Emyatsi y’Emighulu y’Erimbere 11:1-47
11 Enyuma sy’aho, Abaisraeli bosi mubayasungana na Daudi e Hebroni. Mubamubwira bati: “Si unasi ngoko tuli musasi mughuma.*
2 Kera, omughulu Sauli abya mwami, n’iwe wabya ukasondola* abasuda be Israeli bakaya oko malwa, kandi Yehova, oMungu waghu, mwakubwira ati: ‘Ukendisyateya abandu baghe be Israeli, kandi ukendisyabya mukulu w’Abaisraeli.’”
3 Neryo abasyakulu bosi be Israeli mubayasungana n’omwami Daudi e Hebroni, na Daudi mwakola nabo endaghane embere sya Yehova e Hebroni. Enyuma sy’aho, mubahira oko Daudi kw’amaghuta atoke eribya mwami we Israeli, ngoko Yehova anabugha erilabira Samweli.
4 Habere habilaba mughulu mulebe, Daudi n’Abaisraeli bosi mubaya e Yerusalema, ni bugha ambu, e Yebusi, eyo Abayebusi babya bikere.
5 Abikalani be Yebusi mubasekererya Daudi bati: “Siwendisyingira omo muyi ono!” Aliwe Daudi mwahamba omwanya ogho omundu ateangahikamo bweghu-bweghu we Sioni. Lino omwanya oyo akahulawa mo Muyi wa Daudi.
6 Neryo Daudi mwabugha ati: “Oyukenditsuka eriyalwa n’Abayebusi, akendibya mukulu* kandi musondoli.” Neryo Yoabu mughala wa Zeruya mwabya w’erimbere eriyalwa nabo, neryo amabya mukulu.
7 Enyuma sy’aho, Daudi mwikala omo mwanya oyo ogho mundu ateangahikamo bweghu-bweghu. Ekyo kyo kyaleka omwanya oyo iniahulwa mo Muyi wa Daudi.
8 Mwahimba omuyi, amatimbyagho oko mwanya oyo eritsuka oko Katwa* eriyahika oko myanya eyitimbire oko Katwa ako, na Yoabu mwatasyahimba emyanya eyasighalira y’omuyi.
9 Daudi kw’aendelea atya eribya n’akaghala kanene, na Yehova w’emilondo abya haghuma naye.
10 Aba b’abakulu b’abasuda b’amaka ba Daudi, ibo haghuma n’Abaisraeli bosi mubawatikya eriwatya obwami bwa Daudi, n’erimuwatikya eribya mwami ngoko Yehova alagha Abaisraeli.
11 Aya w’amena w’Abasuda basatu b’amaka ba Daudi: Ow’erimbere abya Yashobeamu mughala w’Omuhakmoni. Yo wabya mukulu w’abasatu. Kiro kighuma, mwita abandu 300 omo ritumo riwe.
12 Ow’akabiri abya Eleazari mughala wa Dodo Omuahohi. Abya mughuma w’oko basuda basatu b’amaka ba Daudi.
13 Abya haghuma na Daudi e Pasdamimu, eyo Abafilistini babya ibabirihindana busana n’erilwa n’Abaisraeli. Yabya eririma eryuswiremo ekisusu. Ekiro ekyo, abasuda babya ibabiritibita bakasagha Bafilistini.
14 Aliwe Eleazari mwimana omo kati-kati k’eririma eryo, amalwira kuryo, mwita Abafilistini banene. Yehova kw’asinga atya Abafilistini bo kutsibu.
15 Abakulu basatu b’oko bakulu 30 mubaya eyiri olukuka,* eyo Daudi abya, omo mwangalu we Adulamu. Oko mughulu oyo, abasuda Bafilistini babya ibabirihira ekambi yabo omo Musya* we Refaimu.
16 Daudi abya iniane omo mwanya ogho omundu ateangahikamo bweghu-bweghu, n’ekambi y’abasuda Bafilistini yabya e Betlehemu.
17 Kiro kighuma, Daudi mwabugha ngoko analaghire oko kindu kilebe. Mwabugha ati: “Alinga namatanywa amaghetse awalyatehawa omo kyuna ky’amaghetse ekiri hakuhi n’omulango we Betlehemu!”
18 Neryo abasuda biwe basatu b’amaka mubakola ekyosi-kyosi batoke eringira omo kambi y’Abafilistini. Mubateha amaghetse omo kyuna kyamaghetse ekiri hakuhi n’omulango e Betlehemu. Enyuma sy’aho, mubaleteragho Daudi, aliwe mwaghana erinywagho, amutagho embere sya Yehova.
19 Mwabugha ati: “Mungu waghe, sinanganywa amaghetse aya, kundi kikendibya nganamanywa omusasi w’abalume aba, abalyahira engebe* yabo y’omo hatari batoke erinileteragho.” Neryo Daudi mwaghana erinywagho. Eyo y’emyatsi eyo basuda basatu ba Daudi b’amaka bakola.
20 Abishai mughala wabo Yoabu yo wabya mukulu w’abandi basuda basatu. Kiro kighuma, mwita abandu 300 omo ritumo riwe. Abya iniakumayire ng’abasuda basatu b’amaka ba Daudi.
21 Nomo anabya iyo wasibwe kulenga abandi b’omo kikuto kiwe ky’abasuda basatu kandi nomo anabya mukulu wabo, mwatahika oko basuda basatu b’amaka ba Daudi.
22 Benaya mughala wa Yehoyada abya mulume oyutesagha. Mwakola emyatsi minene eyikaswekaya e Kabzeeli. Iye yo wita abaghala babiri ba Arieli we Moabu, kandi iye yo wandaghalira omo kyuna ky’amaghetse atoke erita esimba omughulu w’amatsuku.
23 Mwita n’Omumisri mughuma oyo wabya muli-muli, abya n’obuli bw’amaboko* atano. Nomo Omumisri oyo anabya n’eritumo ringaha n’omuti w’erilukirako, Benaya mwayalwa naye omo mutso, mwamusaghula eritumo, amamwita omo ritumo eryo.
24 Eyo y’emyatsi eyo Benaya mughala wa Yehoyada akola. Abya akumayire ng’abasuda basatu b’amaka ba Daudi.
25 Nomo anabya asibwe kulenga abasuda 30, mwatahika oko basuda basatu b’amaka ba Daudi. Aliwe Daudi mwamuyira mo mukulu w’abasuda abakamuteghaya.
26 Abasuda b’amaka b’omo basuda ba Daudi babya: Asaheli mughala wabo Yoabu, Elhanani mughala wa Dodo, oyo wabya e Betlehemu,
27 Shamoti owe Harori, Helezi Omupeloniti,
28 Ira mughala wa Ikeshi Omutekoa, Abiezeri Omuanatoti,
29 Sibekai Omushati, Ilai Omuahohi,
30 Marahai Omunetofati, Heledi mughala wa Baana Omunetofati,
31 Itai mughala wa Ribai, owe Gibea y’Ababenyamini, Benaya Omupiratoni,
32 Hurai owe eyiri ehyusi ehikuma hye Gashi, Abieli Omuarbati,
33 Azmaveti Omubahurimu, Eleaba Omushaalboni,
34 abaghala ba Hashemu Omugizoni, Yonatani mughala wa Shage Omuharari,
35 Ahiamu mughala wa Sakari Omuharari, Elifali mughala wa Uri,
36 Heferi Omumekerati, Ahia Omupeloni,
37 Hezro Omukarmeli, Naarai mughala wa Ezbai,
38 Yoeli mughala wabo Natani, Mibari mughala wa Hagri,
39 Zeleki Omuamoni, Naharai Omubeeroti oyo wabya akahekera Yoabu mughala wa Zeruya y’ebindu biwe by’amalwa;
40 Ira Omuitri, Garebu Omuitri,
41 Uria Omuhiti, Zabadi mughala wa Alai,
42 Adina mughala wa Shiza Omurubeni, omukulu w’Abarubeni, n’abandu 30 ababya naye;
43 Hanani mughala wa Maaka, Yoshafati Omumitni,
44 Uzia Omuashterati, Shama na Yeieli abaghala ba Yotamu Omuaroeli;
45 Yediaeli mughala wa Shimri, n’omughala wabo ye Yoa Omutizi;
46 Elieli Omuhavi, Yeribayi na Yoshavia abaghala ba Elnaamu, na Itma Omumoabu;
47 Elieli, Obedi, na Yaasieli Omumezoba.
Amaelezo awehikwa
^ Kinywa kwa kinywa, “tuli rikuha ryaghu n’omunyoku waghu.”
^ Kinywa kwa kinywa, “ukendisyabya ukahulukya n’eringirya Abaisraeli.”
^ Kinywa kwa kinywa, “mutwe.”
^ Kutse “Milo.” Ni kinywa ky’Ekiebrania ekikamaanisaya “eryusulya.”
^ Kutse “olubwe.”
^ Kutse “Ribanda.”
^ Kutse “enafsi.”
^ Obuli bwiwe bwabya hakuhi esyometre 2,23. Ulebaye Endomeko B14.
