Emyatsi y’Emighulu y’Erimbere 26:1-32
26 Bino by’ebikuto by’ababya bakatsunga emilango: Omo Bakohati mwabya Meshelemia mughala wa Kora oyo wabya mwitsikulu wa Asafu.
2 Abaghala ba Meshelemia ba bano: Zekaria akambere, Yediaeli ow’akabiri, Zebadia ow’akasatu, Yatnieli ow’akani,
3 Elamu ow’akatano, Yehoanani owe 6, Eliehoenai owe 7.
4 Abaghala ba Obedi-edomu babya: Shemaya akambere, Yehozabadi ow’akabiri, Yoa ow’akasatu, Sakari ow’akani, Netaneli ow’akatano,
5 Amieli owe 6, Isakari owe 7, Peuletai owe 8; kundi oMungu mwatsumula Obedi-edomu.
6 N’omughala wiwe Shemaya mwabuta abana b’obulume ababya bakulu b’ebitunga byabo, kundi babya bandu b’amaka n’ab’obutoki.
7 Abaghala ba Shemaya babya: Otni, Refaeli, Obedi, na Elizabadi; habya n’abaghala babo Shemaya, ye Elihu na Semakia; nabo babya balume b’obutoki.
8 Abosi abo babya bana ba Obedi-edomu; ibo, abana babo b’obulume, n’abaghala babo babya balume b’obutoki kandi abasi erikola omubiiri, babya bitsikulu 62 ba Obedi-edomu.
9 Na Meshelemia abya n’abana b’obulume n’abaghala babo, babya balume 18 b’obutoki.
10 Habya Hosa w’omo baghala ba Merari, oyo wabya n’abana b’obulume. Shimri abya mukulu, kundi nomo anabya isiyo kambere, baba wiwe mwamuyira mo mukulu,
11 Hilkia yo wabya w’akabiri, Tebalia ow’akasatu, Zekaria ow’akani. Abana bosi b’obulume n’abaghala babo Hosa babya 13.
12 Omo bikuto ebyo by’ababya bakatsunga emilango, abakulu mubahabwa emibiiri y’erikola ng’abaghala babo, batoke erikolera omo nyumba ya Yehova.
13 Neryo mubakola obukanga batoke eriminya abakenditsunga obuli mulango omo bitunga, bangabya balere kutse bakulu.
14 Obukanga mubwakangania ngoko Shelemia yukendibya oko luhande lw’eyo ryuba rikasira. Mubakola n’obukanga busana n’omughala wiwe ye Zekaria, omuhani w’amenge, n’obukanga mubwakangania ngoko akendibya oko luhande lw’endata.
15 Obukanga mubwakangania ngoko Obedi-edomu akendibya oko luhande lw’eyikwa, n’abaghala biwe mubahabwa omubiiri w’eritsunga amadepo.
16 Obukanga mubwakangania ngoko Shupimu na Hosa bakendibya oko luhande lw’eyo ryuba rikalengera, hakuhi n’Olukyo lwa Shaleketi, hakuhi n’enzira nene eyikeruka, ekikuto ky’abya hakuhi n’ekindi kikuto ky’abakatsunga;
17 habya Abalawi 6 oko luhande lw’eyo ryuba rikasira; obuli kiro oko luhande lw’endata ikukabya Abalawi bani, obuli kiro oko luhande lw’eyikwa ikukabya Abalawi bani, n’oko madepo ihakabya babiri hakuhi n’abandi babiri;
18 ahali esyonduyi oko luhande lw’eyo ryuba rikalengera, habya Abalawi bani ababya hakuhi n’enzira nene, n’ababiri babya ahali esyonduyi.
19 Ebyo by’ebikuto by’ababya bakatsunga emilango ababya b’omo baghala ba Kohati n’Abamerari.
20 Omo Balawi, Ahiya abya imanire ebyumba by’erihiramo ebindu by’obughuli by’enyumba y’oMungu w’ekwenene n’ebyumba ebyo babya bakabikamo ebindu ebiryayirawa mo bibuyirire.*
21 Abaghala ba Ladani babya: Abaghala ba Gershoni ababya abitsikulu ba Ladani, abakulu b’ebitunga ababya bitsikulu ba Ladani Omugershoni, Yehieli,
22 n’abaghala ba Yehieli, ye Zetamu n’omughala wabo, ye Yoeli. Babya bimanire ebindu by’obughuli by’omo nyumba ya Yehova.
23 Omo Baamramu mwabya: Abaizhari, Abahebroni, n’Abauzieli,
24 Shebueli, mughala wa Gershomu, mughala wa Musa, abya mukulu oyo wabya imanire amadepo.
25 Omo baghala babo Shebueli, oyo wabya mwitsikulu wa Eliezeri, mwabya: Mughala wiwe ye Rehabia, mughala wiwe ye Yeshaya, mughala wiwe ye Yoramu, mughala wiwe ye Zikri, n’omughala wiwe ye Shelomoti.
26 Ye Shelomoti oyu n’abaghala babo bo babya bimanire ebyumba ebyo babya bakabikamo ebindu ebyayirawa mo bibuyirire, ebyo omwami Daudi, abakulu b’ebitunga, abakulu b’amaelfu, abakulu b’amamia n’abakulu b’abasuda bayira mo bibuyirire.
27 Mubayira ebindu bilebe ebyo banyegha omo malwa mo bibuyirire, bitoke eribya bikasugha enyumba ya Yehova.
28 Habya n’ebindu byosi ebyo Samweli omulangiri, Sauli mughala wa Kishi, Abneri mughala wa Neri, na Yoabu mughala wa Zeruya bayira mo bibuyirire. Shelomiti n’abaghala babo bo babya bakatsunga ebindu byosi ebyayirawa mo bibuyirire.
29 Omo Baizhari, Kenania n’abaghala biwe mubahabwa omubiiri w’erikolera ehihya w’enyumba y’oMungu. Babya bimaniri n’abatsweri omo Israeli.
30 Omo Bahebroni, Hashabia n’abaghala babo, abalume 1 700 b’obutoki, babya bakimanira Abaisraeli omo kiharo ekyabya oko luhande lw’eyo ryuba rikalengera lwe Yordani. Babya bakimanira omubiiri wosi ogho bandu babya bakakolera Yehova n’ogho bandu babya bakakolera omwami.
31 Omo Bahebroni, Yeriya abya mukulu w’Abahebroni erikwamana n’amena wabo ngoko ahandikire omo bitabu by’amena w’ab’omo bihanda byabo. Omo mwaka we 40 w’obutabali bwa Daudi, mubakwesa-kwesa emyatsi, neryo bamasunga omo kati-kati kabo mw’abalume b’amaka n’ab’obutoki, e Yazeri omo kiharo kye Gileadi.
32 N’abatunga babo Yeriya babya 2 700. Babya balume b’obutoki, babya bakulu b’ebitunga. Neryo omwami Daudi mwaha Abarubeni, Abagadi, n’enusu y’ekihanda ky’Abamanase omubiiri w’erimanira emyatsi yosi eyilebirye oMungu w’ekwenene n’emyatsi yosi eyilebirye omwami.
Amaelezo awehikwa
^ Kutse “ebindu ebiryahererawa.”
