Emyatsi y’Emighulu y’Erimbere 9:1-44
9 Abaisraeli bosi babya bahandikire omo bitabu ebirimo amena w’ab’omo bihanda byabo, kandi amena wabo abya ahandikire omo Kitabu ky’abami be Israeli. Nikwa abandu be Yuda mubatwalwa omo bunyewa mwe Babiloni kundi mubaleghula oko Mungu.
2 Abikalani b’erimbere abasuba oko kitaka kyabo omo miyi yabo babya Abaisraeli balebe, abahereri, Abalawi, n’abaghombe b’oko hekalu.*
3 N’abitsikulu balebe ba Yuda, ba Benyamini, ba Efraimu, n’aba Manase mubikila Yerusalema.
4 Babya: Utai mughala wa Amihudi, mughala wa Omri, mughala wa Imri, mughala wa Bani, abalume bosi abo babya bitsikulu ba Perezi mughala wa Yuda.
5 Ab’omo bitsikulu ba Shela babya: Asaya akambere, n’abaghala biwe.
6 Ab’omo baghala ba Zera babya: Yeueli n’abaghala babo 690.
7 Ab’omo bitsikulu ba Benyamini babya: Salu mughala wa Meshulamu, mughala wa Hodavia, mughala wa Hasenua,
8 Ibnea mughala wa Yerohamu, Ela mughala wa Uzi, mughala wa Mikri, Meshulamu mughala wa Shefatia, mughala wa Reueli, mughala wa Ibnia.
9 N’abaghala babo babya 956, ngoko amena wabo ahandikire omo bitabu ebirimo amena w’ab’omo bihanda byabo. Abalume bosi abo babya bakulu b’ebitunga byabo.*
10 Omo Bahereri mwabya: Yedaya, Yehoyaribu, Yakini,
11 Azaria mughala wa Hilkia, mughala wa Meshulamu, mughala wa Zadoki, mughala wa Merayoti, mughala wa Ahitubu, eseghu-seghu y’oko hekalu* y’oMungu w’ekwenene,
12 Adaya mughala wa Yerohamu, mughala wa Pashuri, mughala wa Malkiya, Maasai mughala wa Adieli, mughala wa Yazera, mughala wa Meshulamu, mughala wa Meshulemiti, mughala wa Imeri,
13 n’abaghala babo, abakulu b’ebitunga, abalume 1 760 b’amaka n’ab’obutoki, ababya ibane tayari erikola omubiiri w’omo nyumba y’oMungu w’ekwenene.
14 Omo Balawi mwabya: Shemaya mughala wa Hashubu, mughala wa Azrikamu, mughala wa Hashabia, abosi abo babya bitsikulu ba Merari;
15 na Bakbakari, Hereshi, Galali, Matania mughala wa Mika, mughala wa Zikri, mughala wa Asafu,
16 Obadia mughala wa Shemaya, mughala wa Galali, mughala wa Yedutuni, na Barekia mughala wa Asa, mughala wa Elkana, oyo wabya wikire omo milongo y’Abanetofati.
17 Ababya bakateya emilango babya: Shalumu, Akubu, Talmoni, na Ahimani. Shalumu w’omo kihanda kyabo yo wabya mukulu wabo.
18 Kera, iniakabya hakuhi n’omulango w’omwami oko luhande lw’eyo ryuba rikasira. Abo bo babya bakatsunga emilango y’esyokambi sy’Abalawi.
19 Shalumu mughala wa Kore, mughala wa Ebiasafu, mughala wa Kora, n’abaghala babo ab’omo kitunga kiwe, Abakorahi, babya bimanire abakatsunga emilango y’ahali ehema. Abobaba wabo babya bimanire ekambi ya Yehova omw’itsunga obwingiriro bwayo.
20 Kera, Finehasi mughala wa Eleazari yo wabya mukulu wabo. Yehova abya haghuma naye.
21 Zekaria mughala wa Meshelemia abya akatsunga omulango w’oko bwingiriro bw’ehema y’erihindanamo.
22 Abosi abasombolawa batoke eribya bakatsunga emilango babya 212. Babya bikere omo myanya mbiriri-mbiriri erikwamana n’amena wabo awahandikire omo bitabu ebirimo amena w’ab’omo bihanda byabo. Daudi n’omulangiri Samweli bo bahirabo omo mibiiri eyo eyitolere erikolwa n’omundu w’eriyiketerwa.
23 Ibo n’abaghala babo bo babya bimanire omubiiri w’eritsunga emilango y’enyumba ya Yehova, enyumba y’ehema.
24 Ababya bakatsunga emilango ibakabya oko syombande ini, ni bugha ambu, oko luhande lw’eyo ryuba rikasira, oko luhande lw’eyo ryuba rikalengera, oko luhande lw’endata, n’oko luhande lw’eyikwa.
25 Abaghala babo ibakabya ibanemulua omo myanya eyo bikeremo, batoke erisyakola haghuma nabo omo biro 7.
26 Omo mibiiri eyitolere erikolwa n’abandu b’eriyiketerwa, mwabya abakulu* bani b’abandu abakatsunga emilango; abakulu abo babya Balawi, kandi babya bimanire ebyumba by’eriliramo, n’ebyumba by’eribikamo ebindu by’obughuli by’omo nyumba y’oMungu w’ekwenene.
27 Omo kiro kyosi, ibakabya ibanatimbire oko nyumba y’oMungu w’ekwenene, ibane omo myanya yabo, kundi omubiiri wabo abya eritsunga kandi bo babya n’olufungura, bo babya bakakingula enyumba obuli asubui.
28 Abaghuma ba kubo babya bimanire ebindu ebikakolesibawa omw’iramya. Ibakaghanzabyo omughulu bakaletabyo, n’erighanzabyo omughulu bakasubulayabyo.
29 Abandi ba mubo babya bimanire ebindi bindu n’ebindu byosi bibuyirire, efarine eyuwene, edivai, amaghuta, obubani, n’amaghuta w’ezeri.
30 Abaghuma b’oko baghala b’abahereri ibakakokotaya amaghuta awakakumba ndeke awalimo amaghuta w’ezeri.
31 Na Matitia oyo wabya oko Balawi, oyo wabya kambere ka Shalumu Omukorahi, abya akakola omubiiri owatolere erikolwa n’omundu w’eriyiketerwa, yo wabya imanire ebindu ebikahukawa oko pano.
32 Abaghuma b’oko baghala babo, ababya bitsikulu ba Kohati, babya bimanire emikati eyikatondawa mo bikuto-bikuto,* bo babya bakahuka emikati omo buli sabato.
33 Abo bo babya bimbi, abakulu b’ebitunga by’Abalawi, babya omo byumba by’eriliramo; babya isibasabirwe erikola oghundi mubiiri, kundi ibakakola omw’itungyi n’omo kiro.
34 Abo bo babya bakulu b’ebitunga by’Abalawi erikwamana n’amena awahandikire omo bitabu ebirimo amena w’ab’omo bihanda byabo. Babya bakulu. Babya bikere e Yerusalema.
35 Yeieli, baba wa Gibeoni, abya ikere e Gibeoni. Omukali wiwe iniakahulawa mo Maaka.
36 Akambere kiwe kabya Abdoni. Enyuma sy’aho, mwabuta Zuri, Kishi, Baali, Neri, Nadabu,
37 Gedori, Ahio, Zakaria, na Mikloti.
38 Mikloti mwabuta Shimea. Abosi babya bikere hakuhi n’abaghala babo e Yerusalema, haghuma n’abandi baghala babo.
39 Neri mwabuta Kishi, Kishi mwabuta Sauli; Sauli mwabuta Yonatani, Malkishua, Abinadabu, na Eshbaali.
40 Omughala wa Yonatani abya Meribaali. Meribaalli mwabuta Mika.
41 Abaghala ba Mika babya: Titoni, Meleki, Pareya, na Ahazi.
42 Ahazi mwabuta Yara; Yara mwabuta Yaremeti, Azmaveti na Zimri, Zimri mwabuta Moza.
43 Moza mwabuta Binea; Binea mwabuta Refaya; Refaya mwabuta Eleasa; Eleasa mwabuta Azeli.
44 Azeli mwabuta abana 6 b’obulume. Habya Azrikamu, Bokeru, Ismaeli, Shearia, Obadia, na Hanani. Abo babya baghala ba Azeli.
Amaelezo awehikwa
^ Kutse “Abanetinimu.” Kinywa kwa kinywa, “abahabawa.”
^ Kinywa kwa kinywa, “Bakulu babo baba busana n’enyumba yabo baba wabo.”
^ Kinywa kwa kinywa, “nyumba.”
^ Kinywa kwa kinywa, “ab’amaka.”
^ Ni bugha ambu, emikati y’erikangania.
