Emyatsi y’Emighulu y’Erimbere 19:1-19
19 Habere habilaba mughulu mulebe, Nahashi omwami w’Abaamoni mwahola, neryo omughala wiwe amabya mwami omo mwanya wiwe.
2 Neryo Daudi mwabugha ati: “Ngendikangania Hanuni mughala wa Nahashi olwanzo oluteleghula, kundi baba wiwe mwanikangania olwanzo oluteleghula.” Neryo Daudi mwatuma abaghombe biwe ati bayamukiranaye kundi baba wiwe iniabirihola. Aliwe abaghombe ba Daudi babere babihika omo kihugho ky’Abaamoni bakayakirania Hanuni,
3 abakulu b’Abaamoni mubabwira Hanuni bati: “Ukalengekanaya uti Daudi mwakatuma abaghombe biwe ati basyakukiranaye kundi asikirye baba waghu? Siwasi ngoko mwakatumabo kundi anzire eriminya omuyi ono ng’ali ati atoke eritsandyagho?”
4 Neryo Hanuni mwahamba abaghombe abo Daudi atuma, amatwa esyonderu syabo, aliwe amasighaho sike, kandi mwatwa n’esyongyimba syabo erihika oko matako. Enyuma sy’aho, amababwira ati basubule.
5 Daudi mwabya abyowa ebyo balyakolera abalume biwe, mwalw’iniatuma abandu ati bayahindane n’abaghombe abo atuma kundi babya ibabirihemulwa kutsibu. Omwami Daudi mwabwira abandu abo ati bayababwire bati: “Musighale e Yeriko erihika omughulu eyonderu syenyu sikendisyalasa. Sikendisyabya syabilasa, imwasubula.”
6 Enyuma sy’aho, Abaamoni mubalangira ngoko Daudi abiribapona.* Neryo Hanuni n’Abaamoni mubatuma abandu n’esyotalanta* 1 000 sy’efeza* bayende emitoka n’eriliha abalume abakaghenda oko syosabayiri* abe Mesopotamia,* Arama-maaka, ne Zoba batoke eribawatikya erilwa.
7 Neryo mubaliha emitoka 32 000, bamaliha n’omwami Maaka n’abasuda biwe. Neryo abosi mubayapanga embere sy’omuyi we Medeba. Neryo Abaamoni mubalua omo miyi yabo, bamahindana batoke eriyalwa.
8 Daudi mwabya abyowa omwatsi oyo, mwatuma Yoabu n’abasuda biwe abasi erilwa n’abasuda biwe bosi ati bayalwe n’Abaamoni.
9 Neyo Abaamoni mubasa, bamayipanga busana n’amalwa oko mulango w’omuyi. Aliwe oko mughulu oyo, abami abasa bakasyabawatiya babya ibabirimana hali omo kisuki.
10 Yoabu mwabya abilangira ngoko esyonzighu syamabibasirako embere n’enyuma, mwasombola abasuda balebe b’omo basuda be Israeli abasi erilwa, neryo amapangabo busana n’erilwa n’Abasiria.
11 Mwabugha ati Abishai mughala wabo asondole abandi basuda n’eripangabo busana n’erilwa n’Abaamoni.
12 Enyuma sy’aho, mwabwira Abishai ati: “Abasiria bamakala kunilenga, ighukendisyaniwatikya, aliwe Abaamoni bamabikala kukulenga, naghe ingendisyakuwatikya.
13 Tusike kandi isitwasagha, tulwire oko bandu betu n’emiyi y’oMungu wetu, na Yehova yukendikola ebindi.”
14 Neryo Yoabu n’abasuda biwe mubaseghera embere batoke erilwa n’Abasiria, aliwe Abasiria mubatibita.
15 Abaamoni mubabya babilangira ngoko Abasiria babiritibita, nabo mubasagha Abishai mughala wabo Yoabu, neryo bamayabisama omo muyi. Enyuma sy’aho, Yoabu mwasuba e Yerusalema.
16 Abasiria mubabya babilangira ngoko Abaisraeli babiribasinga, mubatuma abandu bati bayabirikire abandi Basiria ababya omo kiharo ky’Olusi.* Shofaki, omukulu w’abasuda ba Hadadezeri, yo wabya akabasondola.
17 Daudi mwabya abyowa omwatsi oyo, mwalw’iniahindania abasuda bosi be Israeli, amasoka e Yordani, n’eriya eyiri Abasiria n’eripanga abasuda biwe busana n’erilwa nabo. Daudi mwapanga abasuda biwe busana n’erilwa n’Abasiria, n’Abasiria mubalwa naye.
18 Aliwe Abasiria mubasagha Abaisraeli n’eritibita; Daudi mwita mubo mw’abalume 7 000 abakaghendaya emitoka y’amalwa n’abasuda Basiria 40 000 abakaghenda omo bisando, mwita na Shofaki omukulu w’abasuda.
19 Abandu bosi ababya bakakolera Hadadezeri babere babilangira ngoko Abaisraeli babiribasinga, mubalw’ibakola obuholo haghuma na Daudi, bamaligha erimukolera. Eritsuka ekiro ekyo, Abasiria mubatsira eriwatikya Abaamoni.
Amaelezo awehikwa
^ Kinywa kwa kinywa, “babirikumbira Daudi yo muhanda.”
^ Etalanta nguma ini bilo 34,2. Ulebaye Endomeko B14.
^ Ni kindu ky’obughuli ekikalua omo kitaka.
^ Kutse “syosfarasi; syoshevale.”
^ Kinywa kwa kinywa, “Aramu-naharimu.”
^ Ni bugha ambu, “Olusi lwe Efrati.”
