Emyatsi y’Emighulu y’Erimbere 14:1-17
14 Hiramu omwami we Tiro mwatuma abandu oko Daudi; mwabatuma n’esyombagho sy’emiti y’emierezi, abandu abasi erihimba omo mabwe,* n’abasapate batoke eriyahimbira Daudi y’enyumba.
2 Neryo Daudi mwaminya ngoko Yehova abiriwatya obwami bwiwe atoke eritabala Abaisraeli, neryo oMungu mwawatya obwami bwa Daudi busana n’abandu biwe Abaisraeli.
3 Kandi Daudi mwimya abandi bakali e Yerusalema, mwabuta n’abana bangyi b’obulume n’ab’obukali.
4 Aya w’amena w’abana biwe ababutirawa e Yerusalema: Shamua, Shobabu, Natani, Solomona,
5 Ibhari, Elishua, Elpeleti,
6 Noga, Nefegi, Yafia,
7 Elishama, Beeliada, na Elifeleti.
8 Abafilistini babere babyowa ngoko Daudi abirihirwako amaghuta atoke eribya mwami we Israeli yosi, abosi mubayamurondya. Daudi abere abyowa ngoko Abafilistini banemumurondya, mwayalwa nabo.
9 Abafilistini mubahika omo Musya* we Refaimu, bamatsuka erilwa n’abandu bayo.
10 Daudi mwabulya oMungu ati: “Nanganayalwa n’Abafilistini? Unemwendibahira omo byala byaghe?” Yehova mwamusubirya ati: “Ghenda, uyalwe nabo, ngendibahira omo byala byaghu.”
11 Neryo Daudi mwahetukira e Baali-perazimu, amayabitira eyo. Neryo Daudi mwabugha ati: “OMungu w’ekwenene mwakatula enzira embere syaghe omo kati-kati k’esyonzighu syaghe, ngoko amaghetse akayitulira enzira.” Kyo kyaleka iniahula omwanya oyo mo Baali-perazimu.*
12 Abafilistini mubasigha emiungu yabo y’aho. Neryo Daudi mwabugha ati yitimibawe omo muliro.
13 Habere habilaba mughulu mulebe, kandi Abafilistini mubayalwa n’abandu abikere omo musya.*
14 Kandi Daudi mwabulya oMungu ng’anganayalwa nabo, aliwe lero oMungu w’ekwenene mwamusubirya ati: “Isiwabasirako embere. Aliwe iwe utimbe, neryo ukendibasirako enyuma, hakuhi n’omusitu w’emiti y’ebaka.
15 Omughulu ukendyowa emilenge eyiri ng’ey’abasuda ibanemulaba omo miti y’ebaka, litolere iwalw’iwayalwa nabo, kundi oMungu w’ekwenene akendibya iniabirikubera embere akayita Abafilistini.”
16 Neryo Daudi mwakola ngoko oMungu w’ekwenene amubwira, neryo abasuda biwe mubita Abafilistini erilua e Gibeoni erihika e Gezeri.
17 Neryo engulu ya Daudi muyakumayira omo kihugho kyosi, kandi Yehova mwaleka abandu b’ebihanda byosi ibasagha Daudi.
Amaelezo awehikwa
^ Kutse “abakahimba esyombimbo.”
^ Kutse “Ribanda.”
^ Ni bugha ambu “omukama w’ebitobo.”
^ Kutse “ribanda.”
