Emyatsi y’Emighulu y’Erimbere 22:1-19
22 Enyuma sy’aho, Daudi mwabuga ati: “Hano ho hakendibya enyumba ya Yehova oMungu w’ekwenene, kandi hano ho hakendibya ekiherero ekyo Abaisraeli bakendibya bakahererako amahere w’eryokererya.”
2 Neryo Daudi mwabugha ati bahindanaye abandu abate Baisraeli ababya omo kihugho kye Israeli; mwabaha omubiiri w’eritwa amabwe n’eribatsagho, amabwe awakendikolesibwa erihimba ehekalu y’oMungu w’ekwenene.
3 Daudi mwateghekania n’ebyuma binene ebikendiluamo emisumari y’ebihande by’emilango n’ebindu by’erimataniamo, mwateghekania n’ekwivre* nene eyiteyangatokwa eripimwa.
4 Mwateghekania n’emiti y’emierezi eyiteyangatokwa erighanzwa, Abasidoni n’Abatiro mubaletera Daudi y’emiti minene y’emierezi.
5 Daudi mwabugha ati: “Mughala waghe Solomona akine mulere, syalyatalola oko binene, n’enyumba eyikendihimbirwa Yehova yitolere iyabya eyuwene kutsibu, abandu b’omo bihugho byosi batoke eryowa oko lukengerwa lwayo n’oko bubuya bwayo. Kwesi ngendimuteghekanirya ebindu by’erihimbamo.” Neryo Daudi mwateghekania ebindu binene by’erihimbamo embere ahole.
6 Kandi, mwabirikira mughala wiwe Solomona, amamubwira ati ahimbire Yehova Mungu we Israeli y’ehekalu.
7 Daudi mwabwira Solomona ati: “Ingye, nabya nanzire erihimba enyumba eyikendiletera Yehova oMungu waghe y’olukengerwa.
8 Aliwe Yehova mwambwira ati, ‘Mowuta omusasi munene, kandi muwalwa amalwa manene. S’iwe ukendihimba enyumba eyikendiletera erina ryaghe ry’olukengerwa, kundi omo meso waghe mowuta omusasi munene oko kihugho.
9 Hulikirira! Ukendibuta omwana w’obulume, akendisyabya mundu w’obuholo,* ngendisyamwikalya omo buholo omw’imusabula omo byala by’esyonzighu siwe syosi esimutimbireko, ekyo kyo kikendisyaleka iniahulwa mo Solomona.* Omughulu w’obutabali bwiwe, ngendisyaha Abaisraeli b’obuholo n’embolere.
10 Oyo yukendisyahimba enyumba eyikendisyaletera erina ryaghe ry’olukengerwa. Akendisabya mughala waghe, naghe ngendisyabya baba wiwe. Ngendisyaleka obwami bwiwe ibwasika omo Israeli kera na kera.’
11 “Neryo, mughala waghe, Yehova abye haghuma naghu. Namakusunzira ebibuya bisa-bisa omo mubiiri ogho ukendikola. Uhimbe enyumba ya Yehova oMungu waghu ngoko anabugha ati ukendisyakola.
12 Omughulu Yehova akendisyakuyira mo mukulu we Israeli, ngambe iniakuwatikya, ngambe iniakuha amenge n’obutoki bw’eryowa emyatsi yo ndeke, utoke erikwama emighambo ya Yehova, oMungu waghu.
13 Wamabikwama ndeke-ndeke emighambo n’ebyalayiro ebyo Yehova abwira Musa ati ahe Abaisraeli, emyatsi iyikendikughendera ndeke. Isiwasagha kandi usike. Isiwasagha kutse erititimana.
14 Nabiriyikandanga kutsibu nitoke eriteghekanirya enyumba ya Yehova y’esyotalanta* 100 000 sy’ehoro n’esyotalanta 1 000 000 sy’efeza.* Nabiteghekania n’ekwivre* nene n’ebyuma binene ebyo omundu ateangatoka eripima. Nabiriteghekania emiti n’amabwe, naghu ukenditomekako ebindi.
15 Uwite oko bandu banene abakendikola omubiri: Uwite oko abakabatsa amabwe, abamaso abakahimba omo mabwe, abasapate, n’abafundi abasi erikola emibiiri mbiriri-mbiriri.
16 Ehoro, efeza,* ekwivre,* n’ekyuma, ni binene, sibyangatokwa eripimwa. Neryo hangana utsuke omubiiri, Yehova abye haghuma naghu.”
17 Enyuma sy’aho, Daudi mwabwira abakulu bosi be Israeli ati bawatikaye mughala wiwe Solomona. Mwabugha ati:
18 “Yehova oMungu wenyu sy’ane haghuma nenyu, kandi abiribaha obuholo oko syombande syosi. Abiriniyira mo mukulu w’abakalani b’ekihugho, n’ekihugho kyabiribya omo byala bya Yehova n’ebyala by’abandu biwe.
19 Neryo muyisoghe erirondya Yehova oMungu wenyu n’omutima wenyu wosi n’enafsi* yenyu yosi, kandi mutsuke erihimba ehekalu ya Yehova oMungu w’ekwenene, erisanduku ry’endaghane ya Yehova n’ebindu bibuyirire by’oMungu w’ekwenene bitoke eritwalwa omo nyumba eyikendihimbwa busana n’eriletera erina rya Yehova ry’olukengerwa.”
Amaelezo awehikwa
^ Kutse “n’omulinga.”
^ Kinywa kwa kinywa, “w’eriluhuka.”
^ Erina eri rikalua omo kinywa ky’Ekiebrania ekikamaanisaya “obuholo.”
^ Etalanta nguma ini bilo 34,2. Ulebaye Endomeko B14.
^ Ni kindu ky’obughuli ekikalua omo kitaka.
^ Kutse “n’omulinga.”
^ Ni kindu ky’obughuli ekikalua omo kitaka.
^ Kutse “omulinga.”
^ Ulebaye Amaana w’ebinywa.
