Emyatsi y’Emighulu y’Erimbere 29:1-30
29 Neryo omwami Daudi mwabwira abandu bosi ababya bahindene ati: “Mughala waghe Solomona, oyo oMungu alyasombola, akine mulere kandi syalyalola oko bingyi,* n’omubiiri ogho akendikola ni munene, kundi ehekalu eyikendihimbwa si y’omundu aliwe ni ya Yehova Mungu.
2 Nabiriyikandanga kutsibu eriteghekania ebikendihimba enyumba y’oMungu waghe, nabiriteghekania ehoro busana n’ebindu ebikendikokotibwa omo hoho, efeza* busana n’ebindu ebikendikokotibwa omo feza, ekwivre* busana n’ebindu ebikendikokotibwa omo kwivre, ekyuma busana n’ebindu ebikendikokotibwa omo kyuma, emiti busana n’ebindu ebikendikokotibwa omo miti, amabwe w’eoniksi, n’amabwe awakendiya omo sima, ehibwe hike-hike hy’esorangyi-rangyi ehy’eripambamo, amabwe wosi w’obughuli, n’amabwe manene w’ealabasta.
3 Kandi, kundi nanzire enyumba y’oMungu waghe, ngimaya n’oko horo yaghe n’efeza* yaghe, ngatekabyo busana n’enyumba y’oMungu waghe, ngatomeka oko byosi ebyo nabiriteghekania busana n’enyumba eyo nyibuyirire.
4 Ebyo ngateka bya bino: Esyotalanta* 3 000 sy’ehoro ye Ofiri, esyotalanta 7 000 sy’efeza* eyabirieribwa, bikendihakwa oko syombimbo sy’enyumba.
5 Ehoro ikendikolesibwa erikokotya ebindu by’ehoro, n’efeza* erikotya ebindu by’efeza n’ebyosi ebikendikolwa n’abafundi. Neryo nindi omw’inywe oyo wanzire eriha Yehova y’ekihembo munabwire?”
6 Neryo abakulu b’ebitunga, abakulu b’ebihanda bye Israeli, abakulu b’amaelfu n’abakulu b’amamia, n’abakulu ababya bakimanira emyatsi y’omwami mubaleta ebihembo byabo omw’anza.
7 Ebihembo ebyo bateka busana n’erihimba enyumba y’oMungu w’ekwenene bya bino: Esyotalanta 5 000 sy’ehoro, esyodariki* 10 000, esyotalanta 10 000 sy’efeza,* esyotalanta 18 000 sy’ekwivre,* n’esyotalanta 100 000 sy’ekyuma.
8 Omundu wosi-wosi oyo wabya n’amabwe w’obughuli mwaletagho atoke erihirwa omo depo y’eribikamo ebindu by’obughuli by’enyumba ya Yehova. Yehieli Omugershoni yo wabya imanire edepo eyo.
9 Abandu mubatsema bakateka ebihembo omw’anza ryabo, kundi ebihembo ebyo by’eriteka omw’anza babya bakahererabyo Yehova n’omutima wabo wosi, n’omwami Daudi naye mwatsema kutsibu.
10 Enyuma sy’aho, Daudi mwapipa Yehova embere sy’abandu bosi ababya bahindene. Mwabugha ati: “Yehova, oMungu wa baba wetu Israeli, apipawe kera na kera.*
11 Yehova, obukulu, obutoki, obubuya, olukengerwa, n’obusike ni byaghu, kundi ebindu byosi ebiri elubula n’ebiri oko kihugho ni byaghu. Yehova, obwami ni bwaghu, n’iwe mutabali mukulu oko bosi.
12 Obuteke n’olukengerwa bikalua okw’iwe, kandi ukatabala obuli kindu, ebyala byaghu biri n’akaghala n’obutoki, kandi ebyala byaghu biri n’obutoki bw’eriyira omundu mo mukulu n’eriha abandu bosi b’akaghala.
13 Neryo lino, Mungu wetu, tukakuha ewasingya n’eripipa erina ryaghu ribuya.
14 “Ingye niri ndi, n’abandu baghe ni bahi, tutoke eriherera amahere awali ng’aya omw’anza ryetu? Obuli kindu kikalua okw’iwe, n’ekyo tulyakuha kiryalua omo byala byaghu.
15 Kundi embere syaghu, tuli bagheni kandi abakahuma-huma, ng’abotata-kulu wetu bosi. Kundi ebiro byetu hano h’oko kihugho biri ng’ekitsutsu, situwite amaha.
16 Yehova, Mungu wetu, obuteke bosi obu obo tulyateghekanaya tutoke erikuhimbira enyumba busana n’erina ryaghu ribuyirire bulyalua omo byala byaghu, kandi obuteke bosi obo ni bwaghu.
17 Mungu waghe, ninasi ndeke-ndeke ngoko ukalebaya ebiri omo mutima, kandi ngoko ukanza omundu oyuluyirirene.* Niryakuherera ebyosi ebi n’omutima ow’erire kandi omw’anza ryaghe, kandi mungatsema kutsibu erilangira abandu baghu abali hano bakakuha ebihembo omw’anza ryabo.
18 Yehova, oMungu wa Abrahamu, wa Isaka, na Israeli, abotata-kulu wetu, uwatikaye abandu baghu batoke eribya n’omutima oyo n’amalengekania ayo mughulu wosi, kandi omutima wabo atoke eribya okw’iwe kera na kera.
19 Uwatikaye n’omughala waghe Solomona atoke erikukolera n’omutima wiwe wosi, atoke erikwama emighambo yaghu, ebibukyo byaghu, n’ebyalayiro byaghu, n’erikola emyatsi yosi eyi n’erihimba ehekalu eyo niryateghekaniraya ebindu.”
20 Enyuma sy’aho, Daudi mwabwira abandu bosi ababya bahindene ati: “Neryo lino, mupipe Yehova oMungu wenyu.” Neryo abandu bosi ababya bahindene mubapipa Yehova oMungu w’abotata-kulu wabo; mubakukama n’erihira obusu bwabo oko kitaka embere sya Yehova n’embere sy’omwami.
21 Ekiro ekyo n’omo kiro ekikwamire, mubaherera Yehova y’amahere kandi bamaherera Yehova n’amahere w’eryokererya. Mubaherera esyonume sy’esyonde esikine nyilere 1 000, esyombangale 1 000, ebyana by’esyombuli by’obulume 1 000, n’ebihembo by’obwabu by’oko syonyama esyo; mubaherera amahere mangyi busana n’Abaisraeli bosi.
22 Mubaendelea erirya n’erinywa ekiro ekyo embere sya Yehova ibanemutsema kutsibu, kandi mubayira Solomona mughala wa Daudi mo mwami engendo y’akabiri. Mubamuhirako amaghuta embere sya Yehova atoke eribya musondoli, mubahira n’oko Zadoki kw’amaghuta atoke eribya muhereri.
23 Neryo Solomona mwikala oko kitumbi ky’obwami kya Yehova atoke eribya mwami omo mwanya wa baba wiwe Daudi. Ebyosi ebyo abya akakola byabya bikaghenda ndeke, n’Abaisraeli bosi ibakamwowa.
24 Abakulu bosi, abasuda bosi b’amaka, n’abaghala bosi b’omwami Daudi ibakakwama obusondoli bw’omwami Solomona.
25 Yehova mwayira Solomona mo mukulu kutsibu embere sy’Abaisraeli bosi, mwamuha olukengerwa olo abami bakabya nalo olulengire olukengerwa lw’omwami wosi-wosi we Israeli oyo watabala embere siwe.
26 Daudi mughala wa Yese kw’atabala atya e Israeli yosi.
27 Mwatabala e Israeli omo myaka 40. Mwatabala emyaka 7 iniane e Hebroni, n’emyaka 33 iniane e Yerusalema.
28 Daudi mwahola iniabiribugha emyaka minene, mwabya n’engebe nyiri, obuteke bunene, n’olukengerwa lunene. Neryo mughala wiwe Solomona mwabya mwami omo mwanya wiwe.
29 Emyatsi eyilebirye omwami Daudi, eritsuka oko mwanzo, yinahandirire omo bitabu by’omulangiri Samweli, by’omuminyereri Natani, n’ebyo mulangiri w’esyonzoli ye Gadi.
30 Ebitabu ebyo bikanirye oko butabali bwiwe bosi, amaka wiwe, n’emyatsi eyalaba omo biro biwe n’omo Israeli n’omo mami wosi awabya amutimbireko.
Amaelezo awehikwa
^ Kutse “syawite obutoki.”
^ Ni kindu ky’obughuli ekikalua omo kitaka.
^ Kutse “omulinga.”
^ Ni kindu ky’obughuli ekikalua omo kitaka.
^ Etalanta nguma ini bilo 34,2. Ulebaye Endomeko B14.
^ Ni kindu ky’obughuli ekikalua omo kitaka.
^ Ni kindu ky’obughuli ekikalua omo kitaka.
^ Edariki ini kitsere ky’Abaperesi ky’ehoro. Ulebaye Endomeko B14.
^ Ni kindu ky’obughuli ekikalua omo kitaka.
^ Kutse “sy’omulinga.”
^ Kutse “eritsuka kera erihika kera.”
^ Kutse “oyulungukere.”