Emyatsi y’Emighulu y’Erimbere 5:1-26
5 Aba b’abaghala ba Rubeni, akambere ka Israeli. Rubeni yo wabya kambere, aliwe kundi mwatsandya engyingo ya baba wiwe, obumbere bwiwe mubwahabwa abaghala ba Yozefu mughala wa Israeli. Ekyo kyo kyaleka iniatahandikwa mo kambere omo mena w’ebihanda.
2 Yuda mwabya mukulu oko baghala babo, n’oyo wasombolawa erisyabya musondoli mwalua omo kihanda kiwe, aliwe Yozefu yo wahabawa obumbere.
3 Abaghala ba Rubeni, akambere ka Israeli, babya: Hanoki, Palu, Hezroni, na Karmi.
4 Abaghala ba Yoeli babya: Shemaya mughala wiwe, Gogu mughala wiwe, Shimei mughala wiwe,
5 Mika mughala wiwe, Reaya mughala wiwe, Baali mughala wiwe,
6 na Bera mughala wiwe. Omwami Tilgati-pilneseri we Siria mwatwala Bera omo bunyewa. Bera abya mukulu w’ekihanda ky’Abarubeni.
7 Abaghala babo abahandikawa erikwamana n’ebihanda byabo babya: Omukulu Yeieli, Zekaria,
8 na Bela mughala wa Azazi, mughala wa Shema, mughala wa Yoeli. Ekihanda kya Bela kyabya kikere omo kiharo ekitsukire Aroeri eriyahika e Nebo ne Baali-meoni.
9 Kundi esyonyama syabo syabya isyabirikanyirira omo kihugho kye Gileadi, mubayikala eritsuka oko luhande lw’eyo ryuba rikasira eriyahika oko musike-sike w’embwarara eyitsukire oko Lusi lwe Efrati.
10 Oko mughulu w’obutabali bwa Sauli, mubalwa n’Abahagri, bamasingabo. Ko bikala batya omo syohema syabo, omo kiharo kyosi ekiri oko luhande lw’eyo ryuba rikasira lwe Gileadi.
11 Abitsikulu ba Gadi mubikala hakuhi nabo omo kiharo kye Bashani n’eriyahika e Saleka.
12 Omo kiharo kye Bashani, Yoeli yo wabya mukulu, Shafani yo wabya w’akabiri, habya na Yanai na Shafati.
13 N’abaghala babo ababya omo bitunga byabo, na Mikaeli, Meshulamu, Sheba, Yorai, Yakani, Zia, na Eberi, abosi babya 7.
14 Abo bo babya baghala ba Abihaili mughala wa Huri, mughala wa Yaroa, mughala wa Gileadi, mughala wa Mikaeli, mughala wa Yeshishai, mughala wa Yado, mughala wa Buzi.
15 Ahi mughala wa Abdieli, mughala wa Guni, abya mukulu w’ekitunga kyabo.
16 Mubikala omo kiharo kye Gileadi, omo kiharo kye Bashani, omo milongo eyabya yitimbire oko Bashani, n’omo myanya yosi y’erilisiryamo ye Sharoni, eriyahika oko mipaka yayo.
17 Abosi mubahandikwa omo bitabu ebihandikiremo amena w’abandu b’omo bihanda byabo oko mughulu w’obutabali bwa Yotamu, omwami we Yuda, n’oko mughulu w’obutabali bwa Yeroboamu,* omwami we Israeli.
18 Abarubeni, Abagadi, n’enusu y’ekihanda kya Manase babya n’abasuda 44 760 b’amaka; abasuda abo ibakaheka esyongabo, emiyali n’obuta,* babya basi erilwa.
19 Mubalwa n’Abahagri abitsikulu ba Yeturu, abitsikulu ba Nafishi, n’abitsikulu ba Nodabu.
20 OMungu mwabawatikya omo malwa, neryo mubasinga Abahagri n’abosi ababya haghuma n’Abahagri. Mubasaba oMungu bati abawatikaye omo malwa ayo, neryo oMungu mwahulikirira omusabe wabo w’erimulemba-lemba kundi babya bayiketere iye.
21 Mubahamba esyonyama sy’Abahagri, esyongamia 50 000, esyombuli 250 000, n’esyopunda 2 000; mubahamba n’abandu* 100 000.
22 Mubita abandu banene kundi oMungu w’ekwenene yo wabya akalwirabo. Mubabya babitibita oko esyonzighu syabo, bamikala omo kiharo kyasyo erihika oko mughulu batwalawa omo bunyewa.
23 Abana b’omo nusu y’ekihanda kya Manase mubikala omo kiharo ekyabya kitsukire e Bashani eriyahika e Baali-hermoni, n’eriyahika e Seniri n’oko Kitwa kye Hermoni. Babya banene kutsibu.
24 Aba bo babya bakulu b’ebitunga byabo: Eferi, Ishi, Elieli, Azrieli, Yeremia, Hodavia, na Yadieli. Abakulu abo babya basuda b’amaka, babya balume abakumayire, kandi babya bakulu b’ebitunga byabo.
25 Aliwe mubaleghula oko Mungu w’abotata-kulu wabo, mubakola obumbalaka haghuma n’emiungu y’abandu b’omo kihugho, abo Mungu abugha omo kihugho atoke erihakyo Abaisraeli.
26 Neryo oMungu we Israeli mwahira omo mwami Puli we Asiria (ni bugha ambu, omwami Tilgati-pilneseri we Asiria) mw’amalengekania w’eritwala Abarubeni, Abagadi, n’enusu y’ekihanda kya Manase omo bunyewa. Omwami mwabatwala e Hala, e Habori, ne Hara, omo kiharo ekiri hakuhi n’olusi lwe Gozani, eyo yo bakine erihika na munabwire.
Amaelezo awehikwa
^ Ni bugha ambu, Yeroboamu w’akabiri.
^ Kinywa kwa kinywa, “ibakalyatanga oko buta.” Ni kindu ky’erilasamo emisali.
^ Kutse “n’esyonafsi sy’abandu.”
