Emyatsi y’Emighulu y’Erimbere 17:1-27
17 Omwami mwabya abikala omo nyumba yiwe, mwabwira Natani ati: “Ingye nikere omo nyumba eyihimbire omo miti y’emierezi, aliwe Erisanduku rya Yehova riri omo hema.”
2 Natani mwasubirya Daudi ati: “Ukole ekyosi-kyosi ekyo wanzire erikola, kundi oMungu w’ekwenene ane haghuma naghu.”
3 Omo kiro ky’ekiro ekyo kisa-kisa, oMungu mwabwira Natani ati:
4 “Ghenda uyabwire omughombe waghe Daudi uti, ‘Yehova ati: “S’iwe ukendihimba enyumba eyo ngendikalamo.
5 Eritsuka ekiro nalusaya abandu be Israeli be Misri erihika na munabwire, sindinatikala omo nyumba, aliwe ingikala omo hema eyikahuma-huma.*
6 Omughulu wosi ogho nabya ngaghenda n’Abaisraeli, ninenatabwira omughuma w’oko batsweri be Israeli oyo nasombola atoke erisondola abandu baghe niti, ‘Busanaki siwetanihimbira enyumba omo miti y’emierezi?’”’
7 “Neryo ukendibwira omughombe waghe Daudi uti, ‘Yehova w’emilondo ati: “Munakulusya emoli eyo wabya ukalisirya esyombuli, nitoke erikuyira mo mukulu w’abandu baghe Abaisraeli.
8 Ehosi-hosi eyo ukendisyabya ukaya, ngendisyabya inine haghuma naghu, kandi ngendisyalusya esyonzighu syaghu embere syaghu; ngendisyayira n’erina ryaghu mo rikulu ng’erina ry’abandu abakumayire oko kihugho.
9 Ngendisyasombolera abandu baghe Abaisraeli b’omwanya ogho ngendisyabikalyamo; bakendisyikalayo, sihendisyabya mundu wosi-wosi oyukabakenderaya; sihendisyabya abandu babi abakendisyabaghalya ngoko banabaghalaya kera,
10 eritsuka ekiro nahiriraho abandu baghe Abaisraeli abatsweri. Ngendisyahira esyonzighu syaghu syosi omo byala byaghu. Kandi, ngakubwira ngoko, ‘Ingye Yehova ngendiyira ekihanda kyaghu mo kihanda ky’abami.’*
11 “‘“Omughulu ukendisyaba ukasonda erihola n’omughulu ukendisyaghotera n’abotata-kulu waghu, omwana waghu yo ngendisyayira mo mwami, ngendisyaleka obwami bwiwe ibwasika.
12 Iye yukendisyanihimbira enyumba, kandi ngendisyaleka ekitumbi kiwe ky’obwami ikyasika kera na kera.
13 Ngendisyabya baba wiwe, naye akendisyabya mughala waghe. Sinendisyaleka erimukangania olwanzo lwaghe oluteleghula, ngoko naleka erikanganialo oyo watabala embere syaghu.
14 Ngendisyamuyira mo mwimaniri w’enyumba yaghe, kandi ngendisyamuha obwami kera na kera, n’obwami bwiwe bukendisyabyaho kera na kera.”’”
15 Natani mwabwira Daudi ebinywa byosi ebi n’erimubwira ebyosi ebyo alangira omo nzoli.
16 Neryo omwami Daudi mwayikala ahisi embere sya Yehova. Mwabugha ati: “Yehova Mungu, ingye n’ekihanda kyaghe tunatolere erikolerwa ebyosi ebyo wabiritukolera?
17 Mungu waghe, mukalangira ngoko ebyo sibitosire, kandi mukanibwira ingye mughombe waghu ngoko ekihanda ky’omughombe waghu kikendisyabyaho oko mughulu muli. Yehova Mungu, wabirinilangira ng’omundu oyutolere eritasyahirwa omo mwanya w’endata.
18 Neryo ingye mughombe waghu Daudi ngenditasyabugha kyahi oko lukengerwa olo nabirihabwa, kundi uniasi ndeke?
19 Yehova, muwakola emyatsi mikulu yosi eyi, kandi muwabisulirayo omughombe waghu utoke eriberererya ebyo wabirilagha kandi kundi ryabya risonda ryaghu.*
20 Yehova, sihali oyuli nga we, kandi sihali oMungu oyuli nga we; ebyosi ebyo twabiryowa bikakanganaya ngoko ekyo ni kwenene.
21 Oko kihugho kune ekindi kihanda ekiri ng’abandu baghu Abaisraeli? OMungu w’ekwenene mwayakombolabo batoke eribya bandu biwe. Muwakumayirya erina ryaghu omw’ikola emyatsi mikulu-mikulu n’eyikasaghisaya, muwatibita oko bihanda omo kihugho utoke erihakyo abandu baghu abo wakombola ibane e Misri.
22 Muwayira abandu baghu Baisraeli mo baghu kera na kera; kandi iwe Yehova, muwabya Mungu wabo.
23 Neryo, Yehova, ebyo ulyabugha uti ukendisyakolera omughombe waghu n’ekihanda kiwe bibererere kera na kera, kandi ukole ngoko wabirilagha.
24 Erina ryaghu ribye ry’eriyiketerwa, kandi rihabawe olukengerwa kera na kera, abandu batoke eribugha bati, ‘Yehova w’emilondo, oMungu we Israeli, yo Mungu we Israeli,’ ekihanda ky’omughombe waghu Daudi kibyeho omo mughulu muli embere syaghu.
25 Kundi iwe Mungu waghe, wabirinyibisulira ingye mughombe waghu ngoko wanzire eriyira ekihanda kyaghe mo kihanda ky’abami.* Kyo kyamaleka ingye mughombe waghu inatoka erikusaba.
26 Yehova, iwe Mungu w’ekwenene, wabirinilagha ingye mughombe waghu uti ukendinikolera emyatsi eyi eyuwene.
27 Neryo kisi, utsumule ekihanda kyaghe ingye mughombe waghu, kandi ekihanda kyaghe kibyeho kera na kera embere syaghu, kundi iwe Yehova, wabiritsumulakyo, neryo kikenditsumulwa kera na kera.”
Amaelezo awehikwa
^ Alinga ni bugha ambu, “ingalua ahali ehema eyi inayikala ahali eyindi, kandi ingalua omo mwanya ono inaya omo ghundi.”
^ Kinywa kwa kinywa, “ngendikuhimbira enyumba.”
^ Kutse “erikwamana n’ebyo wanzire.”
^ Kinywa kwa kinywa, “erinihimbira enyumba.”