Emyatsi y’Emighulu y’Erimbere 18:1-17
18 Habere habilaba mughulu mulebe, Daudi mwasinga Abafilistini, mwasingabo kutsibu. Mwahamba omuyi we Gati n’emilongo eyitimbire kugho.
2 Enyuma sy’aho, mwasinga Abamoabu, neryo Abamoabu mubabya baghombe biwe, bamabya bakamuliha engemo.
3 Daudi mwasinga omwami Hadadezeri we Zoba hakuhi ne Hamati. Oko mughulu oyo, Hadadezeri abya akayahira obutabali bwiwe omo kiharo ekiri eyiri Olusi lwe Efrati.
4 Daudi mwamusaghula emitoka 1 000, amahamba n’abalume 7 000 abakaghenda oko syosabayiri,* n’abasuda 20 000 abakaghenda omo bisando. Enyuma sy’aho, mwatwa emiki* y’oko maghulu w’esyosabayiri syosi esyabya sikakura emitoka, aliwe mwatatwa emiki oko syosabayiri 100.
5 Neryo Abasiria be Damasko mubasyawatikya omwami Hadadezeri we Zoba, aliwe Daudi mwita abasuda Basiria 22 000.
6 Enyuma sy’aho, Daudi mwahira esyokambi sy’abasuda e Siria ye Damasko, neryo Abasiria mubabya baghombe biwe, bamabya bakamuliha engemo. Ehosi-hosi eyo Daudi abya akaya, Yehova abya akamuwatikya erisinga.*
7 Kandi, Daudi mwimya esyongabo sy’omuviringo esy’ehoro sy’abasuda ba Hadadezeri, amatwalasyo e Yerualema.
8 Daudi mwaheka n’ekwivre* nene e Tibati ne Kuni, emiyi ya Hadadezeri. Solomona mwakolesya ekwivre eyo erikokotya Engetse y’ekwivre,* esyonduyi, n’ebindu by’ekwivre.
9 Omwami Tou we Hamati mwabya abyowa ngoko Daudi abirisinga abasuda bosi bw’omwami Hadadezeri we Zoba,
10 mwalw’iniatuma mughala wiwe ye Hadoramu ew’omwami Daudi ayamubulaye ng’anuwene, kandi ayamusime busana n’erilwa n’erisinga Hadadezeri (kundi Hadadezeri abya iniakabera erilwa na Tou). Hadoramu mwatwalira Daudi y’ebindu mbiriri-mbiriri by’ehoro, by’efeza,* n’eby’ekwivre.*
11 Neryo omwami Daudi mwaherera Yehova y’ebindu ebyo, ngoko anaherera efeza* n’ehoro ebyo alusaya omo bindi bihanda ebyo asinga, ni bugha ambu, Edomu, Moabu, Abaamoni, Abafilistini, n’Abaamaleki.
12 Abishai mughala wa Zeruya mwita Abaedomu 18 000 omo Musya w’Omunyu.
13 Mwahira esyokambi sy’abasuda e Edomu, neryo Abaedomu bosi mubabya baghombe ba Daudi. Ehosi-hosi eyo Daudi abya akaya oko malwa, Yehova abya akamuwatikya erisinga.*
14 Daudi mwaendelea eritabala Abaisraeli bosi, kandi Daudi abya akatswera abandu omo kwenene n’omo ritunganene.
15 Yoabu mughala wa Zeruya yo wabya mukulu w’abasuda; na Yehoshafati mughala wa Ahiludi yo wabya akahandika ebyabya bikalaba,*
16 Zadoki mughala wa Ahitubu na Amaleki mughala wa Abiatari bo babya bahereri, na Shavsha yo wabya musekretere.
17 Benaya mughala wa Yehoyada yo wabya mukulu w’Abakereti n’Abapeleti. N’abaghala ba Daudi babya b’oko bakulu b’omo bwami bwiwe.
Amaelezo awehikwa
^ Kutse “syofarasi; syoshevale.”
^ Kutse “emisisa.”
^ Kute “akamusabula.”
^ Kutse “n’omulinga.”
^ Kutse “y’omulinga.”
^ Ni kindu ky’obughuli ekikalua omo kitaka.
^ Kutse “n’eby’omulinga.”
^ Ni kindu ky’obughuli ekikalua omo kitaka.
^ Kutse “akamusabula.”
^ Kutse “yo wabya muntombe.”
