Emyatsi y’Emighulu y’Erimbere 15:1-29
15 Daudi mwaendelea eriyihimbira amanyumba omo Muyi wa Daudi. Mwateghekania n’omwanya owakendibya akabyamo Erisanduku ry’oMungu w’ekwenene, mwahimbiraryo ehema.
2 Neryo Daudi mwabugha ati: “Omundu wosi-wosi oyute Mulawi syatolere eriheka Erisanduku ry’oMungu w’ekwenene, kundi Abalawi bo Yehova abirisombola batoke eribya bakaheka Erisanduku rya Yehova n’erimukolera mughulu wosi.”
3 Neryo Daudi mwahindania Abaisraeli bosi e Yerusalema batoke eritwala Erisanduku rya Yehova omo mwanya ogho abya iniabiriteghekaniryaryo.
4 Daudi mwahindania abitsikulu ba Haruni n’Abalawi.
5 Omo Bakohati mwabya: omukulu Urieli n’abalume 120 b’omo kihanda kiwe;
6 omo Bamerari mwabya: omukulu Asaya n’abalume 220 b’omo kihanda kiwe;
7 omo Bagershomu mwabya: omukulu Yoeli n’abalume 130 b’omo kihanda kiwe;
8 omo bitsikulu ba Elizafani mwabya: omukulu Shemaya n’abalume 200 b’omo kihanda kiwe;
9 omo bitsikulu ba Hebroni mwabya: omukulu Elieli n’abalume 80 b’omo kihanda kiwe;
10 omo bitsikulu ba Uzieli mwabya: omukulu Aminadabu n’abalume 112 b’omo kihanda kiwe.
11 Kandi, Daudi mwabirikira omuhereri Zadoki n’omuhereri Abiatari n’abahereri, ye Urieli, Asaya, Yoeli, Shemaya, Elieli, na Aminadabu,
12 neryo mwababwira ati: “Muli bakulu b’ebitunga by’Abalawi. Muyeraye, inywe n’abalume b’omo bihanda byenyu, neryo mutwale Erisanduku rya Yehova oMungu we Israeli omo mwanya ogho nabiriteghekaniryaryo.
13 Engendo y’erimbere, mumwataheka erisanduku, kundi mutwatasonda eriminya nga ritoleere iryahekwa riti, ekyo kyo kyaleka Yehova Mungu wetu iniatuhitanako kutsibu.”
14 Neryo abahereri n’Abalawi mubayerya batole eritwala Erisanduku rya Yehova oMungu we Israeli.
15 Neryo Abalawi mubahira emighamba* oko bitigho byabo batoke eriheka Erisanduku ry’oMungu w’ekwenene, ngoko Yehova anabugha erilabira Musa.
16 Neryo Daudi mwabwira abakulu b’Abalawi ati basombole omo Balawi balikyabo mw’abimbi; abimbi abo babya bakimba n’obutseme ibanemukwamana n’omuziki owakalua omo byombo by’omuziki, ni bugha ambu, ebyombo by’omuziki by’esyosinga, esyonanga, n’amasengo.*
17 Neryo Abalawi mubasombola omo kihanda kyabo mo Hemani mughala wa Yoeli, Azafu mughala wa Berekia, na Etani mughala wa Kushaya, ow’omo kihanda kya Merari.
18 Habya n’abaghala babo ab’omo kikuto ky’akabiri, ye Zekaria, Beni, Yaazieli, Shemiramoti, Yehieli, Uni, Eliabu, Benaya, Maaseya, Matitia, Elifelehu, na Mikneya. Habya na Obedi-edomu na Yeieli, ababya bakatsunga emilango.
19 Abimbi ye Hemani, Asafu, na Etani babya bakawata amasengo* w’ekwivre;*
20 na Zekaria, Azieli, Shemiramoti, Yehieli, Uni, Eliabu, Maaseya, na Benaya babya bakawata ebyombo by’omuziki by’esyosinga ebyabirilewa ndeke bitoke erihambana ne Alamoti;*
21 Matitia, Elifelehu, Mikneya, Obedi-edomu, Yeieli, na Azazia babya bakawata esyonanga esyabirilewa ndeke sitoke erihambana ne Seminiti,* bo babya bakasondola esyonyimbo.
22 Kenania, omukulu wa Balawi, yo wabya akimanira omubiiri w’eriheka Erisanduku, kundi abya asi omubiiri oyo wo ndeke.
23 Berekia na Elkana bo babya bakatsunga emilango hakuni n’Erisanduku.
24 Abahereri, ye Shebania, Yoshafati, Netaneli, Amasai, Zekaria, Benaya, na Eliezeri babya bakabuha kutsibu omo syongunga embere sy’Erisanduku ry’oMungu w’ekwenene, na Obedi-edomu na Yehia nabo babya bakateya emilango hakuhi n’Erisanduku.
25 Neryo Daudi, abasyakulu be Israeli, n’abakulu b’amaelfu mubaghenda n’obutseme bakayalusya Erisanduku ry’endaghane ya Yehova omo nyumba ya Obedi-edomu.
26 OMungu w’ekwenene mwabya abiwatikya Abalawi ababya bakaheka Erisamduku ry’endaghane ya Yehova, mubaherera esyonume sy’esyonde 7 esikine nyilere n’esyombangale 7.
27 Daudi abya iniambite olukimba oluwene oluteko amaboko; n’Abalawi bosi ababya bahekire Erisanduku, abimbi, na Kenania oyo wabya akimanira omubiiri w’eriheka Erisanduku n’ow’abimbi, nabo babya bambite esyongyimba esyuwene; kandi Daudi abya ambite e efodi y’ekitani.
28 Abaisraeli bosi babya bakakwamanisya Erisanduku ry’endaghane ya Yehova ibanemuyisyandira, ibanemubuha omo mahembe, omo syongunga, n’eriwata amasengo,* kandi babya bakawata kutsibu ebyombo by’omuziki by’esyosinga n’esyonanga.
29 Aliwe omughulu Erisanduku ry’endaghane ya Yehova ryahika omo Muyi wa Daudi, Mikali mwali wa Sauli mwalebererya omo ridirisa, amalangira omwami Daudi inianemusata akayisumbanga-sumbanga n’eriyitsangura; neryo mwamupokya omo mutima wiwe.
Amaelezo awehikwa
^ Kutse “emiraba; emiti y’erihekerako.”
^ Kutse “n’esyosembale.”
^ Kutse “esyosembale.”
^ Kutse “w’omulinga.”
^ Ulebaye Amaana w’ebinywa.
^ Ulebaye Amaana w’ebinywa.
^ Kutse “esyosembale.”
