Emyatsi y’Emighulu y’Erimbere 27:1-34
-
Abakulu ababya bakakolera omwami (1-34)
27 Eno y’emighanzo y’Abaisraeli, ni bugha ambu, y’abakulu b’ebitunga, abakulu b’amaelfu n’abakulu b’amamia, n’abimaniri babo ababya bakakolera omwami. Babya bakimanira obuli mwatsi owalebirye ebikuto ebyabya bikakombolana obuli mwisi omo misi yosi y’omwaka; omo buli kikuto mwabya abandu 24 000.
2 Yoshebeamu mughala wa Zabdieli yo wabya imanire ekikuto ky’erimbere ekyabya kikakola omubiiri oko mwisi w’erimbere w’omwaka, omo kikuto kiwe mwabya abalume 24 000.
3 Abya mughala wa Perezi, abya akimanira abakulu bosi b’ebikuto ebyabya bikakola omubiiri wabyo oko mwisi w’erimbere.
4 Dodai Omuahohi yo wabya akimanira ekikuto ekyabya kikakola omubiiri oko mwisi w’akabiri, omo kikuto kiwe mwabya abalume 24 000, na Mikloti yo wabya musondoli.
5 Omukulu w’ekikuto ky’akasatu ekyabya kikakola omubiiri oko mwisi w’akasatu abya Benaya mughala w’omuhereri mukulu Yehoyada, omo kikuto kiwe mwabya abalume 24 000.
6 Benaya oyu abya musuda w’amaka, abya w’oko basuda 30, kandi abya akasondolabo. Oyo wabya imanire ekikuto kiwe abya Amizadabu mughala wiwe.
7 Omukulu w’ekikuto ky’akani ekyabya kikakola omubiiri oko mwisi w’akani abya Asaheli mughala wabo Yoabu. Enyuma sy’aho, mughala wiwe Zebadia mwamusubuka; omo kikuto kiwe mwabya abalume 24 000.
8 Omukulu w’ekikuto ky’akatano ekyabya kikakola omubiiri oko mwisi w’akatano abya Shamuti Omuizrahi; omo kikuto kiwe mwabya abalume 24 000.
9 Omukulu w’ekikuto kye 6 ekyabya kikakola omubiiri oko mwisi we 6 abya Ira mughala wa Ikeshi Omutekoa; omo kikuto kiwe mwabya abalume 24 000.
10 Omukulu w’ekikuto kye 7 ekyabya kikakola omubiiri oko mwisi we 7 abya Helezi Omupeloni, Omuefraimu; omo kikuto kiwe mwabya abalume 24 000.
11 Omukulu w’ekikuto kye 8 ekyabya kikakola omubiiri oko mwisi we 8 abya Sibekai Omuhushati, Omuzerahi; omo kikuto kiwe mwabya abalume 24 000.
12 Omukulu w’ekikuto kye 9 ekyabya kikakola omubiiri oko mwisi we 9 abya Abiezeri Omuanatoti, Omubenyamini; omo kikuto kiwe mwabya abalume 24 000.
13 Omukulu w’ekikuto kye 10 ekyabya kikakola omubiiri oko mwisi we 10 abya Maharai Omunetofati, Omuzerahi; omo kikuto kiwe mwabya abalume 24 000.
14 Omukulu w’ekikuto kye 11 ekyabya kikakola omubiiri oko mwisi we 11 abya Benaya Omupiratoni, Omuefraimu; omo kikuto kiwe mwabya abalume 24 000.
15 Omukulu w’ekikuto kye 12 ekyabya kikakola omubiiri oko mwisi we 12 abya Heldai Omunetofati, omwitsikulu wa Otnieli; omo kikuto kiwe mwabya abalume 24 000.
16 Aba bo babya basondoli b’ebihanda bya Israeli: Omo kihanda kya Rubeni, omusondoli abya Eliezeri mughala wa Zikri; omo kihanda kya Simeoni, Shefatia mughala wa Maaka;
17 omo kihanda kya Lawi, Hashabia mughala wa Kemueli; omo bitsikulu ba Haruni, Zadoki;
18 omo kihanda kya Yuda, Elihu, omughuma w’oko baghala babo Daudi; omo kihanda kya Isakari, Omri mughala wa Mikaeli;
19 omo kihanda kya Zabuloni, Ishmaya mughala wa Obadia; omo kihanda kya Naftali, Yeremoti mughala wa Azrieli;
20 omo kihanda kya Efraimu, Hoshea, mughala wa Azazia; omo nusu y’ekihanda kya Manase, Yoeli mughala wa Pedaya;
21 omo nusu y’ekihanda kya Manase eyabya omo kiharo kye Gileadi, Ido mughala wa Zekaria; omo kihanda kya Benyamini, Yaasieli mughala wa Abneri;
22 omo kihanda kya Dani, Azareli mughala wa Yerohamu. Abo bo babya bakulu b’ebihanda bye Israeli.
23 Daudi mwataghanza ababya n’emyaka 20 n’erindaghala, kundi Yehova abya iniabirilagha eriyira Abaisraeli mo banene ng’esyongununu sy’elubula.
24 Yoabu mughala wa Zeruya mwatsuka erighanza abandu, aliwe mwatabugha erighanzabo; kandi oMungu mwahitana oko Baisraeli busana n’omwatsi oyo, neryo emighanzo eyo muyitahirwa omo kitabu ky’emighulu y’omwami Daudi.
25 Azmaveti mughala wa Adieli yo wabya akimanira ebyumba by’eribikamo ebindu by’obughuli by’omwami. Yonatani mughala wa Uzia yo wabya akimanira amadepo awabya eyiri amalima, awabya omo miyi, omo milongo, n’omo manyumba mali-mali.
26 Ezri mughala wa Kelubu yo wabya akimanira abalimi.
27 Shimei owe Rama yo wabya akimanira amalima w’emizabibu; Zabdi Omushifmi yo wabya akimanira amadepo agho babya bakabikamo edivai.
28 Balhanani Omugederi yo wabya akimanira amalima w’emizeituni n’emikuyu ye Shefela. Yoashi yo wabya akimanira amadepo w’amaghuta.
29 Shitrai we Sharoni yo wabya akimanira ebihangulo by’esyonde ebyabya omo biharo by’erilisiryamo bye Sharoni. Shafati mughala wa Adlai yo wabya akimanira ebihangulo by’esyonde ebyabya omo mabanda.
30 Obili Omuismaeli yo wabya akimanira esyongamia. Yedeya Omumeronoti yo wabya akimanira esyopunda.*
31 Yazizi Omuhagri yo wabya akimanira esyombuli. Abosi abo bo babya bakulu ababya bakimanira ebindu by’Omwami Daudi.
32 Yonatani, omuhwa wa Daudi, abya muhani; abya mulume w’amenge kandi abya musekretere. Yehieli mughala wa Hakmoni yo wabya akatsunga abaghala b’omwami.
33 Ahitofeli yo wabya muhani w’omwami, Hushai Omuarki abya mwira w’omwami.*
34 Abahani abasubuka Ahitofeli babya Yehoyada mughala wa Benaya, na Abiatari; Yoabu abya mukulu w’abasuda b’omwami.
Amaelezo awehikwa
^ Kinywa kwa kinywa, “esyopunda sy’obukali.”
^ Kutse “mundu oyo mwami abya ayiketere.”
