EBiblia yasondolawa n’ekirimu kibuyirire. Muyahandikwa omo Kiebrania, Kiaramu, n’Ekigiriki. Ritolere Amasako iniabindulwa omo mibughe mingyi kusudi “abandu b’ebihanda byosi” babane mugho mw’endundi. (Matayo 24:14) Eritsuka oko Matayo erihika oko Eribisulirwa ni bitabu 27. Ebitabu byosi ebyo bikahulawamo “Amasako w’Ekigiriki w’Ekikristo” kundi oko mwanzo byahandikawa omo Kigiriki. Mubyahandikwa oko karne k’erimbere n’Abakristo abasondolawa n’ekirimu kibuyirire.

EBiblia—Embindula y’ekihugho kihya-kihya (Matayo—Eribisulirwa) yahuluka engendo y’erimbere omo Kingereza oko 1950. Ababindulayo mubakolesya amasako w’Ekigiriki wa Westcott na Hort awasibwe kutsibu, kandi awasosire amasako wa kera kera w’Ekigiriki. EBiblia—Embindula y’ekihugho kihya-kihya yikayikasa erikwama Ekigiriki kyo ndeke-ndeke. Abalyabindula eBiblia eno y’Ekinande mubakakolesaya eBiblia y’Ekingereza eyasubawamo oko 2013, kandi mubakayikasa eritendihengemya emyatsi. Mubakalandamirira erikola Embindula eyitehengemaya ebyabya omo masako w’erimbere-mbere kandi eyowikire n’eyikasomeka bweghu-bweghu. Endomeko eyikanirye oko “Ebyerighenderako omo mubiiri w’eritafsiri eBiblia,” “Embindula eno yiri yiti?,” na “Ngoko eBiblia yatuhikako” ikakanganaya emyatsi milebe eyilebirye omubughe eyiri omo tafsiri eno.

Erina ry’oMungu, Yehova, rikabanika ngendo 237 omo EBiblia—Embindula y’ekihugho kihya-kihya (Matayo—Eribisulirwa). Embindula eno yikasubaya erina Yehova omo mwanya waryo omo Masako abuyirire kundi ritolere erina eryo iryabya ribuyirire kandi kundi ritolere abandu ibabirikira erina eryo batoke erisabuka. (Matayo 6:9; Abanya Roma 10:13) Endomeko “Erina ry’oMungu omo Masako w’Ekigiriki w’Ekikristo” ikakanganaya ebiryaleka erina Yehova iryahirwa omo Masako w’Ekigiriki w’Ekikristo.

Embindula eno yikahulawamo Embindula y’ekihugho kihya-kihya busana n’endaghane y’oMungu y’ekihugho kihya-kihya ekikendisyabyamo eritunganene. Endaghane eyo yikendisyaletera abandu bosi b’endundi. (2 Petro 3:13) Abatafsiri b’eBiblia eno banzire oMungu oyo wahandikisaya Amasako abuyirire. Neryo bakalangira ini ky’omughaso munene eriyikasa eribindula amalengekania n’ebinywa biwe butsira makosa. Tukasaba tuti Embindula eno yiwatikaye abasomi b’emitima myolo “eriminya ekwenene yo ndeke-ndeke.”—1 Timoteo 2:4.