1-2. Emyatsi ikabya yiti omughulu abandu bakabatisibawa, kandi tukendikania okuki omo mwatsi ono?

 WANABIRILANGIRA abandu abakendibatisibwa? Omughulu bakasubiraya oko mabulyo aw’abiri agho bakababulaya embere sy’eribatisibwa, ukowa omo mulenge wabo ngoko balighire kundu eribatisibwa. Ukalangira ngoko abira babo n’abomo kighanda kyabo batsemire. Omughulu bakalua omo maghetse, abandu bakabanda oko byala ibanatsemire. Amaelfu w’abandu bakabatisibawa oko buli yenga n’eribya Bimiri ba Yehova.

² Naghu wabiribatisibwa? Wamabya ighunemulengekania oko lubatiso uli mughuma w’oko bandu abuwene ab’omo kihugho kibi kino ‘abakasonda-sonda [oMungu].’ (Esy. 14:1, 2) Wamabya mulere kutse mukulu, omwatsi ono akendikuwatikya. Aliwe n’abosi ababiribatisibwa banzire kundu erilola embere erikolera Yehova kera na kera. Kwesi, tukanaye oko myatsi isatu eyikaleka ityanza erikolera Yehova.

3. Busanaki abandu ba Yehova banzire ekwenene n’eritunganene? (Esyonyimbo 119:128, 163)

³ Yehova mwabwira abandu biwe ati “banze ekwenene.” (Zek. 8:19) Yesu naye mwabwira abigha biwe ati basondaye eritunganene. (Mat. 5:6) Erisondya eritunganene nibughambu eribya n’engumbu nene y’erikola emyatsi eyuwene, eyo Mungu akatusaba. Unanzire ekwenene n’eritunganene? Twasi ngoko wanzirebyo. Uponire amabehi n’emyatsi yosi mibi n’eyituwene. (Soma Esyonyimbo 119:128, 163.) Omundu oyo anzire amabehi akigha omutabali w’ekihugho kino ye Sitani. (Yoa. 8:44; 12:31) Ekighuma ky’oko myatsi eyo Sitani akalandamirira ry’eritsandya erina ribuyirire lya Yehova Mungu. Eritsuka oko mulele w’omo Edeni, Sitani anemulalaghania  amabehi oko Mungu wetu. Mwaleka Yehova inabya nga ni mutabali oyutatsomene abandu, oyukaghanira abandu ebindu bibuya. (Enz. 3:1, 4, 5) Amabehi wa Sitani akinaleka abandu ibalangira Yehova mo mundu mubi. Umughulu abandu bakaghana ekwenene, Sitani akabakuna erikola emyatsi mibi n’eyitatunganene.—Rom. 1:25-31.

4. Niki kyo kikakanganaya ngoko Yehova ni “Mungu w’ekwenene”? (Ulebaya n’epitsa.)

⁴ Yehova ni “Mungu w’ekwenene,” kandi akakangiriraya abamwanzire b’ekwene. (Esy. 31:5) Omughulu Yehova akakangiriraya abandu b’ekwenene, Sitani akabya isyangatasyatoka eribateba. Kandi Yehova akakangiriraya abandu biwe eribugha ekwenene n’erikola ebitunganene. Ekyo kikabaha obuholo kandi kikaleka abandu ibabasikya. (Emi. 13:5, 6) Naghu, Yehova mwanakukolera ekyo ukigha eBiblia? Wabiriyilangirira ngoko ebyo Yehova akakola bikakuletera endundi, iwe n’abandi. (Esy. 77:13) Busana n’ekyo, wanzire erikola ebitunganene embere sy’oMungu. (Mat. 6:33) Wanzire eriwatikya abandu baminye ekwenene, n’eribawatikya baminye ngoko, ebyo Sitani abugha oko Mungu ni mabehi. Wangakola ekyo kyo uti?

5. Omundu akakanganaya ati ko anzire ekwenene n’eritunganene?

⁵ Wanganasombola erighana amabehi wa Sitani n’eribya oko luhande lw’ekwenene, n’erikangania ngoko wanzire Yehova inyabya mutabali waghu, kandi ngoko wanzire erikola ebitunganene. Wangakola ekyo kyo uti? Omughulu ukalagha Yehova omo musabe uti ukendimukolera kera na kera; n’erikangania abundu bosi ngoko wabirimulagha ukabatisibwa. Erianza emyatsi y’ekwenene n’eyitunganene kyo kikaleka omundu inayisogha eribatisibwa.

6. Esyonyimbo 45:4, sikakanganaya emyatsi yahi eyikaleka itwanza Yesu Kristo?

⁶ Wanzire Yesu Kristo busanaki? Langira emyatsi milebe eyikaleka itwanza Yesu eyiri omo Esyonyimbo 45:4. (Soma.) Yesu anzire ekwenene, eriyikehya, n’eritunganene. Wamabya iwanzire ekwenene n’eritunganene ighukendianza Yesu Kristo. Yesu mwakangania ndeke ngoko anzire kutsibu emyatsi y’ekwenene n’eyitunganene. (Yoa. 18:37) Neryo Yesu mwakangania ati ngoko anzire eriyikehya?

7. Niki kyo kikaleka iwatsemera umubere wa Yesu w’eriyikehya?

 ⁷ Yesu akayikehaya. Ng’eky’erileberyako, iniakaloleraya olukengerya losi oko Tata wiwe, isyaliyiloleraya loko. (Mar. 10:17, 18; Yoa. 5:19) Eriyikehya lya Yesu likaleka iwanza erikolaki? Alinga kyo kikaleka iwayisogha erianza Mughala w’oMungu n’erimukwama. Busaki Yesu akayikehaya? Kundi anzire Tata wiwe kandi anzire eribya ngaye; Tata wiwe naye akayikehaya. (Esy. 18:35; Ebr. 1:3) Kundi Yesu akigha ndeke-ndeke emibere ya Tata wiwe, ekyo kyo kikaleka itwamwanza. Ko bite bitya?

8. Busanaki twanzire Omwami wetu Yesu?

⁸ Twanzire Omwami wetu Yesu kundi ni mutabali oyuwene. Yehova yowamubegheraya n’erimuha ubutabali. (Isa. 50:4, 5) Kandi kundi atwanzire, Yesu mwayiherera busana netu. (Yoa. 13:1) Kundi Yesu ni Mwami waghu, litolere iwamwanza. Mwabugha ati abamwanzire ni bira biwe, nabo bakakanganaya ngoko bamwanzire omughulu bakasikaya ebihano biwe. (Yoa. 14:15; 15:14, 15) Omughala w’oMungu eribya mwira wetu ni lusunzo lunene kutsibu!

9. Olubatiso lw’Abakristo lusosene luti n’olubatiso lwa Yesu?

⁹ Omo bihano bya Yesu, muli ekihano ekikabugha kiti litolere abigha biwe ibabatisibwa. (Mat. 28:19, 20) Yesu naye mwabatisibwa. Omo nzira silebe olubatiso lwiwe lwabya lusighene n’olw’abigha biwe. (Ulebale ekisanduku “ Olubatiso lwa Yesu lusighene okuki n’olw’abigha biwe?”) Aliwe, omo sindi nzira olubatiso lwa Yesu lusosene n’olw’abigha biwe. Omughulu Yesu abatisibawa mwakangania ngoko abiriyisogha erikola erisonda lya Tata wiwe. (Ebr. 10:7) Ko bine bitya n’oko bigha ba Yesu. Omughulu bakabatisibawa bakakanganaya ngoko babirihira engebe yabo omo byala by’oMungu. Eritsuka aho erikola erisonda lw’oMungu kyo bakahira embere omo ngebe yabo, butsira erisonda lyabo. Ekyo kikakanganaya ngoko banemukwama eky’erileberyako ky’Omukama wabo.

10. Erianza Yesu likakuna omundu yo liti eribatisibwa?

¹⁰ Wabiriligha ngoko Yesu yo mughala-kyusa wa Yehova. Kandi wabiriligha ngoko Yesu yo Mwami oyo Mungu abirisombola eritutabala. Wasi ngoko Yesu akayiteghereraya n’erikangania ndeke-ndeke emibere ya Tata wiwe. Wabirigha ngoko Yesu inakalisaya abandu abakwire enzala, inakasikaya-mutima ababiribula omutima w’omonda, kandi nibya inakalamaya abakoni. (Mat. 14:14-21) Wabirilangira ngoko anemusondola Abakristo b’ekwenene munabwire. (Mat. 23:10) Kandi unasi ngoko omo biro bikasa akendikola emyatsi minene kundi iye y’Omwami w’Obwami bw’oMungu. Wangakangania uti ngoko umwanzire? Omwikwama eky’erileberyako kiwe. (Yoa. 14:21) Wanganatsuka erikola utya omughulu ukayiherera oko Yehova n’eribatisibwa.

11. Ni mwatsi wahi mukulu owakaleka omundu inayisogha eribatisibwa, kandi busanaki tukabugha tutya?

¹¹ Ni mwatsi wahi mukulu owangaleka iwayisogha eribatisibwa? Yesu mwakangania ekyalaghiro kikulu kulenga ebyosi akabugha ati: “Wanze [Yehova Mungu] wawe n’omutima wawe bosi, n’ekirimu kyawe kyosi, n’obulengekania bwawe bosi, n’amaka wawe gosi.” (Mar. 12:30) Naghu unanzire Yehova yo utya?

12. Busanaki wanzire Yehova? (Ulebaya n’epitsa.)

¹² Hane myatsi mingyi kutsibu eyikaleka itwanza Yehova. Eky’erileberyako, wabirigha ngoko Yehova yo “nzuko y’engebe yosi,” kandi ngoko niye yukatuha “obuli lusunzo lubuya  n’obuli lusunzo lowene.” (Esy. 36:9; Yak. 1:17) Obuli kindu kibuya ekyo uwiteko kikalua ok’oMungu wetu w’olwanzo kandi oyukahitaya.

13. Busanaki embanulo ni kihembo kibuya?

¹³ Embanulo kyo kihembo kinene ekyo Yehova abirituha. Busanaki tukabugha tutya? Terilengekania oko bwira obwabya omo katikati ka Yehova na mughala wiwe. Yesu mwabugha ati: “Tata wage anyanzire” Kandi mwabugha ati “Nyanzire Tata.” (Yoa. 10:17; 14:31) Obwira bwabo mubwanoka omughulu babya haghuma omo mamiliare w’emiaka. (Emi. 8:22, 23, 30) Terilengekania ngoko oMungu ayowa omughulu aleka mughala wiwe ateseke n’erihola. Yehova anzire abandu bosi bo kutsibu, naghu ighuneko. Ekyo kyo kyaleka inaligha mughala wiwe ateseke n’erihola, iwe n’abandi mutoke eribyaho kera na kera. (Yoa. 3:16; Gal. 2:20) Sihali ekikulu okw’ekyo ekikaleka itwanza Yehova.

14. Ni mwatsi wahi mukulu ogho mundu atolere inalandamirira?

¹⁴ Wabirianza Yehova yo kutsibu kusangwa wabirigha emyatsi mingyi okw’iye. Wanzire iwabwa mwira wiwe lino na kera na kera. Wanganatoka. Akakusaba ati utsemesaye omutima wiwe. (Emi. 23:15, 16) Wanganatsemesya Yehova omo myatsi eyo ukabugha n’eyo ukakola. Amaisa waghu akendikangania ngoko  kwenene-kwenene wanzire Yehova. (1 Yoa. 5:3) Oyo gho mwatsi mukulu ogho litolere omundu inalandamirira.

15. Wangakangania wuti ngoko wanzire Yehova?

¹⁵ Wangakangania ghuti ngoko wanzire Yehova? Eky’erimbere, omo musabe w’embaghane, ukabwira Yehova uti wamayigherera okw’iye. (Esy. 40:8) Enyuma waho, ukakanganaya abandu bosi ngoko wabiriyiherera oko Yehova omughulu ukabatisibawa. Ngoko twabirigha omo mwatsi ono, oyo akabya mughulu w’obutseme kandi w’omughaso munene. Ukatsuka amaisa mahya aw’erikola erisonda lya Yehova butsira lyaghu. (Rom. 14:8; 1 Pet. 4:1, 2) Oyo amabya nga ni mwatsi mulito, ko bine bitya. Aliwe, akaleka omundu inabya n’amaisa awuwene kutsibu. Busanaki tukabugha tutya?

16. Ngoko kiri omo Esyonyimbo 41:12, Yehova akahemba abakamukolera ati?

¹⁶ Sihali omundu oyukahitaya kutsibu nga Yehova. Nomo twangamuha bingahi, biro byosi akatusubiraya ebilengire ebyo tulyamugha. (Mar. 10:29, 30) Akendikuwatikya eribya n’engebe eyuwene nomo ghune omo kihugho kino kibi ekikisiya erihwaho. Kandi, ayo akine maghonzo. Ulubatiso y’enzuko y’olughendo lwaghu haghuma na Yehova. Wanganalola embere erikolera Tata waghu kera na kera. Ukendilola embere erianza Yehova yo kutsibu, kandi ukendisyabyaho kera na kera nga Yehova.— Soma Esyonyimbo 41:12.

17. Niki kyo wangaha Yehova ekyo atawiteko?

¹⁷ Eriyiherera oko Yehova n’eribatisibwa, likaleka iwabana akanya k’eriha Tata waghu ekindu ky’obughuli bunene. Obuli kindu kibuya ekyo uwiteko niye yukakuhakyo. Kandi yukaleka iwatsemera obuli mwatsi ogho akakutsemesaya. Nikwa naghu wanganaha oyo wahangyika ulubula n’ekihugho ekindu kilebe ekyo syawiteko, ni bughambu erimukolera lyaghu n’omutima wosi. (Yobu 1:8; 41:11; Emi. 27:11) Sihali omwatsi owuwene kulenga erikolera Yehova n’omutima waghu wosi. Ahate n’eritika-tika, Erianza Yehova w’omwatsi mukulu owangakukuna eribatisibwa.

18. Litolere iwayibulya amabulyo wahi?

¹⁸ Neryo, unemwendibatisibwa? Niwe musa wangasubirya oko ribulyo eryo. Aliwe ekyangakuwatikya ni yibulya eribulyo lino, ‘Nikinalindiriraki?’ (Emib. 8:36) Isiwabirirawa emyatsi isatu eyo twabirikaniako eyikaleka omundu inyaghisogha eribatisibwa. Omwatsi w’erimbere, ry’erianza ekwenene n’eritunganene. Teriyibulya uti, ‘Ninanzire erisyabyaho omughulu obuli mundu asyabugha ekwenene n’erikola ebitunganene?’ Omwatsi w’akabiri, ry’erianza Yesu Kristo. Teriyibulya uti, ‘Ninanzire Mughala w’oMungu inanitabala kandi ninanzire erikwama eky’erileberyako kiwe?’ Ow’akasatu kandi wo w’omughaso kutsibu, ry’erianza Yehova. Teriyibulya uti, ‘Ninanzire erikolera oMungu waghe nitoke eritsemesya omutima wiwe?’ Wamabisubirya uti inga oko mabulyo wosi ayo ighutolere eribatisibwa. Isiwalinda-linda.—Emib. 16:33.

19. Busanaki silitolere iwabya n’elindi-lindi okwibatisibwa? Teka eky’erileberyako. (Yoane 4:34)

¹⁹ Wamabya ighukinalengakanaya uti sighutolere eribatisibwa, ebinywa ebyo Yesu abugha byanganakuwatikya. (Soma Yoane 4:34.) Yesu mwabugha ati, erikola erisonda lya Tata wiwe liri ng’akalyo. Busanaki? Kundi akalyo kakawatikaya umubiri wetu. Yesu abya iniasi ngoko obuli kindu ekyo Yehova akatusaba, kikatuwatikaya. Yehova syangatusaba erikola omwatsi owangatuhutalya. Yehova ananzire iwabatisibwa? Inga. (Emib. 2:38) Uminye ngoko, erisikya ekyalayiro kiwe eky’eribatisibwa likendikuletera endundi. Bamakuha akalyo akasihire ukaluwaliako. Ko bine bitya n’okwibatisibwa, isiwabya n’elindi-lindi.

20. Tukendisyakania okuki omo mwatsi owakwamire?

²⁰ Busanaki ukinalinda-linda? Abandi bakanabugha bati, “Sindinabya tayari.” Litolere iwaminya ngoko wamayisogha eriyiherera oko Yehova n’eribatisibwa, iwamakola omwatsi owuwene kutsibu. Okw’ekyo, litolere iwalengekania kutsibu oko omwatsi oyo, n’ekyo kikasaba endambi n’eriyikasa. Aliwe wamabya iwunanzire kwenene-kwenene eribatisibwa wangayiteghekania ghuti lino? Ekisubiryo ky’oko libulyo eryo kiri omo mwatsi owakwamire.