Ebaruha y’erimbere oko Abanya Korinto 10:1-33
10 Baghala betu, nanzire imwaminya ngoko abotata-kulu wetu bosi babya bakaghenda ekitu ikine endata kubo. Kandi abosi mubasoka engetse.
2 Kandi abosi mubabatisibwa omo Musa omughulu ekitu kyabya endata syabo, n’omughulu babya omo ngetse.
3 Abosi mubalya akalyo kaghumerera ako oMungu abaha.
4 Kandi mubanywa amaghetse maghumerera agho oMungu abaha. Ibakanywa oko maghetse awakalua omo ribwe agho Mungu abaha. Eribwe eryo ryabya rikabakwama. Eribwe eryo ryabya ini Kristo.
5 Aliwe, oMungu mwatatsemera abangyi ba kubo kundi mwitabo omo mbwarara.
6 Emyatsi eyabahikira yikatukangiriraya. Isitwanza emyatsi mibi, ngoko bakola.
7 Isitwaramaya esyosanamu, ngoko abaghuma ba kubo bakola. Amasako akabugha ati: “Abandu mubikala, bamalya, n’erinywa. N’enyuma sy’aho, mubahangana n’eriyitsemesya.”
8 Isitwakola oburaghane,* ngoko baghuma ba kubo bakola, neryo abandu 23 000 ba kubo mubahola omo kiro kighuma.
9 Isitwalenga oko Yehova,* ngoko baghuma ba kubo bakola. Neryo esyonzoka musyabaluma, bamahola.
10 Isitwabya abandu abakayilungumula, ngoko abaghuma ba kubo babya. Neryo omumalaika oyukatoghotaya mwitabo.
11 Emyatsi eyi eyabahikira yikatukangiriraya. Yahandikawa busana n’eritukunga itwe tuliho oko nduli y’emighulu.
12 Neryo, oyukalengekanaya ati imene ndeke, ayiteghaye ndeke akasyatera.
13 Amaligho* wosi-wosi awakabahikira abirihikira n’abandi. Aliwe, oMungu syalileghula. Syendileka mukaghalwa* kulenga ngoko mwangatoka eriyiyinia. Omughulu mukaghalawa,* oMungu akendibaha enzira y’eribalamo mutoke eriyiyinia.
14 Busana n’ekyo, banzwa baghe, isimwaramaya esyosanamu.
15 Ngakanaya nenyu kundi ninasi ngoko munawite obwenge. Inyw’ibene-bene mulebaye ebyo ngabugha nga nina kwenene, kutse iyehe.
16 Omughulu tukanywa ekikombe* ky’emiyisa ekyo tukatsumula, simwasi ngoko aho tukasangira oko musasi wa Kristo? N’omughulu tukalya omukati ogho tukatwa, simwasi ngoko aho tukasangira oko mubiri wa Kristo?
17 Hali omukati mughuma. Neryo nomo twangabya bangyi, tuli mubiri mughuma kundi itwe bosi tukalya omukati mughuma oyo.
18 Lengekanaya okw’ebyo bandu be Israeli bakakola: Omughulu bakalya akalyo akalyahererawa, simwasi ngoko aho bakalya oko biryahererawa oko kiherero?
19 Neryo mukalengekanaya muti ngasonda eribugha niti esanamu kutse ebiryahererawa esanamu, ebyosi ni by’omughaso?
20 Iyehe, ekyo si kyo ngasonda eribugha. Ngasonda eribugha niti obuhere obo bandu b’ebindi bihanda bakaherera, bakahererabo esyombinga. Sibehererabo oMungu. Neryo sinanzire mukabya omo bughuma n’esyombinga.
21 Simwanganywira oko kikombe kya Yehova* n’oko kikombe ky’esyombinga. Simwangalira oko mesa ya Yehova* n’oko mesa y’esyombinga.
22 Kutse tukasonda erihitania Yehova?* Situwite akaghala kanene kumulenga, kobite bitya?
23 Emyatsi yosi yihamulirwe, aliwe eyosi siyiriletera endundi. Emyatsi yosi yihamulirwe, aliwe eyosi siyirihimba.
24 Mubye mukakola emyatsi eyangaletera abandi b’endundi, butsira eyikabaletera endundi inywe basa.
25 Mulye enyama yosi eyikaghulibawa omo soko. Wamasombola erirya enyama eyo, kumbe obunya-mutima bwaghu isibwakukenderaya.
26 Kundi Amasako akabugha ati: “Ekihugho n’ebyosi ebirimo ni bya Yehova.”*
27 Omundu oyutikirirye amakubirikira ewiwe busana n’erikuhukira akalyo, neryo iwaligha eriyayo, ulye ekyosi-kyosi ekyo akendikuhukira. Ulye n’obunya-mutima* obuwene. Isiwabulaya amabulyo.
28 Aliwe, tubughe tuti omundu mulebe iniakubwira ati: “Akanyama kano kahererawamo buhere oko sanamu.” Aho isiwalyako busana n’oyulyakubwira, kusudi obunya-mutima bw’omundu wosi-wosi isibwatsanda.
29 Hano sindikanaya oko bunya-mutima* bwaghu, aliwe bw’oghundi, kundi sinanzire erikolesya obwiranda bwaghe bw’erisombola neryo obunya-mutima bw’oghundi mundu ibwanitswera.
30 Nomo nangasima oMungu busana n’akalyo, kandi nomo ninahamulirwe eriryako, busanaki nikole nitya ekyo kyamabya ikyanganaleka abandi ibanibughako muhanda?
31 Kwesi, mwamalya, kutse erinywa, kutse erikola ekindi kindu kyosi-kyosi, mukole emyatsi yosi busana n’eriha oMungu y’olukengerwa.
32 Isimwatwikalaya abandi, babye Bayahudi kutse Bagiriki, kutse abali omo ndeko y’oMungu.
33 Ekyo kyo ngayikasa erikola. Ngayikasa eritsemesya abandu bosi omo myatsi yosi eyo ngakola. Sindisondaya endundi yaghe, aliwe endundi y’abandu bangyi, batoke erisabuka.
Amaelezo awehikwa
^ Ulebaye amaana w’ebinywa.
^ Ulebaye endomeko A5.
^ Kutse “erilengwako.”
^ Kutse “mukalengwako.”
^ Kutse “mukalengawako.”
^ Kutse “olutehi”
^ Ulebaye endomeko A5.
^ Ulebaye endomeko A5.
^ Ni bugha ambu, erimuhitania busana n’eritendimuramya iye musa. Ulebaye endomeko A5.
^ Ulebaye endomeko A5.
^ Kutse “n’ezamiri.”
^ Kutse “ezamiri.”
