Emyatsi y’Emighulu y’Erimbere 16:1-43
16 Neryo mubatwala Erisanduku ry’oMungu w’ekwenene, bamayahiraryo omo hema eyo Daudi abya aniabirihimbiraryo; kandi mubaherera amahere w’eryokererya n’amahere w’obuholo embere sy’oMungu w’ekwenene.
2 Daudi mwabya abiherera amahere w’eryokererya n’amahere w’obuholo, mwatsumula abandu omo rina rya Yehova.
3 Kandi mwaghabira Abaisraeli bosi, abalume n’abakali, b’omukati w’omuviringo, egato y’etende, n’egato y’emizabibu eyumire.
4 Enyuma sy’aho, mwasombola Abalawi balebe batoke erikolera embere sy’Erisanduku rya Yehova, eriha Yehova oMungu we Israeli y’olukengerwa,* erimusima, n’erimupipa.
5 Asafu abya mukulu, na Zekaria yo wabya muwatikya wiwe; ye Yeieli, Shemiramoti, Yehieli, Matitia, Eliabu, Benaya, Obedi-edomu, na Yeieli babya bakawata ebyombo by’omuziki by’esyosinga n’esyonanga; na Asafu amasengo,*
6 omuhereri Benaya n’omuhereri Yahazieli babya bakabuha omo syongunga mughulu wosi embere sy’erisanduku ry’endaghane ry’oMungu w’ekwenene.
7 Ekiro ekyo kyo Daudi atunga olwimbo engendo y’erimbere olw’erisima Yehova, neryo amahalo Asafu n’abalume b’omo kihanda kiwe batoke eryimbalo:
8 “Musime Yehova, mupipe erina riwe,Muminyikalaye emibiiri yiwe mikulu-mikulu omo kati-kati k’abandu!
9 Mumwimbire, mumwimbire* esyonyimbo sy’eripipa,Mulengekanaye* kutsibu oko myatsi eyuwene nga eyo abirikola.
10 Muyihalambe busana n’erina riwe ribuyirire.
Omutima w’abakasonda-sonda Yehova atseme.
11 Musondaye Yehova n’akaghala kiwe.
Mughulu wosi musondaye obusu* bwiwe.
12 Mwibuke emyatsi eyuwene nga eyo abirikola,Ebitiko-tiko ebyo abirikola n’emyatsi eyo abiritswera,
13 Inywe bana ba Israeli, omughombe wiwe,Inywe bana ba Yakobo, inywe asombola.
14 Iye ni Yehova oMungu wetu.
Akatswera ekihugho kyosi.
15 Mwibuke endaghane yiwe kera na kera,Endaghane eyo alagha,* erihika oko bizazi* elfu moya,
16 Endaghane eyo akola na Abrahamu,N’ebyo alapira Isaka,
17 Endaghane eyo ayira mo mughambo busana na YakoboKandi eyo abiriyira mo ndaghane ya kera na kera busana na Israeli,
18 Omw’ibugha ati, ‘Ngasyakuha ekihugho kye KananaMo mwandu waghu.’
19 Ekyo mukyabya omughulu mwabya bake,Omughulu mwabya bake kutsibu, kandi omughulu mwabya bagheni omo kihugho.
20 Babya bakahuma-huma omo bihugho,Ibakalua omo bwami obu, ibaya omo bundi.
21 Mwatalighira omundu wosi-wosi abaghalaye,Aliwe mwahayira abami busana nabo,
22 Omw’ibugha ati, ‘Isimwatula oko bandu baghe abahirirweko amaghuta,Kandi isimwakolera abaminyereri baghe b’ekindu kyosi-kyosi ekituwene.’
23 Mwimbire Yehova, inywe bikalani bosi b’oko kihugho!
Obuli kiro, mubye mukabwira abandu ngoko akalamaya!
24 Mutughulanaye olukengerwa lwiwe omo kati-kati k’ebihanda,Mutughulanaye emibiiri yiwe eyuwene nga omo kati-kati k’abandu bosi,
25 Kundi Yehova ni mukulu kandi iye yutolere eripipwa kutsibu,Akubahisaya kutsibu kulenga eyindi miungu yosi.
26 Emiungu yosi y’abandu ni miungu eyitawite mughaso,Aliwe Yehova yo wahangyika olubula.
27 Aho ali hali olukengerwa kandi huwene nga;Aho ikere hali akaghala n’obutseme.
28 Muhe Yehova ekyo atolere erihabwa, inywe bihanda by’abandu,Muhe Yehova ekyo atolere erihabwa kundi ni w’olukengerwa kandi awite akaghala.
29 Muhe Yehova y’olukengerwa olo atolere busana n’erina riwe;Mulete ekihembo n’eryasa embere siwe.
Mukukame* embere sya Yehova imunambite esyongyimba nyibuyirire.*
30 Mutitimane embere siwe, inywe bikalani bosi b’oko kihugho!
Ekihugho* kisikire ndeke-ndeke; omundu syangatsingya-tsingyakyo.*
31 Olubula lutseme, n’ekihugho kiyisyandire;Mubwire ebihanda muti: ‘Yehova abiribya Mwami!’
32 Engetse n’ebyosi ebirimo biluemo emilumo y’obutuku;Amalima n’ebyosi ebirimo bitseme.
33 N’emiti y’omo musitu nayo yitseme embere sya Yehova,Kundi anemwasa* akasyatswera ekihugho.
34 Muhe Yehova y’ewasingya, kundi ni mubuya;Olwanzo lwiwe oluteleghula ni lwa kera na kera.
35 Kandi mubughe muti, ‘Mungu wetu, Omusabuli wetu, utusabule,Utuhindanaye haghuma n’eritulusya omo byala by’ebihanda,Tutoke eripipa erina ryaghu ribuyirire,Tutoke eribana obutseme tukakupipa.
36 Yehova, oMungu we Israeli, apipaweKera na kera.’”
Neryo abandu bosi mubabugha bati, “Amina!”* kandi mubapipa Yehova.
37 Neryo Daudi mwasigha Asafu n’abalume b’omo kihanda kiwe embere sy’Erisanduku ry’endaghane ya Yehova batoke eribya bakakolera embere sy’Erisanduku eryo, mughulu wosi ngoko bakanakola buli kiro.
38 Mwasighayo na Obedi-edomu n’abalume 68 b’omo kihanda kiwe, mwaha Obedi-edomu, mughala wa Yedutuni, na Hosa omubiiri w’eritsunga omulango;
39 mwasighayo n’omuhereri Zadoki n’abahereri balikyabo embere sy’ehema ya Yehova omo mwanya w’endata we Gibeoni.
40 Omubiiri wabo abya eribya bakaherera Yehova y’amahere w’eryokererya oko kiherero ky’erihererako amahere w’eryokererya, omo tututu n’omw’igholo, kandi ibakakola ebyosi ebihandikire omo Mighambo ya Yehova eyo aha Abaisraeli.
41 Babya na Yemani na Yedutuni n’abandi balume b’oko balume abasombolawa erikwamana n’amena wabo batoke eripipa Yehova, kundi “olwanzo lwiwe oluteleghula ni lwa kera na kera”;
42 Hemani na Yedutuni nabo babya haghuma nabo, babya bakabuha omo syongunga, eriwata amasengo,* n’ebindi byombo by’omuziki ebyabya bikakolesibwa eripipa oMungu w’ekwenene; n’abaghala ba Yedutuni babya oko mulango.
43 Enyuma sy’aho, abandu bosi mubasuba ewabo, Daudi naye mwatsumula ekihanda kiwe.
Amaelezo awehikwa
^ Kinywa kwa kinywa, “eryibuka Yehova oMungu we Israeli.”
^ Kutse “esyosembale.”
^ Kutse “mumuwatire omuziki.”
^ Kutse alinga, “Mukanaye.”
^ Kutse “eribyaho.”
^ Kinwya kwa kinywa, “Ekinywa ekyo abwira.”
^ Kutse “syondengo.”
^ Kutse “Muramaye.”
^ Kutse alinga, “busana n’olukengerwa lw’obubuyirire bwiwe.”
^ Kutse “Ekitaka.”
^ Kutse “syangasuka-sukaniayo.”
^ Kutse “abiryasa.”
^ Kutse “Bibye bitya!”
^ Kutse “esyosembale.”
