Sihali ekyangaleka itwalengekania tuti kundi abigha 70 mubatabyaho omughulu Yesu atsukisaya Akalyo k’erigholo-gholo k’Omukama, alinga babya isyakilighirebo, kutse babya isibakiri oko luhande lwiwe. Yesu mwanza erilabya akatambi ako haghuma n’abakwenda biwe basa.

Yesu abya alighire abakwenda biwe bosi 12, n’abandi 70. Oko mwanzo mwasombola omo bigha biwe mwabalume 12, abo ahula mo bakwenda. (Luka 6:12-16) Inyane omo muyi we Galilaya “mwabirikira haghuma abakwenda 12” kandi “mwatumabo eriyatula omwatsi w’Obwami bw’oMungu, n’erilamya abakoni.” (Luka 9:1-6) Enyuma, inyane omo muyi we Yudea, Yesu “mwasombola abandi bigha 70. Mwatumabo mo babiri-babiri.” (Luka 9:51; 10:1) Kwesi, Yesu inyawite abigha omo biharo mbiriri-mbiriri. Ibakatulira mubyo omulaghe wiwe.

Alinga Abayahudi ababinduka n’eribya bigha ba Yesu babya ibakinakola Epasaka haghuma n’ebihanda byabo. (Eril. 12:6-11, 17-20) Ekiro ky’oluholo lwiwe kikasonda erihika, Yesu n’abigha biwe mubaya e Yerusalema. Aliwe mwatabirikira abigha biwe bosi ab’omo Yudea, Galilaya, ne Perea bakole Epasaka nene kughuma. Alinga, Yesu abya anzire eribya n’abakwenda biwe basa oko muhindano oyo. Mwababwira ati: “Nanzire kutsibu erirya Epasaka eyi yo haghuma nenyu embere nighalawe.”​—Luka 22:15.

Habya ekyaleka Yesu inyakolaka atya. Yesu endihola nge “Kyana ky’Embuli ky’oMungu oyukalusaya erilolo ry’ekihugho.” (Yoh. 1:29) Ekyo kyendibya omo Yerusalema eyo babya bakaherera oMungu y’amahere. Ekyana ky’embuli ky’Epasaka ikikibukaya Abaisraeli ngoko Yehova asabulabo erilua omo Misri. Aliwe, Yesu eriyiherera mukyaleta endundi nene. Endilusya abandu bosi omo bukobe bw’erilolo n’oluholo! (1 Kor. 5:7, 8) Kundi Yesu mwayiherera, ekyo mukyawatikya abakwenda 12 babye baghuma b’oko fondasyo y’endeko ye Kikristo. (Efe. 2:20-22) Eky’eritsemesya e Yerusalema omuyi mubuyirire yiwite “amabwe 12” awahandikirweko “amena 12 w’abakwenda 12 b’Ekyana ky’Embuli.” (Erib. 21:10-14) Inga, abakwenda bataleghula abo bendibya b’omughaso munene omw’iberererya erisonda ly’oMungu. Ekyo twamabitwighisya ekyaleka Yesu inyanza eribya n’abakwenda biwe 12 basa oko Pasaka yiwe y’omwiso n’oko Kalyo k’erigholo-gholo k’Omukama.

Abigha 70 n’abandi bigha mubatabya haghuma na Yesu oko kalyo ako. Nomo bine bitya, abakwenda abendisighala bataleghula bendibana endundi busana n’omwatsi oyo ogho Yesu atsukisaya, ni bugha ambu, Akalyo k’erigholo-gholo k’Omukama. Abosi b’oko bigha abo, abendihirwako amaghuta enyuma, bendingira omo ndaghane y’Obwami, eyo Yesu akanayako n’abakwenda biwe omo righolo-gholo eryo.​—Luka 22:29, 30.