KIKANAKUKALAKO eribana endambi y’eribya ukigha oko buli yenga? Ukabya wabugha uti ukigha, ukanatsemera erigha kutse kikakuluhaya? Ekyo kikanatuhikira itwe bosi. Aliwe terilengekania oko yindi myatsi eyo tukakola buli kiro, ng’erinaba. Erinaba rikasaba endambi n’eriyikasa, aliwe ukayowa ndeke wabinaba! Erigha eBiblia naryo ryanganaleka iwayowa ndeke kundi Ekinywa ky’oMungu kikasosekanibawa n’amaghetse awakeraya. (Efe. 5:26) Amahano awakwamire anganakuwatikya:

• Uyihirireho eprograme. Eribya ukayighisya Ekinywa ky’oMungu ni kighuma ky’oko ‘myatsi y’omughaso munene’ eyo obuli Mukristo atolere iniabya akakola. (Filip. 1:10) Wamabya isiwanzire eribya ukibirirwa eprograme yaghu, uhandike oko karatasi kw’ekiro n’endambi eyo ukendibya ukigha, neryo uhire akaratsi ako ah’alangirikire, ng’oko luhimbo kutse oko frigo. Kutse uhire ekiro n’endambi eyo y’omo telefone yaghu itoke eribya ikakwibukya esyodakika nyilebe embere endambi yaghu y’erigha ihike.

• Lebaya nga ukendibya ukigha ghuti. Wanzire iwabya ukigha ghuti? Wanganatoka erigha omo mughulu muli? Kutse wangananza eribya ukigha omo syodakika nge, aliwe kangyi-kangyi? Kwesi ulebaye ekyolobire okw’iwe nga ky’ekyahi. Neryo ukole eprograme yaghu ighunemulengekania n’okw’ekyo. Endambi eyo wabiripanga eribya ukigha yamabihika, neryo iwowa obuli nga bulundu, wanganapima erigha omo syodakika 10 sisa. Syanganalangirika nga ni sike, aliwe kyanya iwigha omo syodakika 10 kulenga kw’eritendigha. N’ekindi, wanganabya wabitsuka, neryo ibwa iwabana omuhwa w’erigha omo syodakika nene kulenga esyo.​—Filip. 2:13.

• Ubye ukasombola embere sy’endambi ebyo ukendigha. Wamabya ukasombola ebyo ukendigha omughulu endambi y’erigha yamahika, aho ‘isiwetakolesya ndeke edambi yaghu.’ (Efe. 5:16) Omo mwanya w’erikola utya, terihandika eliste y’emyatsi eyo wanzire erigha. Wamabya ighukanayibulaya eribulyo rilebe oko mwatsi mulebe, handika eribulyo eryo. Awandi mabulyo anganasa omo mutwe ukasonda eribugha erigha, nagho uhandikegho.

• Ubye ukabinduka. Emyatsi yamabya iyamakusaba erihiraho ekindi kiro ky’erigha, kutse iyakusaba erigha omo katambi kake, kutse iyakusaba erigha ebindi ebitalue oko liste lyaghu, ubinduke. Eky’omughaso si ky’ekiro kyaghu ky’erigha, endambi eyo ukighamo, kutse emyatsi eyo ukigha, aliwe eky’omughaso ry’eribya ukigha oko buli yenga.

Tukendibana ndundi nene twamayikasa eribya tukigha oko buli yenga. Obwira bwetu haghuma na Yehova bukendiwata, tukendigha erisoha emyatsi yo ndeke omo ngebe yetu, kandi tukendiyowa ndeke.​—Yos. 1:8.