Abami b’Erimbere 19:1-21
19 Neryo Ahabu mwabwira Yezebeli ebyosi ebyo Eliya alyakola, kandi mwamubwira ngoko Eliya abiriita abaminyereri bosi omo muyali.
2 Neryo Yezebeli mwatuma omundu ati ayabwire Eliya ati: “Emiungu imbe amalipizi awakalire omungya oko ndambi eno namatendikwita ng’abaminyereri abo, kutse namatendikuyira ng’omughuma wa kubo!”
3 Neryo Eliya mwasagha. Mwahangana, amatibita, bakasyamwita.* Mwayahika e Beeri-sheba eyiri omo kiharo kye Yuda, neryo amasigha omughombe wiwe y’aho.
4 Mwaghenda olughendo lw’ekiro kighuma, amayahika omo mbwarara. Mwabya abihikayo, amikala omo ndina y’omuretemu. Neryo mwabugha ati kumbe alyahola. Mwabugha ati: “Namabiluha! Yehova, uniite, kundi sinilengire abotata-kulu waghe.”
5 Neryo mwayilambika, amayato omo ndina y’omuti w’omuretemu. Aliwe aho n’aho omumalaika mwamutulako, amamubwira ati: “Hangana, ulye.”
6 Abere abikingula ameso, mwalangira hakuhi n’omutwe wiwe ihane omukati w’omuviringo n’erilegha ry’amaghetse. Omukati oyo abya oko mabwe awahuhire. Mwalya, amanywa, kandi amatasyaghotsera.
7 Habere habilaba esyosaha nyilebe, kandi omumalaika wa Yehova mwasa, amamutulako n’erimubwira ati: “Hangana, ulye, kundi olughendo ni luli.”
8 Neryo mwahangana, amalya, n’erinywa. Akalyo ako mukamuha akaghala akamuwatikaya erighenda omo biro 40 omo musibo nomo kiro, erihika omughulu ahika e Horebu, ekitwa ky’oMungu w’ekwenene.
9 Neryo mwingira omo mwangalu, amaghotseramo. Omughulu abya iniane omo mwangalu oyo, Yehova mwamubulya ati: “Eliya, ukayira hano ho uti?”
10 Eliya mwamusubirya ati: “Yehova, oMungu w’emilondo, munakukolera n’omuhwa munene, aliwe Abaisraeli sibetasikya endaghane yaghu. Babirihimbula ebiherero byaghu kandi babiriita abamaminyereri baghu omo muyali. Ingye nikisiyaho, aliwe naghe banemusonda eriniita.”*
11 Aliwe oMungu mwamubwira ati: “Ulue omo mwangalu, uyimane oko kitwa embere sya Yehova.” Neryo Yehova mwalaba embere sya Eliya. N’erihunga rinene erikalire muryatulanga ebitwa n’eritulanga amabwe manene-manene embere sya Yehova. Aliwe Yehova syabya omo rihunga eryo. Erihunga eryo ryabere ryabilaba, muhabya omusiki. Aliwe Yehova syabya omo musiki oyo.
12 Omusiki abere abilaba, muhabya omuliro. Aliwe Yehova syabya omo muliro oyo. Omuliro oyo nagho abere abilaba, muhabya omulenge muke owahehere.
13 Eliya abere abyowa omulenge muke oyo, mwaswika obusu bwiwe omo lukimba lwiwe, amayimana oko bwingiriro bw’omwangalu. Neryo mowa omulenge akamubulya ati: “Eliya, ukayira hano ho uti?”
14 Neryo Eliya mwasubirya ati: “Yehova, oMungu w’emilondo, nabirikukolera n’omuhwa munene. Aliwe Abaisraeli sibetasikya endaghane yaghu. Babirihimbula ebiherero n’eriita abaminyereri baghu omo muyali. Ingye nikisiyaho, aliwe naghe banemusonda eriniita.”*
15 Aliwe Yehova mwamubwira ati: “Subula, uye omo mbwarara ye Damasko. Ukendibya wabihikayo, iwahira oko Hazaeli kw’amaghuta atoke eribya mwami we Siria.
16 Uhire n’oko Yehu omwitsikulu wa Nimshi kw’amaghuta atoke eribya mwami we Israeli. Na Elisha* mughala wa Shafati we Abel-Mehola, naye umuhireko amaghuta atoke eribya muminyereri oyukendikusubuka.
17 Oyutendisyitibwa omo muyali wa Hazaeli, Yehu yukendisyamwita. N’oyutendisyakwa omo muyali wa Yehu, Elisha yukendisyamwita.
18 Nikinawite abandu 7 000 omo Israeli abatetakukamira Baali n’abatetaha Baali y’ebizu.”
19 Neryo Eliya mwayayo. Mweya Elisha mughala wa Shafati inianemulima omo syonume sy’esyonde 24 esyabya isine embere siwe. Esibiri sy’omwiso-mwiso syo abya nasyo. Neryo Eliya mwaseghera hakuhi naye, amamughusira olukimba lwiwe.*
20 Neryo Elisha mwasigha esyonume sy’esyonde, amatibita eyiri Eliya, n’erimubwira ati: “Kisi, leka niyahe baba waghe na mama waghe b’ebizu; n’enyuma sy’aho, ngendikukwama.” Eliya mwamusubirya ati: “Suba ewaghu, sinatabugha niti isiwayayo.”
21 Neryo Elisha mwasubula, amimya esyonde ibiri, n’erihererasyo. Mwimya emiti eyabya oko syonume ibiri sy’esyonde esikalima, amahukako enyama y’esyonume sy’esyonde esyo. Enyama eyo yabere yabihya, amahayo abandu, bamalya. Enyuma sy’aho, amakwama Eliya, n’eritsuka eribya akamukolera.
Amaelezo awehikwa
^ Kutse “bakasyita e nafsi yiwe.”
^ Kutse “eriita enafsi yaghe.”
^ Kutse “eriita enafsi yaghe.”
^ Ni bugha ambu “oMungu ni Musabuli.”
^ Kutse “olukimba lwiwe lw’obuminyereri.”
