Emyatsi y’Emighulu y’Erimbere 12:1-40
-
Ababya oko luhande lw’omwami Daudi (1-40)
12 Aba b’abalume abaya eyiri Daudi e Ziklagi omughulu abya isyangalendera bwiranda busana na Sauli mughala wa Kishi. Abandu abo babya b’oko basuda b’amaka abamuwatikaya omo malwa.
2 Babya n’obuta, ibakakolesaya ebyala by’amali n’eby’amalembe erilasa amabwe omo mijeledi kutse erilasa emisali omo buta. Babya baghala babo Sauli, b’omo kihanda kya Benyamini.
3 Omukulu wabo abya Ahiezeri, n’oyumusubukire abya Yoasi; abosi babiri babya baghala ba Shema owe Gibea; habya na Yezieli na Peleti, abaghala ba Azmaveti, Beraka, Yehu Omuanatoti,
4 Ishmaya Omugibeoni, oyo wabya mughuma w’oko basuda 30 b’amaka, kandi yo wabya imanire ekikuto ky’abasuda 30; habya na Yeremia, Yahazieli, Yohanani, Yozabadi Omugederati,
5 Eluzai, Yerimoti, Bealia, Shemaria, Shefatia Omuharifi,
6 Elkana, Ishia, Azareli, Yoezeri, na Yashobeamu, Abakora;
7 na Yoela na Zebadia, abaghala ba Yerohamu owe Gedori.
8 Abagadi balebe mubayighunga na Daudi, bamamukwamirira omo mwanya ogho omundu ateangahikamo bweghu-bweghu, omo mbwarara; babya basuda b’amaka, abasi erilwa, ibasi erikolesya engabo nene n’eritumo, emitwe yabo yabya ng’emitwe y’esyosimba, kandi babya banguhire ng’esyongabi sy’omo bitwa.
9 Ezeri yo wabya mukulu, Obadia w’akabiri, Eliabu w’akasatu,
10 Mishmana ow’akani, Yeremia ow’akatano,
11 Atai owe 6, Elieli owe 7,
12 Yohanani owe 8, Elizabadi owe 9,
13 Yeremia owe 10, na Makbanai owe 11.
14 Babya Bagadi, abakulu b’abasuda. Oyutakalire omw’ibo inialingene n’abalume 100, n’oyukalire kutsibu omw’ibo inialingene n’abalume 1 000.
15 Abalume abo bo basoka e Yordani oko mwisi w’erimbere w’omwaka, omughulu yabya iyabiryusula kutsibu. Mubatibita oko bandu bosi ababya bikere omo mabanda, oko luhande lw’eyo eryuba rikasira n’oko luhande lw’eyo ryuba rikalengera.
16 Abalume balebe b’omo kihanda kya Benyamini n’ekya Yuda, nabo mubaya eyiri Daudi omo mwanya wiwe ogho omundu ateangahikamo bweghu-bweghu.
17 Daudi mwayahindana nabo, amababwira ati: “Mwamabya imulyasira buholo mutoke erisyaniwatikya, itukendibya omo bughuma. Aliwe mwamabya imulyasyanihira omo byala by’esyonzighu syaghe isinditakola kibi, oMungu w’abotata-kulu wetu iniakendilangira ekyo n’eritutswera.”
18 Neryo ekirimu mukyasa oko Amasai, omukulu w’abasuda 30, amabugha ati:
“Daudi, tuli baghu, kandi tuli haghuma naghu, iwe mughala wa Yese.
Twamakusunzira obuholo, obuholo, n’oyukakuwatikaya, naye twamamusunzira obuholo,Kundi oMungu waghu anemukuwatikya.”
Neryo Daudi mwakokyabo, amabayira mo b’oko bakulu b’abasuda.
19 Abalume balebe b’omo kihanda kya Manase nabo mubatswa, bamaya eyiri Daudi. Oko mughulu oyo, Daudi abya iniane n’Abafilistini bakayalwa na Sauli; aliwe oko mwiso, Daudi mwatawatikya Abafilistini, kundi abakama b’Abafilistini mubabya babikola akasyakulu, mubabugha bati Daudi asubule. Mubabugha bati: “Anganatutswako iniayighunga n’omukama wiwe Sauli, neryo aho itwamakwa.”
20 Aba b’abalume b’omo kihanda kya Manase abatswa n’eriyighunga na Daudi omughulu abya akaya e Ziklagi: Adna, Yozabadi, Yediaeli, Mikaeli, Yozabadi, Elihu, na Ziletai. Babya bakulu b’amaelfu b’omo kihanda kya Manase.
21 Mubawatikya Daudi erilwa n’ababandi abakapura ebindu, kundi abosi babya balume b’amaka kandi abatesagha, mubabya bakulu b’abasuda.
22 Obuli kiro, abandu ibakasa eyiri Daudi bakasyamuwatikya, neryo ekambi ya Daudi muyahika oko kika yamabya kambi nene ng’ekambi y’oMungu.
23 Eno y’emighanzo y’abakulu ababya n’ebindu by’amalwa abaya e Hebroni eyiri Daudi batoke erimuha obwami bwa Sauli, ngoko Yehova anabugha.
24 Omo kihanda kya Yuda mwabya abalume 6 800 abawite oko syongabo nene-nene n’amatumo. Babya ibane tayari erilwa.
25 Omo basuda b’omo kihanda kya Simeoni mwabya abalume 7 100 b’amaka kandi abatesagha.
26 Omo kihanda kya Lawi mwabya abalume 4 600.
27 Yehoiyada yo wabya mukulu w’abaghala ba Haruni, abya n’abalume 3 700,
28 habya na Zadoki, omulwana w’amaka kandi oyutesagha, habya n’abalume 22 b’omo kitunga kiwe.
29 Omo kihanda kya Benyamini mwabya abalume 3 000, abaghala babo Sauli. Embere sy’aho, abangyi ba kubo babya bakatsunga ebindu by’ekihanda kya Sauli.
30 Omo kihanda kya Efraimu mwabya abalume 20 800 b’amaka, abatesagha, babya bakumayire omo bitunga byabyo.
31 Omo nusu y’ekihanda kya Manase mwabya abalume 18 000 abasombolawa erikwamana n’amena wabo batoke eryasa n’eriyira Daudi mo mwami.
32 Omo kihanda kya Isakari mwabya abakulu 200 ababya n’obutoki bw’eriminya ngoko Abaisraeli bangakola omwatsi mulebe kandi nga bangakolagho mughulu wahi. N’abaghala babo bosi babya bakakwama ekyo bakabugha.
33 Omo kihanda kya Zabuloni mwabya abalume 50 000 abangabya basuda, babya basi eriyipanga busana n’amalwa ibane n’emihanda yosi y’ebindu by’amalwa; abosi mubayighunga na Daudi n’omutima wabo wosi.*
34 Omo kihanda kya Naftali mwabya abakulu 1 000, habya n’abalume 37 000 ababya n’esyongabo nene-nene n’amatumo.
35 Omo kihanda kya Dani mwabya abalume 28 600 abasi eriyipanga busana n’amalwa.
36 Omo kihanda kya Asheri mwabya abalume 40 000 abangabya basuda; babya basi eriyipanga busana n’amalwa.
37 Habya abasuda 120 000 abali n’emihanda yosi y’ebindu by’amalwa, balua oko ghundi mwisirya we Yordani, balua omo kihanda kya Rubeni, ekihanda kya Gadi, n’omo nusu y’ekihanda kya Manase.
38 Abosi abo babya balume abasi erilwa, babya ibane tayari erilwa. Mubasa e Hebroni ibabiriyisogha ndeke-ndeke eriyira Daudi mo mwami we Israeli yosi, n’abandi Baisraeli bosi babya banzire* eriyira Daudi mo mwami.
39 Neryo mubasighala eyo haghuma na Daudi omo biro bisatu, ibanemulya n’erinywa, kundi abalikyabo babya ibabiribateghekanirya eby’erirya n’eby’erinywa.
40 Ababya hakuhi nibya n’ababya hali, eriyahika omo biharo bya Isakari, Zabuloni, na Naftali, mubabya bakaleta ebyalya oko syopunda, esyongamia, esyonyumbu, n’esyonde; habya efarine, esyogato sy’esyotini esyumire n’esy’emizabibu eyumire; habya edivai, amaghuta, esyonde, n’esyombuli, ebinene kundi Abaisraeli babya omo fete.
Amaelezo awehikwa
^ Kutse “mubabya bataleghula oko Daudi.”
^ Kinywa kwa kinywa, “babya n’omutima mughuma musa.”
