Abami b’Erimbere 17:1-24
17 Kiro kighuma, Eliya* Omutishbi we Gileadi mwabwira Ahabu ati: “Oko kwenene-kwene ngoko Yehova oMungu wa Israeli oyo ngakolera* aliho, omo myaka eno sihendibya ekimi kutse embula nite nabugha niti yiwe.”
2 Yehova mwabwira Eliya ati:
3 “Ulua hano, uye oko luhande lw’eyo ryuba rikasira. Uyayibise omo Musya we Keriti,* oko luhande lw’eyo ryuba rikasira lwe Yordani.
4 Ukendibya ukanywa oko maghetse w’akusi, kandi ngendibwira ebikororo ibyabya bikakuletera akalyo k’eyo.”
5 Eliya mwalw’iniaghenda aho n’aho, ngoko Yehova alyamubwira. Mwaya omo Musya we Keriti,* owali oko luhande lw’eyo ryuba rikasira lwe Yordani, amayikalayo.
6 Neryo ebikororo mubyabya bikamuletera omukati n’enyama omo tututu n’omw’igholo, kandi mwabya akanywa oko maghetse w’akusi ako.
7 Aliwe habere habilaba ebiro bilebe, akusi ako mukuma, kundi embula yabya isiyesyawa omo kihugho.
8 Neryo Yehova mwabwira Eliya ati:
9 “Hangana, uye e Zarefati eyiri omo kiharo kye Sidoni, uyikale eyo. Ngendibwira omukwa-kali w’omo muyi oyo niti abye akakuha akalyo.”
10 Neryo mwahangana, amaya e Zarefati. Abere abihika oko mulango w’omuyi, mwalangira omukwa-kali inianemusenya. Mwabirikira omukwa-kali oyo, amamubwira ati: “Kisi, niletere ehighetse hike omo kopo nganywe.”
11 Omukwa-kali oyo abere akayenda amaghetse w’erinywa, Eliya mwamubirikira, amamubwira ati: “Kisi, uniletere n’omukati.”
12 Omukwa-kali oyo mwamusubirya ati : “Oko kwenene-kwenene ngoko Yehova oMungu waghu aliho, singwite oko mukati. Niwite oko hifarine hike ehyangahika omo byala. Hiri omo rilegha rinene. Niwite n’oko highuta hike ehiri omo kalegha kake. Ninemubota-bota ehikwi. Ngendibya nabisuba eka, inahuka ehyalya ehyo ingye n’omughala waghe tukendirya. Tukendibya twabiryahyo, itwahola.”
13 Neryo Eliya mwabwira omukwa-kali oyo ati: “Isiwasagha, usube ewaghu, uyakole ngoko wamabugha. Aliwe utsuke wanihukira omukati muke w’omuviringo omo farine n’amaghuta ebyo ukiwiteko, neryo unileteregho. Enyuma sy’aho, wanganahuka ebyo mukendirya, iwe n’omughala waghu.
14 Kundi Yehova oMungu wa Israeli akabugha ati: ‘Efarine eyiri omo rilegha rinene siyendihwamo n’amaghuta awali omo kalegha kake syendihwamo erihika omughulu Yehova ekendisyawisya embula oko kitaka.’”
15 Neryo omukwa-kali oyo mwaghenda, amayakola ngoko Eliya alyabugha. Neryo omukali oyo, ab’oko kihanda kiwe, na Eliya mubabya n’akalyo omo biro bingyi.
16 Efarine eyabya omo rilegha rinene muyatahwamo, n’amaghuta awabya omo kalegha kake mwatahwamo, ngoko Yehova anabugha erilabira Eliya.
17 Habere habilaba mughulu mulebe, mughala w’omukali omwinye nyumba mwalwala. Mwatoha erihika oko kika amahola.
18 Neryo omukwa-kali oyo mwabwira Eliya ati: “Mungakukoleraki, iwe mundu w’oMungu w’ekwenene? Ulyasa busana n’erinyibukya ekosa yaghe n’eriita mughala waghe?”
19 Aliwe Eliya mwamubwira ati: “Umba mughala waghu.” Neryo Eliya mwamwimya omo byala biwe, amamutwala omo kyumba ekyabya omo lutwe, eyo abya akaghotsera. Neryo Eliya mwamughotserya oko ngyingo yiwe.
20 Enyuma sy’aho, mwasaba Yehova ati: “Yehova, Mungu waghe, omukwa-kali oyu oyulyamba ah’erighotsera ukatasyamuletera obuhanya omw’ita mughala wiwe?”
21 Mwayikakirya oko mwana ngendo isatu n’erisaba Yehova ati: “Kisi Yehova, Mungu waghe, leka omwana oyu atasyabyaho.”*
22 Yehova mwowa omusabe wa Eliya, neryo omwana oyo amatsuka erihumula, amasuba.
23 Eliya mwimya omwana oyo, amamulusya omo kyumba ekyabya omo lutwe, amamuha mama wiwe. Eliya mwabugha ati: “Mughala waghu yono, amabisuba.”
24 Neryo omukali mwabwira Eliya ati: “Lino namabiminya kwenene kwenene ngoko uli mundu w’oMungu kandi ngoko ebyo Yehova akabugha erilabira iwe ni by’ekwenene.”
Amaelezo awehikwa
^ Ni bugha ambu “oMungu waghe ni Yehova.”
^ Kinywa kwa kinywa, “oyo nimene embere siwe.”
^ Kutse “musya owakumamo amaghetse we Keriti.”
^ Kutse “musya owakumamo amaghetse we Keriti.”
^ Kinywa kwa kinywa, “leka engebe (enafsi) y’omwana oyu yimusubemo.”
