Emyatsi y’Emighulu y’Erimbere 28:1-21
28 Neryo Daudi mwahindania abakulu bosi be Israeli e Yerusalema, ni bugha ambu, abakulu b’ebihanda, abakulu b’ebikuto ebyabya bikakolera omwami, abakulu b’amaelfu n’abakulu b’amamia, abimaniri b’ebindu byosi n’esyonyama sy’omwami n’abimaniri b’ebindu n’esyonyama sy’abaghala biwe, n’abakulu ababya bakakolera oko bwikalo bw’omwami, n’abalume bosi b’amaka n’ab’obutoki.
2 Neryo omwami Daudi mwahangana, amabugha ati:
“Baghala betu kandi bandu baghe, munihulikirire. Nabya nanzire erihimba enyumba eyikendibya ikabyamo erisanduku ry’endaghane ya Yehova n’eyikendibya ekindu ky’oMungu wetu ky’erihirako ebisando, kandi nilue inabiriteghekania ebindu ebyo abandu bakendikolesya erihimbayo.
3 Aliwe oMungu w’ekwenene mwakanibwira ati, ‘S’iwe ukendisyahimba enyumba eyikendisyaletera erina ryaghe ry’olukengerwa, kundi uli mundu w’amalwa, kandi mowuta omusasi.’
4 Aliwe, Yehova oMungu we Israeli mwanisombola omo kihanda kyosi kya baba waghe nitoke eribya mwami we Israeli kera na kera, kundi mwasombola Yuda atoke eribya musondoli, n’omo kihanda kya Yuda, mwasombola ekihanda kya baba waghe, n’omo baghala ba baba waghe, n’ingye aligha eriyira mo mwami we Israeli yosi.
5 N’omo baghala baghe bosi, kundi Yehova mwamba abana b’obulume bangyi, mwasombola mughala waghe Solomona atoke erikala oko kitumbi ky’obwami kya Yehova n’eritabala e Israeli.
6 “Mwanibwira ati, ‘Mughala waghu Solomona yukendisyahimba enyumba yaghe n’ebibugha byaghe, kundi nabirimusombola mo mughala waghe, naghe ngendisyabya baba wiwe.
7 Ngendisyawatya obwami bwiwe bo kera na kera amabikwama n’omutima wosi emighambo yaghe n’ebyalayiro byaghe, ngoko anemukola lino.’
8 Neryo ngabugha embere sy’Abaisraeli bosi, ni bugha ambu, endeko ya Yehova, n’oMungu wetu inianowire niti: Muyikase eriminya emighambo yosi ya Yehova Mungu wetu n’erikolesyayo ndeke-ndeke, mutoke erikala omo kihugho eki ekyuwene n’erisighirakyo abana benyu m’omwandu wa kera na kera.
9 “Naghu mughala waghe Solomona, uminye oMungu wa baba waghu kandi umukolere n’omutima wosi kandi n’omutima owanzire,* kundi Yehova akalebaya ebiri omo mitima yosi, kandi akalangira amalengekania wosi w’omundu. Wamabimusondya, isyendikubisama.* Aliwe wamabimuleka, iniakendikulekerania olosi.
10 Yehova abirikusombola erihimba enyumba eyikendibya mwanya owabuyirire. Neryo sighubahe, kandi ukole omubiiri.”
11 Enyuma sy’aho, Daudi mwaha mughala wiwe Solomona y’epla y’obuhimbe eyo akendikwama akahimba ebaraza n’ebyumba mbiriri-mbiriri by’ehekalu, amadepo, ebyumba by’omo lutwe, ebyumba by’emwisi-mwisi, n’ekyumba ekirimo ekikuningo ky’erisanduku ry’endaghane.*
12 Mwamuha epla y’obuhimbe y’ebyosi ebyo ekirimu ky’oMungu kyamubwira, epla y’obuhimbe y’ebibugha by’enyumba ya Yehova, y’ebyumba byosi by’eriliramo ebikenditimba oko hekalu, y’ebyumba by’eribikamo ebindu by’obughuli by’enyumba y’oMungu w’ekwenene, n’ey’ebyumba by’eribikamo ebindu ebyabiriyirwa mo bibuyirire.*
13 Mwamuha n’ebyalayiro ebilebirye ebikuto by’abahereri n’eby’Abalawi, ebilebirye emibiiri yosi eyikendibya ikakolwa omo nyumba ya Yehova, n’ebilebirye ebindu byosi ebikendibya bikakolesibwa omo mubiiri owakendibya akakolwa omo nyumba ya Yehova;
14 Kandi mwamubwira ng’akendikolesya ehoro nyingahi akakokotya ebindu byosi ebikendibya bikakolesibwa omo mibiiri mbiriri-mbiriri, amamubwira ng’akendikolesya efeza* nyingahi akakokotya ebindu byosi by’efeza ebikendibya bikakolesibwa omo mibiiri mbiriri-mbiriri;
15 mwamubwira ng’akendikolesya n’ehoro nyingahi akakokotya ebindu by’erihirako esyotala eby’ehoro n’esyotala syako sy’ehoro, amamubwira obulito bw’ebindu mbiriri-mbiriri eby’erihirako esyotala n’esyotala syako, kandi amamubwira ng’akendikolesya efeza* nyingahi akakokotya ebindu by’erihirako esyotala eby’efeza, amamubwira obulito b’obuli kindu ky’erihirako esyotala n’obw’esyotala sya kukyo erikwamana ngoko kikendibya kikakolesibwa;
16 mwamubwira ng’akendikolesya ehoro nyingahi akakokotya esyomesa esikendibya sikahirwako emikati eyitomengekene,* mwamubwira ng’akendikolesya ehoro nyingahi oko buli mesa, kandi ng’akendikolesya efeza* nyingahi erikokotya esyomesa sy’efeza,
17 mwamubwira ng’akendikolesya ehoro nyingahi akakakokotya esyokanya, ebibakuli,* esyobinika sy’ehoro eyabiryeribwa, obulito bw’ebibakuli bike-bike by’ehoro, obulito bw’obuli kibakuli kike, amamubwira ng’akendikolesya efeza nyingahi akakokotya ebibakuli bike-bike by’efeza,* amamuha obulito bw’efeza eyikendikolesibwa erikokotya obuli kibakuli kike-kike.
18 Kandi mwamubwira ng’akendikolesya ehoro nyingahi eyabiryeribwa akakokotya ekiherero ky’obukwa n’ekisosekanio ky’omutoka, ni bugha ambu, abakerubi b’ehoro abasanzire ebipupa byabo eriswika mubyo mw’erisanduku ry’endaghane ya Yehova.
19 Daudi mwabugha ati: “Ebyala bya Yehova byabya okw’ingye, mwamba amenge nitoke erihandika ebyosi ebiri oko pla y’obuhimbe.”
20 Enyuma sy’aho, Daudi mwabwira mughala wiwe Solomona ati: “Sighubahe kandi ubye n’akaghala, ukole omubiiri. Isiwasagha kutse erititimana, kundi Yehova Mungu, oMungu waghe, ane haghuma naghu. Syendisyakusighania kutse erikulekerania, aliwe akendisyabya iniane haghuma naghu erihika omughulu omubiiri wosi w’erihimba enyumba ya Yehova akendisyahwa.
21 Kandi bino byo bikuto by’abahereri n’abalawi abakendikola emibiiri yosi eyilebirye enyumba y’oMungu w’ekwenene. Unawite n’oko bandu abanzire erikola omubiiri kandi abasi erikolagho, abakendikola emibiiri yosi. Unawite n’oko bakulu n’abandu bosi abakendikwama ebyosi ebyo ukendibabwira.”
Amaelezo awehikwa
^ Kutse “n’enafsi eyanzire.” Ulebaye Amaana w’ebinywa.
^ Kinywa kwa kinywa, “iniakendileka iwamusunga.”
^ Kutse “ekyumba ky’erihanuliramo.”
^ Kutse “ebiryahererawa.”
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Ni bugha ambu, emikati y’erikangania.
^ Ni kindu ky’obughuli ekikalua omo kitaka.
^ Kutse “ebibindi.”
^ Ni kindu ky’obughuli ekikalua omo kitaka.
