Emyatsi y’Emighulu y’Erimbere 23:1-32
23 Omughulu Daudi abya iniabiribya musyakulu kandi iniakasonda erihola, mwayira Solomona mughala wiwe mo mwami we Israeli.
2 Enyuma sy’aho mwahindania abakulu bosi be Israeli, abahereri n’Abalawi.
3 Abalawi ababya n’emyaka eritsuka oko 30 nabo mubaghanzwa; mubaghanzwa mo mughuma-mughuma, neryo abosi mubabya 38 000.
4 Omw’ibo mumwalua abalume 24 000 abakendibya bakimanira emibiiri eyikakolawa omo nyumba ya Yehova, mumwabya n’abalume 6 000 abakendibya bimaniri n’abatsweri,
5 kandi habya n’abalume 4 000 abakendibya bakatsunga emilango, n’abalume 4 000 ababya bakapipa Yehova bakakolesya ebyombo by’omuziki ebyo Daudi abughako ati, “Niryakokotayabyo busana n’eripipa oMungu.”
6 Enyuma sy’aho, Daudi mwapangabo mo bikuto-bikuto erikwamana n’abaghala ba Lawi ababya botata-kulu wabo, ni bughambu, Gershoni, Kohati, na Merari.
7 Abaghala ba Gershoni babya: Ladani na Shimei.
8 Abaghala ba Ladani babya: Yehieli omukulu w’ekihanda, Zetamu, na Yoeli, babya basatu.
9 Abaghala ba Shimeyi babya: Shelomoti, Hazaeli, na Harani, babya basatu. Abo bo babya bakulu b’ebitunga bya Ladani.
10 Abaghala ba Shimei babya: Yahati, Zina, Yeusi, na Beria. Abalume bani abo babya baghala ba Shimei.
11 Yahati abya mukulu, na Ziza yo wabya amusubukire. Aliwe kundi Yeusi na Beria mubatabuta abana banene b’obulume, mubaghanzwa mo kitunga kighuma ekyabya kikakola omubiiri mughumerera.
12 Abaghala ba Kohati babya: Amramu, Izhari, Hebroni, na Uzieli, babya bani.
13 Abaghala ba Amramu babya: Haruni na Musa. Aliwe Haruni mwasombolwa olosi atoke eribya akayira ahabuyirire kutsibu mo habuyirire, iye n’abaghala biwe, atoke eribya akaherera amahere embere sya Yehova, atoke eribya akamukolera, kandi atoke eribya akatsumula abandu omo rina liwe kera na kera.
14 Aliwe abaghala ba Musa, omundu w’oMungu w’ekwenene, mubaghanzirwa omo kihanda ky’Abalawi.
15 Abaghala ba Musa babya: Gershomu na Eliezeri.
16 Shebueli yo wabya mukulu w’ekihanda ky’abaghala ba Gershomu.
17 Rehabia yo wabya mukulu w’ekihanda kya Eliezeri; Eliezeri mwatabuta abandi bana b’obulume, aliwe abaghala ba Rehabia babya banene kutsibu.
18 Shelomiti yo wabya mukulu w’ekihanda kya Izhari.
19 Abaghala ba Hebroni babya Yeria omukulu w’ekihanda, Amaria yo wabya amusubukire, Yahazieli yo wabya w’akasatu, na Yekameamu yo wabya w’akani.
20 Abaghala ba Uzieli babya: Mika omukulu w’ekihanda, na Ishiya yo wabya amusubukire.
21 Abaghala ba Merari babya: Mali na Mushi. Abaghala ba Mali babya: Eleazari na Kishi.
22 Eleazari mwahola isyalyatayira oko bana b’obulume, abya n’abambesa basa-basa. Neryo abaghala ba Kishi, abatunga* babo, bo babatahaya.
23 Abaghala ba Mushi babya: Mali, Ederi, na Yeremoti, babya basatu.
24 Abo bo baghala ba Lawi abaghanzawa erikwamana n’ebitunga byabo, n’erikwamana n’abakulu b’ebitunga byabo; Abalawi ab’emyaka eritsuka oko 20 mubaghanzwa, n’amena wabo mwahandikwa. Ibo bo babya bakakola emibiiri eyabya ikakolwa oko nyumba ya Yehova.
25 Kundi Daudi mwabugha ati: “Yehova oMungu we Israeli abiriha abandu biwe b’obuholo, kandi akendisyikala e Yerusalema kera na kera.
26 Kandi Abalawi sibendisyasyaheka ehema kutse ekindu kyosi-kyosi ekikakolesibawa eyiri ehema.”
27 Neryo erikwamana n’ebyalayiro by’omwiso-mwiso ebyo Daudi ateka, Abalawi eritsuka oko myaka 20 mubaghanzwa.
28 Babya bakawatikya abaghala ba Haruni erikola omubiiri omo nyumba ya Yehova, bo babya bakasugha ebibugha, ebyumba by’eriliramo, bo babya bakerya ebindu byosi bibuyirire, n’erikola omubiiri wosi-wosi owabya akakolwa omo nyumba y’oMungu w’ekwenene.
29 Babya bakawatikya eriteghekania emikati eyitomengekene,* efarine eyuwene eyikendibya buhere bw’akalyo, esyogalete esitemo levire,* esyogato esikahukawa oko pano, efarine eyitswangene, kandi ibakawatikaya eripima obuli kindu.
30 Ibakabyaho omo buli tututu n’omo buli righolo-gholo busana n’erisima Yehova n’erimupipa.
31 Ibakawatikaya oko mubiiri w’eriherera Yehova y’amahere w’eryokererya ekiro ky’Esabato, ekiro ky’omughenda muhya-muhya, n’omughulu w’ebiro bikulu, erikwamana n’emighanzo eyiri omo byalayiro ebilebirye emyatsi eyo. Ibakakola omubiiri oyo embere sya Yehova buli kiro.
32 Kandi ibakakola emibiiri eyilebirye ehema y’erihindanamo n’ahabuyirire, kandi ibakawatikaya abaghala babo, abaghala ba Haruni erikola emibiiri eyikakolawa omo nyumba ya Yehova.
Amaelezo awehikwa
^ Kinywa kwa kinywa, “abaghala.”
^ Ni bugha ambu, emikati y’erikangania.
^ Kutse “kihamya.”
