1-2. Busanaki twanganayowa Yehova nga syalisubiraya oko misabe yetu?

 “UTSEMERE [Yehova]; Naye akendisyakuha ebyo mutima wawe anzire.” (Esy. 37:4) Oyo ni mulaghe oghuwene kundu! Aliwe twanganalindirira tuti Yehova abye akatuha obuli kindu ekyo tukasaba ky’aho n’aho? Busanaki kyuwene eriyibulya eribulyo eryo? Tukanaye oko by’erileberyako ebikwamire. Mwali wetu oyukiri musimbi, akasaba busana n’eriya oko Kalasi k’Abatuliri b’Obwami. Aliwe emyaka mingyi iyalaba isyalyabirikirwa oko kalasi ako. Mughala wetu oyukiri mulere, akasaba Yehova amulamaye oko bukoni bwiwe obukalire, atoke erikola bingyi omo ndeko. Aliwe obukoni bwiwe ibutalama. Ababuti Bakristo bakasaba bati ngambe omwana wabo inyasighala omo kwenene. Aliwe omwana wabo inyayisogha erileka erikolera Yehova.

² Kwa muhwa naghu wanabirisaba Yehova y’omwatsi mulebe, aliwe suliwatabanagho. Ekyo kyanganaleka iwabugha uti Yehova akasubiraya oko misabe y’abandi butsira eyaghu. Kutse iwanganalengekania uti alinga wabirikola omwatsi mulebe owatuwene. Mwali wetu oyukahulawa mo Janice b mwayowa atya. Iye n’iba wiwe, mubasaba batoke eriyakolera oko Beteli. Akabugha ati: “Nabya nikirirye ngoko sihendilaba mughulu muli tutetwabirikirwa oko Beteli.” Aliwe emyaka mingyi muyalaba, isibalibabirikirwa. Janice akabugha ati: “Munayowa muhanda n’erihangya-hangya. Ingayibulaya nga ni kitsibu kyahi ekyo nabirikolera Yehova. Munasaba kutsibu nitoke eribana obusondoli bwiwe. Busanaki mwatasubirya oko musabe waghe?”

3. Omo mwatsi ono tukendikania okuki?

³ Ndambi silebe, twanganayibulya Yehova ng’akanowa emisabe  yetu. N’abalume bataleghula ba kera, mubanayowa batya. (Yobu 30:20; Esy. 22:2; Hab. 1:2) Ekyangaleka iwikirirya ngoko Yehova akendisubirya oko misabe yaghu niki? (Esy. 65:2) Eritoka erisubirya oko ribulyo eryo, muleke tutsuke twasubirya oko mabulyo ano: (1) Ni myatsi yahi yo twangalindirira oko Yehova? (2) Yehova akanza itwakolaki? (3) Busanaki kyanganatolera itwasaba busana n’eyindi myatsi?

4. Erikwamana na Yeremia 29:12, Yehova akalagha erikolaki?

⁴ Yehova akalagha erihulikirira emisabe yetu. (Soma Yeremia 29:12.) OMungu wetu atwanzire kundi tukamukolera butaleghula, neryo mughulu wosi, akahulikirira emisabe yetu. (Esy. 10:17; 37:28) Aliwe ekyo si bugha ambu akendibya akatuha ekyosi-kyosi ekyo tukamusaba. Hane emyatsi eyo tukasaba aliwe eyo tutetwangabana lino, ikyanganatolera itwalindirira ekihugho kihya-kihya kitsuke erihika imo twabanayo.

5. Yehova akalengekanaya okuki omughulu akahulikirira emisabe yetu? Kanaya.

⁵ Yehova akalangira emisabe yetu nga yihambene yiti n’erisonda liwe. (Isa. 55:8, 9) Erisonda liwe lihiriremo eryusulya ekihugho mw’abandu abali n’obutseme, n’abali omo bughuma, abakamusikaya ng’omutabali wabo. Aliwe Sitani mwabugha ati abandu bamabiyitabala ibibene-bene imo bakendibya n’obutseme bunene. (Enz. 3:1-5) Erikangania ngoko Sitani ni mubehi, Yehova mwalighira abandu eriyitabala ibibene. Aliwe obutabali bw’abandu bwabirileta amaligho mangyi agho tukalabamo munabwire. (Omug. 8:9) Tunasi ngoko lino Yehova syangabughaho amaligho wosi ayo. Amabikola atya, abandu abatikirirye oMungu, ibanganalengekania bati abandu bo banemubughaho amaligho ayo; kandi bati abandu banganatoka eriyitabala ndeke.

6. Busanaki litolere itwikirirya ngoko mughulu wosi Yehova akakola omo lwanzo n’omo nzira eyitunganene?

⁶ Yehova anganasubirya oko misabe mighumerera omo nzira esisighene. Ng’eky’erileberyako, omwami Hezekia abere abilwala kutsibu, mwalemba-lemba Yehova ati amulamaye. Neryo Yehova mwamulamya. (2 Abam. 20:1-6) Aliwe, omughulu omukwenda Paulo alemba-lemba Yehova ati alusaye “erihwa omo mubiri wiwe,” Yehova mwatamulamya. Erihwa eryo, alinga bwabya bukoni bulebe. (2 Kor. 12:7-9) Twatasyalebya n’eky’erileberyako ky’omukwenda Yakobo na Petro. Omwami Herode mwanza erita abosi babiri. Endeko muyasaba busana na Petro na Yakobo. Aliwe Yakobo mwitibwa, Petro iye, mwasabulwa omo nzira y’ekitiko-tiko. (Emib. 12:1-11) Ekyo kyanganaleka itwayibulya tuti, ‘busanaki Yehova mwasabula Petro, aliwe amaleka Yakobo?’ EBiblia siribugha nga ni busanaki. c Litolere itwaminya ngoko esyonzira syosi sya Yehova ‘situnganene.’ (Ebih. 32:4) Kandi tunasi ngoko Petro na Yakobo, abosi babiri, Yehova abya inyanalighirebo. (Erib. 21:14) Ndambi silebe, Yehova anganasubirya oko misabe yetu omo nzira eyo tutalue tulengekenie. Aliwe kundi twikirirye ngoko mughulu wosi ekisubiryo kya Yehova oko misabe yetu kikabyamo olwanzo, n’eritunganene, situlitika-tikira enzira eyo akasombola eritusubiryamo.​—Yobu 33:13.

7. Tukayikakiraya erikolaki, kandi busanaki?

⁷ Tukayikasa eritendilingirirania emibere y’abandi n’eyikuwetu. Ng’eky’erileberyako, twanganasaba Yehova tuti atuwatikaye omo  nzira nyilebe y’embaghane. Aliwe inyatasubirya oko musabe wetu. Aho nyuma, itwaminya ngoko omundu mulebe mwakasa busana n’omwatsi mulebe owasosire owetu. Neryo ikyalangirika Yehova nga mwakasubiraya oko musabe oyo. Mwali wetu oyukahulawa mo Anna mwalaba omo biri ng’ebyo. Mwasaba ati akasere k’omwira wiwe, ye Matthew kalame. Oko mughulu mughumerera oyo, abali betu babiri abakekeluhire, nabo babya ibanakwire akasere. Anna mwasaba kutsibu busana na Matthew n’abali betu babiri abo. Abali betu abo mubalama, aliwe Matthew mwahola. Oko nzuko, mwali wetu Anna mwayibulya abali betu abo nga mubalama kundi Yehova mwakawatikayabo. Kyamabya iko kiri kitya, busanaki mwatasubirya oko misabe yiwe, y’erisaba ati omwira wiwe alame? Kwenene sitwasi ekyaleka abali betu babiri abo ibalama. Aliwe tunasi ndeke-ndeke ngoko Yehova akendisyabughaho amaligho wosi, kandi ali n’engumbu nene y’erilubukya abira biwe ababirihola.​—Yobu 14:15

8. (a) Ngoko kiri omo Isaya 43:2, Yehova akatuwatikaya ati? (b) Omusabe akatuwatikaya ati omughulu tukalaba omo maligho? (Ulebaye evideo Sala Inatusaidia Tuvumilie.)

⁸ Yehova asyatuwatikya mughulu wosi. Akabya Tata wetu w’olwanzo, Yehova syalyanza akalangira tukaghalwa. (Isa. 63:9) Nomo bine bitya, syalikakiraya amaligho wetu wosi, awanganasosekanibwa n’esyonyusi kutse n’ebirimi by’omuliro. (Soma Isaya 43:2.) Aliwe akalagha ati akendituwatikya “erikindagho.” Kandi syangalighira n’ahake amaligho agho tukalabamo inyaleka itwataluka erimukolera. Kandi Yehova akatuha ekirimu kiwe kibuyirire ky’obutoki, kitoke erituwatikya eriyiyinia. (Luka 11:13; Filip. 4:13) Ekyo kyanganaleka itwikirirya ngoko mughulu wosi Yehova akendituha ekyo tulaghireko kundu tutoke eriyiyinia n’erisighala bataleghula okw’iye. d

9. Erikwamana n’erisako lya Yakobo 1:6, 7, busanaki litolere itwayiketera ngoko Yehova akendisyatuwatikya?

⁹ Yehova akanza itwayiketera iye. (Ebr. 11:6) Ndambi silebe, twanganalangira nga sitwangatoka erilwa n’amaligho wetu. Nibya twanganatsuka eritika-tika, Yehova ng’anemwendituwatikya. Aliwe eBiblia ikatubwira ndeke-ndeke ngoko erilabira akaghala k’oMungu ‘twanganasingana’ kutse twanganasinga amaligho. (Esy. 18:29) Neryo omo mwanya w’eribya n’eritika-tika eryo, litolere itwasaba itunikirirye kundu, kandi itunayiketere ngoko Yehova akendisubirya oko misabe yetu.​—Soma Yakobo 1:6, 7.

10. Teka eky’erileberyako ekikakanganaya ngoko twangakola erikwamana n’emisabe yetu.

¹⁰ Yehova akanza itwakola erikwamana n’emisabe yetu. Ng’eky’erileberyako, mughala wetu anganasaba Yehova ati amuwatikaye abane akatambi oko mubiri wiwe atoke erisyahika oko muhindano munene w’ekiharo. Yehova anganasubirya ati oko musabe oyo? Anganaha omughala wetu oyo y’obutubaha obo alaghireko atoke erikania n’omukulu wiwe w’omubiri. Aliwe kikendibya ikikinatolere mughala wetu oyo inyahikira omukulu wiwe w’omubiri n’erisaba ati amulighire erisyaya oko muhindano munene. Lyanganatolera inyamusaba ngendo nyingyi. Nibya anganabwira oghundi mukoli ati akendikola omo biro biwe. Kandi kyamabibya ini ky’omughaso, inyanganaligha erikola omo syondambi esitendilihwa.

11. Busanaki litolere itwasaba butumbya busana n’emyatsi eyikatuhanga-hangaya?

¹¹ Yehova akanza itwasaba kangyi-kangyi busana  n’emyatsi eyikatuhanga-hangaya. (1 Tes. 5:17) Yesu mwakangania ngoko hane emisabe yetu milebe eyo oMungu ate angasubiryako aho n’aho. (Luka 11:9) Neryo isiwalwika! Usabe kangyi-kangyi kandi erilua oko mutima. (Luka 18:1-7) Omughulu tukalola embere erisaba busana n’omwatsi mulebe, tukakanganaya Yehova ngoko omwatsi ogho tukasabira oyo, ni w’omughaso okw’itwe. Kandi tukakanganaya ngoko twikirirye kw’anganatuwatikya.

12. (a) Ni ribulyo lyahi eryo litolere itwayibulya erikwamana n’emisabe yetu, kandi busanaki? (b) Twangakangania tuti ngoko tusikirye Yehova erilabira emisabe yetu? (Ulebaye akasanduku “ Ebyo ngasaba bikanakanganaya ngoko nisikirye Yehova?”)

¹² Twamatendibana ebyo tukasaba omo misabe, litolere itwayibulya amabulyo asatu ano. Ery’erimbere, ‘Ninemusaba busana n’ekindu ekitolere kwehi?’ Kangyi-kangyi, tukalengekanaya tuti tunasi ekyuwene okw’itwe. Aliwe ebyo tukasaba tukalengekania tuti bye by’endundi okw’itwe, byangabula eribya by’omughaso. Twamabya itukasaba busana n’omwatsi mulebe owakalire, hanganabya ihane enzira eyuwene y’erisoha omwatsi oyo kulenga ngoko tukasaba. Kandi emyatsi milebe eyo tukasaba, yanganabula erihambana n’erisonda lya Yehova. (1 Yoh. 5:14) Okw’ekyo, tukanaye oko ky’erileberyako ky’ababuti abo tulyakanayako aho mbere. Mubasaba Yehova bati omwana wabo asighale omo kwenene. Omusabe oyo, mwalangirika ng’atolere. Aliwe Yehova syalikasa omundu wosi-wosi erimukolera. Anzire obuli mughuma w’okw’itwe, erihirako n’abana betu, inyayisombolera erimukolera. (Ebih. 10:12, 13; 30:19, 20) Neryo omo mwanya w’erisaba batya, ababuti abo banganasabire Yehova abawatikaye eritula  oko mutima w’omwana wabo atoke eryanza Yehova n’eribya mwira wiwe.​—Misyo 22:6; Efe. 6:4.

13. Erikwamana n’ Abaebrania 4:16, Yehova akendisyatuwatikya mughulu wahi? Kanaya.

¹³ Eribulyo ly’akabiri, ‘Eno yo na ndambi ya Yehova y’erisubirya oko musabe waghe?’ Twanganalengekania tuti tulaghireko oko kisubiryo ky’oko misabe yetu, kw’aho n’aho. Eribugha ekwenene, Yehova iye akabya inyanasi endambi eyuwene ey’erituwatikyamo. (Soma Abaebrania 4:16.) Twamatendibana ekyo tukasaba ky’aho n’aho, itwanganalengekania tuti alinga Yehova mwakasubiraya ati ‘Iyehe’ oko misabe yetu. Aliwe ekisubiryo kiwe kyanganabya ini, ‘butsira lino.’ Twaterisyalengekania oko mughala wetu mulwana oyo wasaba ati alamibawe oko bukoni bwiwe. Yehova kw’amulamaya omo nzira y’ekitiko-tiko, Sitani anganabughire ati omughala wetu oyo akalola embere erikolera Yehova kundi mwakamulamaya. (Yobu 1:9-11; 2:4) Eryongerako, Yehova abirihiraho endambi y’erisyalamya amakoni wosi. (Isa. 33:24; Erib. 21:3, 4) Nikwa lino, sitwangalindirira Yehova tuti akole ekitiko-tiko eritulamya. Neryo omughala wetu oyo angasabire Yehova ati amuhe akaghala n’obuholo bw’omo mutima atoke eriyiyinia oko bukoni bwiwe, n’erilola embere erikolera oMungu butaleghula.​—Esy. 29:11.

14. Twamighaki oko kyahikira mwali wetu Janice?

¹⁴ Lengekanaya oko ekyahikira Janice, oyo wasaba busana n’eriyakolera oko Beteli. Emyaka itano muyalaba embere aminye ngoko Yehova abirisubirya oko misabe yiwe, aliwe omo yindi nzira. Akabugha ati: “Yehova mwakolesya endambi eyo erinikangirirya n’eriniyira mo Mukristo oyuwene. Nabya nitolere erikulya eriyiketera lyaghe okw’iye. Nabya nitolere inuwania emibere yaghe y’eriyighisya. Kandi nabya nitolere inigha eribya n’obutseme  ehosi-hosi eyo nangakolera Yehova.” Enyuma syaho, Janice na mwira wiwe, mubasabwa erikola omubiri w’omutimbo. Akatasy’ibuka ebyabirilaba, Janice akabugha ati: “Yehova mwasubirya oko misabe yaghe omo nzira eyo natabya niyilindirireko. Mukyanisaba endambi eriminya ngoko ekisubiryo kya Yehova kyabya kihembo ekyuwene kundu. Neryo niri n’obutseme bunene erilangira olwanzo n’obubuya bwiwe.”

15. Busanaki oko sindi ndambi kyanganuwana eritendihira omo misabe yetu mw’ekindu ekyo twanzire ekikyene-kyene? (Ulebaye n’esyopitsa.)

¹⁵ Eribulyo ly’akasatu, ‘Nanganasaba busana n’eyindi myatsi?’ Si kibi erisaba busana n’ekindu ekyo tulaghireko ikikyene-kyene. Aliwe oko sindi ndambi, kyanganuwana eritendihula ekindu ekyo ikikyene-kyene tutoke eriminya ekyo Yehova anzire. Tukanaye oko mwali wetu uyukasaba busana n’eriya oko Kalasi k’Abatuliri b’Obwami. Anzire erighenda oko kalasi ako, atoke erikolera eyiri obwagha bunene. Neryo akasaba ati ngambe alyabirikirawa oko kalasi oko, anganasaba Yehova amuwatikaye eriminya ebyo angakola atoke erikola bingyi omo mubiri wiwe. (Emib. 16:9, 10) Neryo, anganabulya omulebya w’omutimbo omo kiharo kyabo nga mune endeko eyilaghire oko bapainia. Aho akendibya inyamakola erikwamana n’emisabe yiwe. Kutse anganabulya Ebeteli nga ni hayi ho hali obwagha bw’abatuliri bw’Obwami. e

16. Twanganabya n’eriyiketera lyahi?

¹⁶ Twamabilangira ngoko twanganabya n’eriyiketera ngoko Yehova akendisubirya oko misabe yetu omo nzira y’olwanzo n’eyitunganene. (Esy. 4:3; Isa. 30:18) Ndambi silebe, twanganabula eribana ebyo tulyamusaba. Aliwe Yehova syangabula eritsomana emisabe yetu. Kandi syendisyatusighania n’ahake. (Esy. 9:10) Neryo, ulole embere ‘eriyiketera oMungu emighulu yosi,’ umubwire amalighe waghu wosi omo misabe.​—Esy. 62:8.