Emyatsi y’Emighulu y’Erimbere 10:1-14
-
Sauli n’abaghala biwe bamahola (1-14)
10 Abafilistini mubayalwa n’Abaisraeli. Abasuda Baisraeli mubatibita bakasagha Bafilistini. Abasuda bangyi Baisraeli mubitibwa oko Kitwa kye Gilboa.
2 Abafilistini mubatara Sauli n’abaghala biwe. Mubabya babibasunga, bamita Yonatani, Aminadabu, na Malkishua, abaghala ba Sauli.
3 Amalwa mwakala oko Sauli. Abakaghusa emisali mubamuhikako, bamamuhutalya.
4 Neryo Sauli mwabwira oyukamuhekera ebindu biwe by’amalwa ati: “Lusaya omuyali waghu omo lubo lwagho, unitsimite mugho, abandu abatabanibwe aba bakasyanihutalya.” Aliwe omundu oyukamuhekera ebindu biwe by’amalwa mwaghana, kundi mwasagha kutsibu. Neryo Sauli mwimya omuyali wiwe, amayitogherya kugho.
5 Omughulu oyukamuhekera ebindu biwe by’amalwa alangira ngoko Sauli amabihola, naye mwayitogherya oko muyali wiwe, amahola.
6 Sauli n’abaghala biwe basatu ko bahola batya. N’abosi b’omo nyumba yiwe ababya haghuma naye mubahola haghuma naye.
7 Omughulu Abaisraeli ababya omo musya* balangira ngoko obuli mundu abiritibita kandi ngoko Sauli n’abaghala biwe babirihola, mubasigha emiyi yabo, bamatibita. Enyuma sy’aho, Abafilistini mubasyikala muyo.
8 Ekiro ekikwamire, omughulu Abafilistini basyalusaya oko binda kw’ebindu, mubeya ekinda kya Sauli n’ebinda by’abaghala biwe oko Kitwa kye Gilboa.
9 Neryo mubalusya oko kinda kya Sauli kw’ebindu, bamamutwako omutwe, n’erimya ebindu biwe by’amalwa. Enyuma sy’aho, mubatuma abandu omo kihugho ky’Abafilistini bayatule omwatsi oyo oko syosanamu syabo n’oko bandu.
10 Enyuma sy’aho, mubahira ebindu bya Sauli by’Amalwa omo nyumba y’oMungu wabo. Mubahanika n’amakuha w’oko mutwe wiwe omo nyumba ya Dagoni.
11 Omughulu abandu bosi be Yabeshi-gileadi bowa ebyosi ebyo Abafilistini balyakolera Sauli,
12 abasuda bosi b’omo muyi oyo, mubayaheka ekinda kya Sauli n’ebinda by’abaghala biwe, mubatwalabyo e Yabeshi, bamata amakuha w’ebinda ebyo omo ndina y’omuti munene e Yabeshi. Mubakola amafungo omo biro 7.
13 Sauli kw’ahola atya busana n’erileghula oko Yehova kundi mwatakwama ebyalaghiro bya Yehova, kandi kundi mwayasungana n’omukumu
14 omo mwanya w’eribulya Yehova obusondoli. Neryo oMungu mwamwita, amaha n’obwami bwiwe bo Daudi mughala wa Yese.
Amaelezo awehikwa
^ Kutse “ribanda.”
