Emyatsi y’Emighulu y’Erimbere 13:1-14
13 Daudi mwakola akasyakulu n’abakulu b’amaelfu n’abakulu b’amamia n’abandi bakulu bosi.
2 Enyuma sy’aho, Daudi mwabwira Abaisraeli bosi ati: “Mwamabilangira ikyuwene kandi mwamabilangira Yehova Mungu wetu inianganalighakyo, tutume omulaghe oko bandi baghala betu abali omo biharo byosi bye Israeli, tutumiregho n’abahereri n’Abalawi abali omo miyi yabo eyirimo emyanya y’erilisiryamo tuti base eno.
3 Neryo tusubulaye Erisanduku ry’oMungu wetu.” Kundi omo biro bya Sauli, abandu babya isibalisyatsomanaryo.
4 Abandu bosi ababya bahindene mubaligha erikola ekyo, kundi abandu bosi mubalangira ngoko omwatsi oyo amatolera.
5 Neryo Daudi mwahindania Abaisraeli bosi, erilua oko lusi* lwe Misri eriyahika e Lebo-hamati,* batoke eriyalusya Erisanduku ry’oMungu w’ekwenene e Kiriati-yearimu.
6 Daudi n’Abaisraeli bosi muberukira e Baala, ni bugha ambu, e Kiriati-yearimu, eyiri omo kiharo kye Yuda, batoke eriyaleta Erisanduku rya Yehova, oMungu w’ekwenene, oyo wikere oko kitumbi kiwe ky’obwami endata* oko bakerubi; embere sy’erisanduku eryo ho bandu bakasabira.
7 Mubaya ewa Abinadabu, aliwe mubaheka Erisanduku ry’oMungu w’ekwenene oko ngurubani* nyihya-nyihya. Uza na Ahio bo babya bakasondola engurubani eyo.
8 Daudi n’abandu bosi be Israeli babya bakatsemera omwatsi oyo embere sy’oMungu w’ekwenene n’akaghala kabo kosi; babya bakimba, bakawata esyonanga, n’ebindi byombo by’omuziki by’esyosinga, ehighoma, amasengo,* n’esyongunga.
9 Babere babihika ahali ekihumbiro kya Kidoni, Uza mwakakya ebyala biwe, amahamba Erisanduku, kundi esyonde musyasondya eritoyaryo.
10 Yehova mwahitana oko Uza ko kutsibu, neryo oMungu mwamwitira aho, kundi mwakakya ebyala biwe atoke erihamba Erisanduku. Uza mwaholera aho embere sy’oMungu.
11 Aliwe Daudi mwahitana* kundi Yehova mwahitana oko Uza n’erimwita; omwanya oyo akinahulawa mo Perezi-uza* erihika na munabwire.
12 Ekiro ekyo, Daudi mwasagha oMungu w’ekwenene yo kutsibu. Mwayibwira ati: “Erisanduku ry’oMungu w’ekwenene rikendyasa ewaghe yo riti?”
13 Neryo Daudi mwatatwala Erisanduku omo Muyi wa Daudi eyo abya ikere, aliwe mwayahiraryo omo nyumba ya Obedi-edomu Omugiti.
14 Erisanduku ry’oMungu w’ekwenene muryabugha omo kihanda kya Obedi-edomu mw’emisi isatu, ryabya omo nyumba ya Obedi-edomu. Yehova mwabya akatsumula ekihanda kya Obedi-edomu n’ebyosi ebyo abya nabyo.
Amaelezo awehikwa
^ Kutse “erilua e Shihori.”
^ Kutse “obwingiriro bwe Hamati.”
^ Kutse alinga, “omo kati-kati.”
^ Kutse “mutoka w’erikura; sharyo.”
^ Kutse “esyosembale.”
^ Kute “mwabya omo bulighe.”
^ Ni bugha ambu “ekitobo oko Uza.”
