1-2. (a) Emibere eyo tulimo yisosene yiti n’eya Bayahudi abasuba e Yerusalema? (b) Terikania oko maligho agho Abayahudi bahindana nagho. (Ulebaye akasanduku “ Ebiro bya Hagai, Zekaria, na Ezra.”)

 UKANASAGHA busana n’ebiro ebikasa? Wanganabya imughukaheraya omubiri waghu neryo iwasagha busana n’eribana ebyo ekihanda kyaghu kilaghireko. Wanganahangya-hangya busana n’obuteya bw’ekihanda kyaghu kundi emyatsi y’ekipolitike siyuwene kutse kundi tukendereribawa busana n’omubiri wetu w’eritulira. Unemulaba omo mughuma w’oko myatsi eyi? Kyamabya iko kiri kitya, ukendisubibwa mutima. Ukendibana endundi ukalangira ngoko Yehova awatikaya Abaisraeli ba kera omughulu balaba omo myatsi eyikalire ng’eyi n’erighenda omo kihugho ekyo batabya basi ndeke.

² Abayahudi ababutirawa omo Babiloni n’erikulirayo, kyabya kibasabire obwikirirya bunene erisighania obuteke n’engebe eyuwene eye Babiloni, n’erighenda omo kihugho ekyo batabya basi ndeke. Babere bahika, mukyalw’ikyabakalako eribya bakabana eby’eriha ebihanda byabo; nibya n’emyatsi y’ekipolitike yabya isiyuwene. Mukyakala oko Bayahudi balebe erihira omubiri w’eritasyahimba ehekalu mo mwatsi w’omughaso munene omo ngebe yabo. Neryo oko mwaka 520 E.M.W., Yehova mwatuma abaminyereri babiri, ye Hagai na Zekaria eritasyahira omo Bayahudi m’omuhwa busana n’omubiri. (Hag. 1:1; Zek. 1:1) Ngoko tukendikilangira, omubiri w’abaminyereri babiri aba, mwaluiramo ebighuma ebyuwene. Aliwe hakuhi emyaka 50 enyuma syaho, Abayahudi abasuba e Yerusalema mubatasyalagha okw’isikibwa mutima. Ezra oyo wabya muhandiki w’Emighambo, mwalua  e Babiloni n’eriya e Yerusalema busana n’erisikya mutima abandu b’oMungu, batoke erihira eriramya lya Yehova ly’embere omo ngebe yabo.​—Ezra 7:1, 6.

3. Tukendisubirya oko mabulyo wahi? (Emisyo 22:19)

³ Obuminyereri bwa Hagai n’obwa Zekaria mubwawatikya abandu b’oMungu ba kera, erilola embere eriyiketera Yehova omughulu bendereribawa. Netu munabwire, bwanganatuwakikya tutoke erilola embere eriyiketera obuwatikya bwa Yehova nomo twangahikirwa n’amaligho awali ati omo ngebe yetu. (Soma Emisyo 22:19.) Tukakania oko mulaghe w’oMungu owatekawa na Hagai na Zekaria n’erikania oko ky’erileberyako kya Ezra, tukendisubirya oko mabulyo ano: Abayahudi abasuba e Yerusalaemu, mubayiwata bati busana n’amaligho awabahikira? Busanaki litolere itwahira erisonda ly’oMungu ly’embere omo ngebe yetu omughulu tukalaba omo mighulu eyikalire? Kandi twangayiketera Yehova yo tuti omughulu tukalaba omo myatsi eyikalire?

4-5. Busanaki omuhwa w’Abayahudi ow’eritasyahimba ehekalu mwakeha?

⁴ Abayahudi babere basuba e Yerusalema, mubabya n’ebingyi by’erikola. Mubalw’ibahimba ekiherero kya Yehova n’eritsuka e fondasyo y’ehekalu. (Ezra 3:1-3, 10) Aliwe omuhwa ogho babya nagho oko nzuko mwakeha. Busanaki? Eryongera oko mubiri w’ehekalu, lyabya litolere ibahimba amanyumba wabo-wabo, n’erihera amalima, n’erirondera ebihanda byabo by’akalyo. (Ezra 2:68, 70) Kandi, esyonzighu syabo esyabya sikasondekania erimania omubiri w’eritasyahimba ehekalu, musyabendererya.​—Ezra 4:1-5.

⁵ Kandi Abayahudi abasubula abo, mubabulirwa n’esyofranga, n’emyatsi y’ekipolitike yabya isiyuwene. Ekihugho kyabo kyabya omo butabali bwe Persia. Omwami we Persia ye Kiro abere abihola oko mwaka 530 E.M.W., omwami Cambyse oyo wamusubuka, mwaleta abasuda batoke eriyahamba e Misiri. Alinga omughulu abasuda biwe babya bakaya e Misiri, mubasaba Abaisraeli b’akalyo, amaghetse, n’ah’erikala. N’ekyo mukyatasyakalya kutsibu oko ngebe y’Abaisraeli. Omo butabali bwa Dario I omo Persia mumwabya amaligho mangyi; obutsumbu-tsumbu n’eriyisamambula. Ebyosi ebi mubyaleka Abayahudi bangyi abasuba e Yerusalema ibasagha nga bakendibya bakaha ebihanda byabo by’oki. Busana n’emighulu eyikalire eyo balabamo eyi, Abayahudi balebe mubalengekania bati eyo siyabya ndambi eyitolere eritasyahimba ehekalu ya Yehova.​—Hag. 1:2.

6. Ngoko kiri omo Zekaria 4:6, 7, ni wandi maligho wahi agho Abayahudi bahindana nagho, na Zekaria mwabwirabo atiki?

⁶ Soma Zekaria 4:6, 7. Eritasyongera okw’ibulirwa esyofranga n’emyatsi y’ekipolitike erikala, Abayahudi mubayiyinia okw’endereribwa. Oko mwaka 522 E.M.W., esyonzighu syabo musyakasa obutabali bwe Persia siti bwimanaye omubiri w’eritasyahimba ehekalu. Aliwe Zekaria mwakangania Abayahudi bo ndeke-ndeke ngoko Yehova akendikolesya ekirimu kiwe kibuyirire eribawatikya batoke erilola embere n’omubiri w’erihimba ehekalu nomo hanabya amaligho. Omo mwaka 520 E.M.W., omwami Dario mwalighira Abayahudi ati balole embere n’omubiri w’ehekalu kandi nibya mwahabo n’esyofranga sitoke eribawatikya omo mubiri oyo. Kandi mwabwira abaguvernere ati bawatikaye Abayahudi oko mubiri oyo.​—Ezra 6:1, 6-10.

7. Abayahudi abasuba e Yerusalema babere babihira erisonda ly’oMungu ly’embere, mubabana emiyisa yahi?

 ⁷ Erilabira Hagai na Zekaria, Yehova mwalagha Abayahudi ati akendisyabawatikya bamabihira omubiri w’eritasyahimba ehekalu w’embere. (Hag. 1:8, 13, 14; Zek. 1:3, 16) Babere  babisikibwa mutima n’abaminyereri, Abayahudi abasuba e Yerusalema mubatasyatsuka omubiri w’erihimba ehekalu oko mwaka we 520 E.M.W. nʼeribughagho omo myaka mike okw’itano. Kundi Abayahudi mubahira erisonda ly’oMungu ly’embere nomo banabya n’amaligho, Yehova mwabawatikya kinya-mubiri na bunya-kirimu. Ekyo mukyaleka ibaramya Yehova n’obutseme.​—Ezra 6:14-16, 22.

8. Ebinywa ebiri omo Hagai 2:4 bikatuwatikaya biti eriyitsinga erihira erisonda ly’oMungu ly’embere? (Ulebaye n’ebinywa by’eyikwa.)

⁸ Kundi obulighe bunene bunemuseghera hakuhi kutsibu, ni ky’omughaso munene okw’itwe erikwama ekyalayiro ky’erikola omubiri w’eritulira. (Mar. 13:10) Aliwe itwanganalangira nga kikalire erihira omubiri w’eritulira w’embere busana n’eribulirwa esyofranga kutse twamabya itunemwendereribwa busana n’omubiri oyo. Niki kyo kyangatuwatikya erihira emyatsi y’Obwami y’embere? Tulole embere eriyiketera ngoko “[Yehova] w’emilondo,” b akendisyatuwatikya twamayitsinga erihira emyatsi y’Obwami y’embere omo mwanya w’emyatsi yetu. Neryo sihali ekyo twangasagha.​—Soma Hagai 2:4.

9-10. Oleg na Irina mubayilangirira bati ekwenene y’ebinywa bya Yesu ebiri omo Matayo 6:33?

⁹ Tulebaye eky’erileberyako ky’abatahenie ye Oleg na Irina, c abakakola ng’abapania. Babere babihumira omo kindi kiharo busana n’eriyawatikya endeko eyiriyo, mubaherya omubiri wabo busana n’ekikaho ekyabya omo kihugho kyabo. Nomo banabugha hakuhi omwaka mughuma isibalibabana ekasi eyangabugha mughulu muli, ebiro byosi ibakayilangirira obuwatikya bwa Yehova, n’oko ndambi silebe ibakabana obuwatikya erilua oko baghala n’abali babo. Ekyabawatikaya niki omo mighulu  eyikalire eyo? Oleg, mwahangya-hangya oko nzuko. Akabugha ati: “Eribya n’ebingyi by’erikola omo mubiri w’eritulira, mukyatuwatikya erilengekania kutsibu oko by’omughaso omo ngebe yetu.” Mubayitsinga eribya n’ebingyi by’erikola omo mubiri w’eritula engulu, ibanemusondya n’ekasi.

¹⁰ Kiro kighuma, bakasuba eka wabo bakalua omo mubiri w’eritulira, omuhimbani wabo mwababwira ngoko omwira wabo wa hakuhi mwakaghenda olughendo lw’ebilometre 160 busana n’eribaletera ehitiri hibiri hy’akalyo. Oleg akabugha ati: “Ekiro ekyo, kandi mutwayilangirira ngoko Yehova n’endeko bakatuteghaya kutsibu. Twikirirye ngoko Yehova syangibirirwa n’ahake abaghombe biwe nomo bangalengekania bati emibere eyo balimo siyanguwana.”​—Mat. 6:33.

11. Twamabiyikasa erihira erisonda ly’oMungu ly’embere omo ngebe yetu, itwanganabanaki?

¹¹ Yehova anzire itwahira amalengekania wetu oko mubiri w’eriyira abigha, owakasabula abandu. Ngoko kiri omo  nungu ye 7, Hagai mwasaba abandu b’oMungu batasyatsuka omubiri wabo owabuyirire ow’eritasyahimba ehekalu. Yehova mwalagha ati ‘asyabatsumula’ bamabikola batya. (Hag. 2:18, 19) Netu kutya twanganikirirya ngoko Yehova akendisyatutsumula twamabiyikasa erihira omubiri ogho abirituha w’embere omo ngebe yetu.

12. Busanaki Ezra haghuma n’abaghenda haguma naye e Yerusalema babya balaghire oko bwikirirya obuwatire?

¹² Oko mwaka 468 E.M.W., Ezra mwaghenda haghuma n’ekikumula ky’akabiri eky’Abayahudi erilua e Babiloni bakaya e Yerusalema. Lyabya litolere Ezra n’ababya haghuma naye, ibabya n’obwikirirya obuwatire erikola olughendo olu. Bendilaba omo syondaki esirimo obwiko ibanahekire ehoro nene n’ekwivre eyatekawa busana n’ehekalu. Ekyo kyanganalekire ibahindana n’abarahi. (Ezra 7:12-16; 8:31) Eryongera okw’ekyo, mubalw’ibaminya ngoko nibya ne Yerusalema siyiri obuteya. Omuyi syabyamo abandu banene, n’esyombimbo n’esyongyo sy’omuyi syabya sitolere isyatasyakokotibwa. Twangighaki oko Ezra okw’iwatya eriyiketera lyetu oko Yehova?

13. Ezra mwawatya eriyiketera liwe oko Yehova ly’ati? (Ulebaye n’ebinywa by’eyikwa.)

¹³ Ezra abya inyabirilangira ngoko Yehova akawatikaya abandu biwe omo mighulu eyikalire. Emyaka mingyi embere syaho, oko 484 E.M.W., alinga Ezra abya inikere omo Babiloni omughulu Omwami Ahasuero abugha ati Abayahudi bosi b’omo butabali bwe Persia bitawe. (Esta 3:7, 13-15) Engebe ya Ezra ne y’abandi Bayahudi yabya omo bwiko! Neryo Abayahudi ababya “omo buli [ngabiro]” kutse omo buli provese mubalira n’eritsira akalyo bakasaba Yehova y’obuwatikya. (Esta 4:3) Terilengekania Ezra n’Abayahudi balikyabo nga mubayowa bati omughulu bita ababya bakabugha bati Abayahudi bitawe! (Esta 9:1, 2) Ebyo Ezra ayilangirira omo mighulu eyikalire eyo, byanganabya imubyamuteghekania oko mighulu y’amaligho eyabya embere. Kandi byanganabya ibyo byawataya eriyiketera liwe omo butoki bwa Yehova obw’eriteya abandu biwe. d

14. Mwali wetu mwigha somo yahi omughulu Yehova amuteghaya omo mighulu eyikalire?

¹⁴ Omughulu tukabana obuteya bwa Yehova omo mighulu eyikalire, eriyiketera lyetu okw’iye likawata kutsibu. Tulebaye eky’erileberyako kya Anastasia, oyo wikere omo Matanga Lyuba we Bulaya. Mwaleka omubiri wiwe atoke eritendibya oko luhande lulebe omo myatsi yekipolitike. Akabugha ati: “Eyo yabya ngendo  y’erimbere omo ngebe yaghe eribya butsira esyofranga.” Akatasyabugha ati: “Munahira omwatsi oyo w’omo byala bya Yehova n’erilangira ng’akendiniteya ati omo nzira y’olwanzo. Namasyasyaherya omubiri, sinangasagha n’ahake. Tata waghe w’elubula anemuniteya munabwire, n’omungya akendisyaniteya.”

15. Ekyawatikaya Ezra erilola embere eriyiketera Yehova ni kyahi? (Ezra 7:27, 28)

¹⁵ Ezra mwayilangirira ebyala bya Yehova omo ngebe yiwe. Omughulu abya akalengekania oko ngendo nyingyi esyo Yehova amuwatikayamo kera, ekyo mukyamuwatikya eriwatya eriyiketera liwe okw’iye. Terilengekania oko binywa bino, “ebyala bya [Yehova Mungu waghe byabya] endata waghe.” (Soma Ezra 7:27, 28.) Ezra mwakolesya ebinywa ebiri ng’ebi hakuhi ngendo itano omo kitabu ekikahulawa omo rina liwe.​—Ezra 7:6, 9; 8:18, 22, 31.

16. Twanganayilangirira kutsibu ebyala bya Yehova omo mibere yahi? (Ulebaye n’epitsa.)

¹⁶ Yehova anganatuwatikya omughulu tukalaba omo maligho. Tukayilangirira ebyala bya Yehova omo ngebe yetu, omughulu tukasaba omukulu wetu w’omubiri y’akatambi tutoke erihika oko muhindano munene kutse omughulu tukamusaba tuti abindule eprograme yetu y’omubiri tutoke eribya tukahika oko mihindano yetu yosi. Twanganasweka emyatsi ikuwana ngoko tutalue tuyilindirire. Ekyo kyanganaleka eriyiketera lyetu oko Yehova iryakula kutsibu.

17. Ezra mwakangania ati eriyikehya omo mighulu eyikalire? (Ulebaye n’epitsa y’oko kijalada.)

¹⁷ Omw’iyikehya Ezra iniakasaba obuwatikya bwa Yehova. Omughulu abya akahangya-hangya busana n’ebyo abya atolere erikola, omw’iyikehya Ezra iniakasaba Yehova. (Ezra 8:21-23; 9:3-5) Ebyo Ezra abya akakola, mubyaleka abandi ibabya bakamuwatikya n’erigha obwikirirya bwiwe. (Ezra 10:1-4) Omughulu tukahanga-hangaya kutsibu busana n’ebyo tulaghireko kinya-mubiri, kutse busana n’obuteya bw’ekihanda kyetu, litolere itwasaba Yehova itunikirirye ngoko akendituwatikya.

18. Ekyangatuwatikya eriyiketera Yehova yo kutsibu niki?

¹⁸ Omw’iyikehya twamabisondya obuwatikya bwa Yehova, n’eriligha obuwatikya bw’abaghala n’abali betu, eriyiketera lyetu oko Mungu ilikendikula. Mughulu wosi Erika, mama wa bana basatu, inyakayiketera ngoko Yehova akendimuteya nibya n’omughulu abya akahikirwa n’emyatsi eyikalire. Omo mughulu muke, omumbesa wiwe n’omulume wiwe mwanzwa mubahola. Oko byosi ebyamuhikira, akabugha ati: “Siwangataminya Yehova ng’akendisyakuwatikya ati omo biro ebikasa. Obuwatikya bwanganasa omo nzira y’ekitsumbukirania. Munaminya ngoko Yehova mwasubirya oko misabe  yaghe mingyi erilabira ebinywa n’emikolere y’abira baghe. Namabikanirya abira baghe ebyo ngalabamo, ibangananiwatikya bweghu-bweghu.”

19-20. Twamigha somo yahi oko Bayahudi abataluka erisuba e Yerusalema?

¹⁹ Netu twanganigha esomo y’omughaso oko Bayahudi abataluka erisuba e Yerusalema. Alinga abaghuma ba kubo mubataluka erisubula busana n’erikekeluha, erilwala kutsibu, kutse busana n’emibere eyo ebihanda byabo byabyamo. Nomo bine, babya ibanayiteghekire eriha abasubula b’ebindu ebyo banganalaghako busana n’ehekalu. (Ezra 1:5, 6) Nibya ihamabilaba emyaka hakuhi 19 ekikuto ky’erimbere ikyabirisuba e Yerusalema, kitokekene abasighala e Babiloni babya ibakinatuma ebihembo e Yerusalema.​—Zek. 6:10.

²⁰ Nomo tutetwangatoka erikola ebyosi ebyo twanzire erikola omo mubiri wa Yehova, twanganikirirya ngoko akalangira ebyosi ebyo tukakola erilua oko mutima. Tukaminya ekyo kyo tuti? Omo biro bya Zekaria, Yehova mwabwira omuminyereri wiwe ati akokotaye embita omo horo n’omo kwivre eyo abanyewa ababya omo Babiloni batuma. (Zek. 6:11) “Embita” eyi yendibya “kiminyisyo” busana n’ebihembo byabo ebyabya bikalua oko mutima. (Zek. 6:14) Twanganikirirya ngoko Yehova syendisyibirirwa n’ahake eriyikasa lyetu erikalua oko mutima ery’erimukolera omo mighulu eyikalire.​—Ebr. 6:10.

21. Niki kyo kyangatuwatikya eriyiketera Yehova nomo twangahikirwa naki omo biro ebikasa?

²¹ Butsira n’eritika-tika, tukendilola embere erihindana n’emyatsi eyikalire omo biro by’enduli bino. Kandi nibya emyatsi yanganatsanda kutsibu omo biro ebikasa. (2 Tim. 3:1, 13) Nomo bine, siritolere itwahangya-hangya kutsibu. Wibuke ebinywa ebyo Yehova abwira abandu biwe omo biro bya Hagai: ‘Indi haguma nagu . . . Sigubahe.’ (Hag. 2:4, 5) Netu kutya twanganikirirya ngoko Yehova asyabya netu omughulu tukayikasa erikola erisonda liwe. Twamabikolesya esyosomo esyo twamabigha omo buminyereri bwa Hagai n’obwa Zekaria n’oko ky’erileberyako kya Ezra, itukendilola embere eriyiketera Yehova nomo emyatsi eyikalire yangatuhikira omo biro ebisaka.