Ebaruha y’erimbere oko Abanya Korinto 1:1-31
1 Ebaruha eno ikalua oko Paulo, oyo wabirikirawa atoke eribya mukwenda wa Kristo Yesu erilabira erisonda ry’oMungu, na Sostene mughala wetu.
2 Ngahandikira endeko y’oMungu eyiri e Korinto. Ngabahandikira inywe mwabiriyirwamo babuyirire busana n’erikwama Kristo Yesu. Mwabirikirawa eribya babuyirire haghuma n’abandu b’ehosi-hosi abikirirye erina ry’Omukama wetu Yesu Kristo. Ni Mukama wabo, kandi ni Mukama wetu.
3 OMungu Tata wetu n’Omukama wetu Yesu Kristo babakanganaye olukogho, kandi babahe obuholo.
4 Ebiro byosi ngasima oMungu waghe busana n’olukogho olo abiribakangania inywe bigha ba Kristo Yesu.
5 Mwabiritsumulwa kutsibu kundi muli omo bughuma naye. Kandi abiribaha obutoki bunene bw’eribugha ekinywa ky’oMungu, kandi abiribawatikya eryowakyo ndeke.
6 Neryo engulu eyikakanaya oko Kristo yabirihanda emirihi omo kati-kati kenyu.
7 Simubulire ekihembo kyosi-kyosi ekikalua ew’oMungu, imunemulindirira kutsibu omughulu Omukama wetu Yesu Kristo akendisyabisulwa.
8 Akendisyabawatikya erisika erihika oko nduli. Neryo omughulu ekiro ky’Omukama wetu Yesu Kristo kikendisyahika, sihendisyabya omundu oyukabatsongera ati mumwakola ekibi.
9 OMungu ni mutaleghula, kandi niye ababirikira mutoke eribya omo bughuma n’Omughala wiwe Yesu Kristo Omukama wetu.
10 Baghala betu, omo rina ry’Omukama wetu Yesu Kristo, ngabasaba inywe bosi eribugha kighuma. Sihabye erighabana omo kati-kati kenyu, aliwe ritolere imwabya n’amalengekania maghuma.
11 Baghala betu, abandu balebe b’omo kihanda kya Kloe mubakanibwira bati hali eritendihulikirirana omo kati-kati kenyu.
12 Ekyo ngasonda eribugha kya kino: Omughuma w’okwinywe akabugha ati: “Ingye niri oko Paulo.” Oghundi iniabugha ati: “Ingye niri oko Apolo.” N’oghundi iniabugha ati: “Ingye niri oko Kefa.”* N’oghundi naye iniabugha ati: “Ingye niri oko Kristo.”
13 Mukalengekanaya muti Kristo aghabirwemo hihande-hihande? Paulo mwatahola oko muti busana nenyu, kobite bitya? Kutse mwabatisibawa omo rina rya Paulo?
14 Ngasima oMungu kundi munitabatisya n’omundu n’omughuma w’okw’inywe, erilusyako Krispo na Gayo.
15 Neryo sihali n’omughuma w’okw’inywe oyo wangabugha ati abatisibawa omo rina ryaghe.
16 Ni kwenene, munanabatisya n’abomo kihanda kya Stefana. Sinasi nga munanatasyabatisya oghundi erilusya kw’abo.
17 Kundi Kristo mwatanituma eriyabatisya abandu, aliwe mwanituma eriyatulaghania engulu mbuya. Kandi omughulu ngatulaghanaya engulu mbuya, sinirikolesaya ebinywa by’abandu abasoma kanene. Kundi ekyo kyanganaleka abandu ibatalangira omughaso w’oluholo* lwa Kristo.
18 Engulu y’oluholo lwa Kristo oko muti w’amaghali* ni bukiru oko bandu abakendisyatsandibwa. Aliwe, ikakanganaya amaka w’oMungu okw’itwe tukendisyasabulwa.
19 Kundi Amasako akabugha ati: “Ngendisyatsandya amenge w’abandu b’amenge, kandi ngendisyaghana obwenge bw’abandu abawite obwenge.”
20 Tubughe tutiki oko mundu w’amenge kutse oko mundu oyo wasi kutsibu emyatsi y’emighambo, kutse oko mundu w’obuhaka omo kihugho kino?* OMungu abiriyira amenge w’ekihugho kino mo bukiru.
21 Kundi oMungu awite amenge, mwataleka amenge w’ekihugho awatikaye abandu b’ekihugho erimuminya. Aliwe, oMungu mwanza erisabula abikiriraya engulu eyo abandi balangiramo bukiru.
22 Abayahudi bakasondaya ebitiko-tiko, n’Abagiriki bakasondaya amenge.
23 Aliwe itwe, tukabwira abandu ngoko Kristo mwaholera oko muti. Engulu eyo ikahitanaya Abayahudi. N’oko bandu b’ebihanda, engulu eyo ni bukiru.
24 Aliwe oko babirikirawa n’oMungu, babye Bayahudi kutse Bagiriki, Kristo ni maka w’oMungu, kandi ni menge wiwe.
25 Emyatsi y’oMungu eyo bandu bakalangiramo bukiru ni y’amenge kulenga abandu, n’emyatsi y’oMungu eyo bandu bakalangira bati siyirimo kaghala, yirimo kaghala kulenga abandu.
26 Baghala betu, munalangire abandu abo Mungu abiribirikira. Omo meso w’abandu, abangyi b’omw’inywe si b’amenge. Abangyi b’omw’inywe sibali n’obutoki, n’abangyi b’omw’inywe si b’omo bihanda by’abandu bakulu-bakulu.
27 OMungu mwasombola ebindu ebyo kihugho kikalangiramo by’obukiru atoke erihemula ab’amenge. Kandi oMungu mwasombola ebindu ebyo kihugho kikalangiramo ebitawite obutoki atoke erihemula ebindu ebiwite obutoki.
28 Kandi oMungu mwasombola ebindu ebyo kihugho kikalangiramo ebitawite omughaso n’ebyo bandu baghonere, ebindu ebikalangirawamo bya bule, kusudi ebindu ebikalangirawamo by’omughaso bibye bule.
29 OMungu mwakola atya kusudi isihabya omundu oyukayihalamba embere sy’oMungu.
30 Aliwe, oMungu yo wabawatikaya eribya omo bughuma na Kristo Yesu, oyo watuletera amenge w’oMungu. Erilabira Kristo, oMungu abirituyiramo batunganene, kandi babuyirire. Kandi abiritulusya omo bukobe erilabira embanulo eyikabohola.
31 Kyo kikaleka Amasako iniabugha ati: “Oyukayihalamba ayihalambe omo Yehova.”*
Amaelezo awehikwa
^ Kandi akahulawamo Petro.
^ Kinywa kwa kinywa, “w’omuti w’amaghali.” Ulebaye amaana w’ebinywa.
^ Ulebaye amaana w’ebinywa.
^ Kutse “w’omughulu ono.” Ulebaye amaana w’ebinywa.
^ Ulebaye endomeko A5.
