Emyatsi y’Emighulu y’Erimbere 21:1-30
21 Kiro kighuma, Sitani* mwayisogha eryaghalya Abaisraeli, neryo mwakuna Daudi erighanza Abaisraeli.
2 Neryo Daudi mwabwira Yoabu n’abakulu b’abandu ati: “Mughende, muyaghanze abandu be Israeli eritsuka e Beeri-sheba eriyahika e Dani; neryo mukendisyanibwira nitoke eriminya nga ni bangahi.”
3 Aliwe Yoabu mwamubwira ati: “Yehova ayire abandu mo banene ngendo 100! Mukama waghe kandi mwami waghe, abosi abo si ni baghombe baghu. Aliwe busanaki wanzire erikola mwatsi owali ng’oyu? Busanaki ukendileka Abaisraeli ibabyako olubanza?”
4 Aliwe omwami mwakasa Yoabu. Neryo Yoabu mwaghenda, amayalaba-laba omo Israeli yosi; enyuma sy’aho, amasuba e Yerusalema.
5 Neryo Yoabu mwabwira Daudi abandu abalyaghanzawa nga ni bangahi. E Israeli muyabya abasuda 1 100 000 abakalwa omo muyali, ne Yuda muyabya abasuda 470 000 abakalwa omo muyali.
6 Aliwe Yoabu mwataghanza ab’omo kihanda kya Lawi n’ab’omo kihanda kya Benyamini, kundi Yoabu syabya anzire erikola ekyo omwami amusaba ati akole.
7 Ekyo Daudi akola mukyaleka oMungu w’ekwenene iniapona kutsibu, neryo mwita Abaisraeli.
8 Neryo Daudi mwabwira oMungu w’ekwenene ati: “Nabirikola erilolo erikalire omw’ighanza abandu. Neryo kisi, unganyire, ingye mughombe waghu, kundi ekyo niryakola ni bukiru.”
9 Neryo Yehova mwakania na Gadi; Gadi abya mulangiri oyo wabya akahana Daudi. OMungu mwabwira Gadi ati:
10 “Ghenda uyabwire Daudi uti, Yehova akabugha ati: “Usombole oko bindu bisatu ekyo ngendikukolera.”’”
11 Neryo Gadi mwingira omwa Daudi, amamubwira ati: “Yehova ati, ‘Usombole:
12 Wanzire omo kihugho kyaghu imwabya emyaka isatu y’enzala, kutse wanzire esyonzighu syaghu isyakusinga omo misi isatu n’eritibwa omo muyali w’esyonzighu syaghu, kutse wanzire omuyali wa Yehova inyita abandu omo biro bisatu n’omumalaika wa Yehova inialetera abandu bosi be Israeli b’ekihunzo omo biro bisatu ebyo?’ Ulengekanaye ndeke, neryo ukendimbwira ekyo ngendiyabwira oyulyanyituma.”
13 Neryo Daudi mwabwira Gadi ati: “Byamanikenderya kutsibu. Omo mwanya w’omundu eriniha amalipizi, kwanya Yehova iyo wambagho, kundi iye akaghanyira kutsibu.”
14 Enyuma sy’aho, Yehova mwatuma oko Baisraeli kw’ekihunzo, neryo abandu 70 000 be Israeli mubahola.
15 Kandi, oMungu w’ekwenene mwatuma omumalaika ayite abandu be Yerusalema; aliwe Yehova mwabya abilangira ngoko omumalaika oyo akasonda eriita abandu b’omo muyi oyo, mwayikubya b’omo* busana n’obuhanya obo abya akasonda erileta oko muyi oyo, neryo mwabwira omumalaika oyo wabya akita abandu ati: “Lekera aho! Kimaya ebyala byaghu.” Omumalaika wa Yehova abya imene hakuhi n’ekihumbiro kya Ornani Omuyebusi.
16 Daudi mwabya abisumba ameso wiwe, mwalangira omumalaika wa Yehova inianimene omo kati-kati k’ekitaka n’olubula, abya iniabirilolerya omuyali wiwe ebwanga e Yerusalema. Neryo Daudi n’abasyakulu, mubalw’ibambala esyongyimba syabo sy’esyosaki,* bamakukama n’erihira amusu wabo oko kitaka.
17 Daudi mwabwira oMungu w’ekwenene ati: “Si n’ingye niryabugha niti baghanze abandu, n’ingye niryakola erilolo, kandi n’ingye niryakola ekosa, aliwe esyombuli esi sikatakwiraki? Yehova, Mungu waghe, kisi, ingye n’ekihanda kya baba waghe n’itwe uhe amalipizi; aliwe isiwaletera abandu baghu b’obuhanya.”
18 Neryo omumalaika wa Yehova mwabwira Gadi ati ayabwire Daudi ati erukire eyiri ekihumbiro kya Ornani Omuyebusi, ayahimbireyo Yehova y’ekiherero.
19 Neryo Daudi mwahetukirayo ngoko Yehova anamubwira erilabira Gadi.
20 Oko mughulu oyo, Ornani abya inianemuhumba engano, mwabinduka amalangira omumalaika; Ornani abya n’abaghala biwe bani. Omughulu abosi balangira omumalaika oyo, mubayibisa.
21 Ornani mwabya abilangira Daudi n’abaghombe biwe ibanemwasa, mwalw’iniayabakokya, amunama n’erihira obusu bwiwe b’oko kitaka embere sya Daudi.
22 Daudi mwabwira Ornani ati: “Nighulaye* ekihumbiro kyaghu nitoke erihimbiraho Yehova y’ekiherero. Nighulayekyo, ngendikuha esyosi esyo ukendinitswera, obuhanya obukahika oko bandu butoke erihwa.”
23 Aliwe, Ornani mwabwira Daudi ati: “Mukama waghe kandi mwami waghe, kola ngoko wanzire, imayakyo. Ngakuha n’esyonde, wanganahererasyo mo buhere bw’eryokererya. Wamalagha n’oko syongwi, iwimya n’emiti y’erihumbamo. Kandi ngakuha n’engano utoke erihererayo mo buhere bw’akalyo. Ebyosi ebyo namakuhabyo bule.”
24 Aliwe omwami Daudi mwabwira Ornani ati: “Iyehe, ngendikuliha esyosi esyo ukendinitswera, kundi sinendimya ebindu byaghu inahabyo Yehova. Sinendiherera amahere w’eryokererya agho nitalyaghula.”
25 Neryo Daudi mwaha Ornani y’esyoshekeli* 600 sy’ehoro busana n’erighula omwanya oyo.
26 Enyuma sy’aho, Daudi mwahimbiraho Yehova ekiherero, amaherera kukyo kw’amahere w’eryokererya n’amahere w’obuholo. Mwasaba Yehova, naye mwamusubirya omw’ituma omuliro erilua elubula, amatimya amahere awabya oko kiherero.
27 Neryo Yehova mwabwira omumalaika ati asubaye omuyali omo lubo lwagho.
28 Oko mughulu oyo, Daudi mwalangira ngoko Yehova abirimusubirya iniane ahali ekiherero kya Ornani Omuyebusi, kyo kyaleka iniabya akaherera amahere w’aho.
29 Oko mughulu oyo, ehema ya Yehova eyo Musa akokoteraya omo mbwarara n’ekiherero ky’erihererako amahere w’eryokererya byabya omo mwanya w’endata owabya e Gibeoni.
30 Aliwe Daudi mwatatoka eriyayo atoke eriyakania n’oMungu, kundi abya iniabirisagha omuyali w’omumalaika wa Yehova.
Amaelezo awehikwa
^ Kutse alinga, “omupinzani.”
^ Kutse “mwabya omo bulighe.”
^ Kutse “esyopiri syabo; esyongyimba syabo sy’ekiriro.”
^ Kinywa kwa kinywa, “Umba.”
^ Esyekeli nguma ini syograme 11,4. Ulebaye Endomeko B14.
