabyo akabana oluhembo lunene.”​—Esy. 19:7-11.

4. Busanaki sikiribya kyolo mughulu wosi erikolesya ebyo tukigha omo Kinywa ky’oMungu?

⁴ Eribugha ekwenene, sikiribya kyolo mughulu wosi erikolesya Ekinywa ky’oMungu. Nomo tuli n’emyatsi mingyi ey’erikola,  litolere itwayironderya akatambi ak’erisoma n’erigha eBiblia, tutoke eryowa ndeke ebyo Yehova anzire itwakola. Tukanaye oko myatsi milebe eyangatuwatikya erisomakyo butsir’ileka. Kandi tukendikania oko myatsi eyangatuwatikya erilengekania okw’ebyo tukigha, n’ebyo tukasoma, n’erilangira nga twangakolesyabyo tuti omo ngebe yetu.

UYIHIRIREHO AKATAMBI AK’ERIBYA UKASOMA EKINYWA KY’OMUNGU

5. Ni mibiiri mbiriri-mbiriri yahi eyikatulira endambi nene?

⁵ Abimiri ba Yehova bangyi bali n’emyatsi mingyi y’erikola omo ngebe yabo. Tukalabaya endambi nene omw’ikola emyatsi mingyi y’omughaso. Ng’eky’erileberyako, tukakola kutsibu tutoke eribana ebyo tulaghireko, itwe haghuma n’ekihanda kyetu. (1 Tim. 5:8) Abakristo bangyi bakatwanira abakoni, n’eritsunga abatunga babo abakekeluhire. N’obuli mughuma w’okw’itwe atolere inyalanda oko mubiri wiwe, n’ekyo kikasaba endambi. N’eritomeka oko myatsi yosi eyo, tuwite n’eyindi mibiiri omo ndeko. Omubiiri w’omughaso munene ry’erihubirya n’omuhwa. Kundi tuwite emyatsi mingyi ey’erikola, twangabana tuti endambi ey’eribya tukasoma eBiblia biro byosi, erilengakania kuyo ko buli, n’erikolesya ebyo tukigha?

6. Wangayira uti erisoma eBiblia abye mwatsi w’erihira embere omo ngebe yaghu? (Ulebaye n’epitsa.)

⁶ Kundi erisoma eBiblia ni kighuma ky’oko “myatsi y’omughaso munene” oko buli Mukristo, litolere inyabya mwatsi w’erihira embere omo ngebe yetu. (Filip. 1:10) Esyonyimbo sy’erimbere sikabugha sitya oko mundu oyuli n’obutseme: “Nikwa Emigambo [ya Yehova] ni butseme buwe, kandi akiga Emigambo yiwe omo musibo nʼomo kiro.” (Esy. 1:1, 2) Kilangirikire ndeke-ndeke ngoko litolere itwabya tukayihiriraho akatambi akatosire ak’eribya tukasoma. Ni mughulu wahi oghuwene okw’isoma eBiblia? Obuli mundu anganayisombolera endambi eyo anzire. Aliwe, litolere iwasombola endambi eyangakuwatikya eribya ukasoma eBiblia obuli kiro. Mughala wetu oyukahulawamo Victor akabugha  ati: “Nanzire erisoma eBiblia omo tututu. Nomo kikananikalako eribuka omo tututu, oyo wo mughulu owatolere kundi sihalibya emyatsi mingyi eyangalengemerya obwenge bwaghe. Obwenge bwaghe bukabya ibunatulere, kandi ngayiteghereraya emyatsi yo ndeke.” Kwamuhwa naghu ko ukanayowa utya omo tututu. Uyibulaye uti: ‘Ni ndambi yahi eyuwene okw’ingye erisoma eBiblia?’

UBYE UKALENGEKANIA BULI OKW’EBYO UKASOMA

7-8. Ni myatsi yahi eyangaleka itwatabana endundi omo ebyo tukasoma? Teka eky’erileberyako.

⁷ Oko kwenene, omundu anganabya akasoma emyatsi mingyi, aliwe inyatahambayo omo bwenge. Wanabirisoma omwatsi mulebe, neryo iwaluwibirirwa ebyo ukalua okw’isoma? Ekyo kikanahikira abandu bangyi. Eky’obulighe, netu kyanganatuhikira omughulu tukasoma eBiblia. Kwamuhwa twabiriyihiriraho eprograme y’erisoma obuli kiro esyosura silebe sy’eBiblia. Ekyo kyuwene! Twamabiyisogha tutya, litolere itwayikasa erilandamirira ebyo tulyayisogha. (1 Kor. 9:26) Aliwe, twamanza eribana endundi omo ebyo tukasoma omo Biblia, litolere itwakola n’ebindi.

⁸ Terilengekania oko mwatsi ono: Amaghetse ni w’omughaso munene oko ngebe, kutsibu-tsibu amaghetse w’embula. Aliwe, embula yamabiwa nene oko katambi kake, ekitaka kikusulako amaghetse mangyi. Kandi embula y’amabilola embere eriwa, ekitaka sikyangatoka erimera amaghetse ayo, emimea yitoke erikula. Kyuwene embula eritendiwa nene oko katambi kake, kundi ekyo kikawatikaya amaghetse eringira omo kitaka, neryo emimea nayo iyalasa ndeke. Kutya, siritolere itwabya tukasoma eBiblia yo luba-luba, neryo itutabana endambi y’erilengekania buli oko ebyo tukasoma, kutse nibya itutibuka ebyo tulyasoma.​—Yak. 1:24.

9. Twamabya itubeghere erisoma eBiblia yo luba-luba, litolere itwakolaki?

⁹ Kyamabikuhikira iwayeya ukasoma eBiblia yo luba-luba, wangakolaki? Usomeyo lyolo-lyolo. Uyikase erilengekania okw’ebyo ukasoma, kutse okw’ebyo ukalua okw’isoma. Alinga ekyo sikyangakukalako! Wanganayisogha eryongerya oko katambi kaghu k’erigha utoke  eribya ukabana akanya k’erilengekania buli okw’ebyo ukigha. Kutse wanganayisogha erisoma emilondo milebe, neryo endambi eyikendisighalira iwakolesyayo omw’ilengekania buli okw’ebyo wabirisoma. Victor, oyo twabirikaniako akabugha ati: “Omughulu ngasoma eBiblia sindisoma emyatsi mingyi. Eribya ngasoma omo tututu, kikaniwatikaya erilengekania omo musibo wosi okw’ebyo nilyasoma.” Nomo wangasoma bingahi, litolere iwasoma omo mibere eyangakuwatikya eribya ukalengekania buli okw’ebyo ulyasoma.​—Esy. 119:97; ulebaye akasanduku “ Amabulyo w’erilengekaniako.”

10. Teka eky’erileberyako ekikakanganaya nga wangakolesya ghuti ebyo ukigha. (1 Abanya Tesalonika 5:17, 18)

¹⁰ Nomo ukasoma eBiblia mughulu wahi, kutse oko ndambi singahi, ubye ukalengekania nga wangakolesya ghuti ebyo ukasoma. Wabisoma omwatsi mulebe w’omo Kinywa ky’oMungu, yibulaye uti: ‘Nangakolesya niti omwatsi ono lino, kutse omo biro ebikasa?’ Ng’eky’erileberyako, tubughe tuti unemusoma 1 Abanya Tesalonika 5:17, 18. (Soma.) Enyuma sy’erisoma emilondo ibiri eyo wanganimana hake, neryo iwayibulya nga ukanasaba kangyi-kangyi, kandi nga ukanasaba ebikalua oko mutima. Kandi wanganalengekania oko myatsi eyo utolere iwakanganiryamo erisima lyaghu. Kwamuhwa ukendiyisogha erisima Yehova busana n’emyatsi isatu. Nomo wanganalabya akatambi kake ukalengekania oko myatsi eyo ukasoma omo Kinywa ky’oMungu, ekyo kikendikuwatikya eryowa emyatsi yo ndeke, n’erikolesya ebyo kikabugha. Ulengekanaye oko ndundi eyo ukabana wamabya ukalengekania oko myatsi eyo ulyasoma omo Biblia n’eyo wabirisoma. Ekyo ikikendikuwatikya eribya mughombe mubuya wa Yehova. Wamalangira ikitolere eribindula emyatsi milebe omo ngebe yaghu, litolere iwakolaki?

UYIHIRIREHO EBYO WANGATOKA ERIHIKIRA

11. Busanaki ndambi silebe twanganabunika-mutima omughulu tukasoma eBiblia? Teka eky’erileberyako.

¹¹ Omughulu ukasoma eBiblia wanganabunika-mutima, kwamuhwa wamabilangira ihali emyatsi mingyi eyo litolere iwakokotya omo ngebe yaghu. Tuteke eky’erileberyako: Omo busomi bwaghu bwa munabwire, iwabana erihano erikakunga oko kasololo. (Yak. 2:1-8) Neryo, iwalangira ngoko erihano eryo rikulebirye, neryo iwayisogha erikola esyombinduka silebe. Aho, kyuwene! Ekiro ekikwamire, iwasoma erisako erikakanaya oko mughaso w’eribya tukakolesya ebinywa ebyuwene. (Yak. 3:1-12) Neryo iwafumbula ngoko ukabugha ebinywa ebituwene n’eby’eribuna-mutima. Neryo iwayisogha eribya ukakania n’abandi omo nzira eyikabahimba. Ekiro ky’akasatu, obusomi bwaghu bw’eBiblia ibwakuhana oko mwatsi w’eritendibya mwira w’ekihugho. (Yak. 4: 4-12) Neryo iwalangira ngoko litolere iwabya ukasombola ndeke ebyo ukasoma, ebyo ukalangira n’ebyo ukahulikirira. Neryo omo kiro ky’akani, wanganalangira ikikalire erikola esyombinduka syosi esyo.

12. Busanaki siritolere eribunika mutima obusomi bwetu bwe Biblia bwamabitukangania aho tutolere erikola esyombinduka?

¹² Wamalangira ikitolere iwakola esyombinduka nyingyi, ekyo isikyakubuna-mutima. Ekyo kikakanganaya ngoko uwite omutima w’eryangirira ekwenene. Omundu oyukayikehaya kandi oywasi obulema bwiwe, akasoma Ekinywa ky’oMungu inyanemulangira aho atolere inyakokotya omo ngebe yiwe. a Kandi tutolere itwibuka ngoko, eribya “n’emibere mihya-mihya” ni mwatsi ogho litolere itwalola embere erikola. (Kol. 3:10) Ekyangakuwatikya erilola embere erikolesya Ekinywa ky’oMungu niki?

13. Enzira eyuwene y’erikolesya ebyo tukigha yo yahi? (Ulebaye n’epitsa.)

¹³ Omo mwanya w’erisonda erikola esyombinduka omo myatsi yosi eyo ukasoma omo Biblia, wanganayisogha erikola esyombinduka omo mwatsi mughuma kutse ibiri. (Misyo 11:2) Wanganakola kino: Uhandike emyatsi yosi eyo ulyalangira iritolere iwakokotya, neryo usombole muyo m’omwatsi mughuma kutse ibiri eyo ukenditsukirako, n’eyindi ukendisyakokotyayo bolo. Neryo, wangatsukira oko yahi?

14. Oko mwatsi w’erikola esyombinduka, twanganatsuka oko byahi?

¹⁴ Wanganayisogha eritsuka oko ebyo wanganahikira luba. Kutse, wangayisogha erikola esyombinduka oko mwatsi ogho wamalangira ini w’omughaso munene okw’iwe. Wabiminya  ebyo utolere eritsukirako, uronde emyatsi omo bitsapo byetu. Wanganakoleya e Index kutse ekitabu Musaada wa Kutafuta Habari Kwa Ajili ya Mashahidi wa Yehova. Usabe busana n’omwatsi oyo. Usabe Yehova akuhe ‘omuhwa, n’erikuha obutoki bw’erikola.’ (Filip. 2:13) Neryo uyikase erikolesya ebyo wabirigha. Wamabiyikasa erikolesya omwatsi w’erimbere ogho wayihiriraho, ekyo kyanganakuhiramo muhwa w’erikolesya n’oghundi. Oko kwenene, twamabilangira ngoko twamabitoka erikola esyombinduka oko mwatsi mulebe, kutse erikulya omubere mulebe w’Ekikritso, ekyo kyanganatuha omuhwa w’erikola esindi mbinduka. Kandi ikyanganakw’olobera erikola n’esindi mbinduka.

MULEKE EKINYWA KY’OMUNGU ‘KIKOLE EMWISI SYENYU’

15. Abandu ba Yehova basighene bati n’abandi bandu abakasoma eBiblia? (1 Abanya Tesalonika 2:13)

¹⁵ Abandu balebe babirisoma eBiblia yo ngendo nyingyi. Nikwa, kwenene banikirirye ebyo yikakangiriraya kwe? Bakanakolesayayo kutse ikanawatikayabo erikola esyombinduka omo ngebe yabo? Eky’obulighe, abandu bangyi sibalikwama amahano w’eBiblia. Aliwe, abandu ba Yehova ibo, sibali batya! Nga Bakristo b’oko karne k’erimbere, tukaligha eBiblia ‘ngoko yiri kwenene-kwenene, ni bugha ambu, ekinywa ky’oMungu.’ Kandi tukayikasa erikangania ngoko inemukola omo ngebe yetu.​—Soma 1 Abanya Tesalonika 2:13.

16. Niki kyo kyangatuwatikya eribya tukakolesya Ekinywa ky’oMungu?

¹⁶ Mughulu wosi si kyolo erisoma n’erikolesya Ekinywa ky’oMungu. Kyanganatukalako eribana akatambi k’erisomakyo. Kutse, twanganasomakyo luba-luba, n’eritendibana akatambi k’erilengekania kukyo ko buli. Kutse, twanganabunika-mutima omw’ilangira ngoko hane emyatsi mingyi eyo litolere itwakokotya. Nomo ebyosi ebyo bikalire, wanganatoka erisoma Ekinywa ky’oMungu. Yehova akendituwatikya eritoka. Kwesi, tuyisoghe kundu eriligha obuwatikya bwa Yehova n’eribya bandu abakakolesaya Ekinywa ky’oMungu, butsira eribya abahulikiriri bakyo lisa. Oko kwenene, twamabiyikasa eribya tukasoma Ekinywa ky’oMungu n’eribya tukakolesyakyo omo ngebe yetu, itukendibana obutseme bunene.​—Yak. 1:25.