Ebaruha y’erimbere oko Abanya Korinto 11:1-34
11 Mukwame emibere yaghe, naghe ngoko ngakwama emibere ya Kristo.
2 Ngabasima kundi mukabya imunemunibuka, kandi mukabya imunemukwama ndeke-ndeke ebyo nababwira.
3 Nanzire imwaminya ngoko Kristo yo mukulu* w’obuli mulume, n’omulume yo mukulu w’omukali, n’oMungu yo mukulu wa Kristo.
4 Omughulu omulume akasaba kutse eribugha obuminyereri omutwe wiwe inianaswikire, aho akabya iniamahemula omukulu wiwe.
5 Aliwe, omukali amasaba kutse iniabugha obuminyereri omutwe wiwe isyaswikire, aho akabya iniamahemula omukulu wiwe. Aho ane ng’omundu oyo wabirisiswa.
6 Kundi omukali amatendihira oko mutwe wiwe ko kindu, inialw’iniatwa n’esyonzwiri. Ritolere omukali iniaswika omutwe wiwe kundi ni mwatsi w’esisoni okw’iye eritwa oko syonzwiri siwe kutse eritwa esyosi.
7 Omulume syatolere eriswika omutwe wiwe kundi iye ni kisosekanio ky’oMungu, kandi ni lukengerwa lw’oMungu. Aliwe, omukali ni lukengerwa lw’omulume wiwe.
8 Omulume mwatalua omo mukali, aliwe omukali yo walua omo mulume.
9 Omulume mwatabumbwa busana n’omukali, aliwe omukali yo wabumbawa busana n’omulume.
10 Busana n’ekyo, kandi busana n’abamalaika, omukali atolere iniambala ekindu ky’oko mutwe wiwe erikangania ngoko asikirye obukulu.
11 Kandi omo ndeko y’Omukama, abakali balaghire oko balume, n’abalume balaghire oko bakali.
12 Ngoko omukali alua omo mulume, omulume naye akabutawa n’omukali. Aliwe, ebindu byosi bikalua oko Mungu.
13 Rero nenyu muterimbwira, kinatolere omukali iniasaba oMungu embere sy’abandi isyaswikire omutwe wiwe?
14 Nibya mwamabilebya ngoko omulume abumbawa, imukendilangira ngoko ni mwatsi w’esisoni okw’iye eribya n’esyonzwiri nyiri-nyiri.
15 Aliwe, omukali iye amabibya n’esyonzwiri nyiri-nyiri, ni bubuya okw’iye. Ahabawa esyonzwiri busana n’eriswika omutwe wiwe.
16 Omundu wosi-wosi amanza erikuba obuhaka busana n’omwatsi oyu, itwe n’esyondeko sy’oMungu situwite ekindi ky’erighenderako.
17 Aliwe, omughulu ngabaha amahano aya, sindibasima, kundi emihindano yenu ikasambula omo mwanya w’erihimba.
18 Eky’erimbere, ninemwowa ngoko simulihulikirirana omughulu mukahindana omo ndeko. Ninalighire ekyo, kyo hake.
19 Oko kwenene, hakendisyabya erighabana omo kati-kati kenyu. Aliwe, ekyo kikendisyakangania oyo oMungu alighire nga nindi.
20 Omughulu mukahindana haghuma busana n’erirya Akalyo k’erigholo-gholo k’Omukama, simulikola omwatsi oyo omo nzira eyitolere.
21 Embere endambi y’erirya Akalyo k’erigholo-gholo k’Omukama ihike, abaghuma bakatsuka erirya akalyo kabo k’erigholo-gholo, abandi bakabya ibakwire enzala, n’abandi ibabiritamira.
22 Simuwite amanyumba w’eriliramo n’aw’erinywiramo kwe? Kutse mukapokaya endeko y’oMungu n’erihemula abera? Nibughe nitiki? Nibasime? Sinangabasima busana n’omwatsi oyo.
23 Ebyo ngabakangiriraya byo Mukama anikangiriraya. Omo kiro ky’ekiro ekyo Omukama Yesu ahoterawa, mwimya omukati.
24 Abere abisima oMungu, mwatwagho n’eribugha ati: “Ono akasosekanaya omubiri waghe owakendihererwa busana nenyu. Mubye mukakola mutya busana n’erinyibuka.”
25 Babere babibugha erirya Akalyo k’erigholo-gholo, mwasima oMungu, amimya ekikombe,* n’eribugha ati: “Ekikombe eki kikasosekanaya endaghane nyihya-nyihya eyikendiliwa erilabira omusasi waghe. Mubye mukakola mutya erinyibuka, omughulu wosi-wosi mukanywakyo.”
26 Omughulu wosi-wosi mukalya omukati oyu n’erinywa edivai eno, mukabya imunemutulaghania oluholo lw’Omukama, erihika ahakendisyasira.
27 Neryo omundu wosi-wosi oyukalya omukati n’erinywa edivai y’Omukama isyatolere akabya iniamahalya oko mubiri n’omusasi w’Omukama.
28 Obuli mundu ayilebaye ndeke ng’anatolere embere sy’erirya omukati n’erinywa edivai.
29 Omughulu omundu akalya omukati n’erinywa edivai isyetaminya ngoko ebyo ni bisosekanio by’omubiri w’Omukama, aho iniakayiletera amalipizi.
30 Ekyo kyo kikaleka abangyi b’okw’inywe ibaleghetsana n’erilwala, n’abangyi babirihola.*
31 Aliwe, twamabiyilebya ndeke, oMungu isyendisyatutswera.
32 Nikwa, omughulu Yehova* akatutswera, aho akabya iniakatukunga kundi syanzire tukatoghotibwa haghuma n’ekihugho.
33 Neryo baghala betu, omughulu mukahindana haghuma busana n’erirya Akalyo k’erigholo-gholo k’Omukama, mubye mukalindana.
34 Omundu amabya iniakwire enzala, alue wiwe iniabirirya. Mwamabikola mutya, oMungu isyendilangira nga mwabirikola ekosa omughulu mukahindana. Ngendisyasoha emyatsi eyamasighala nabihika eyo.
Amaelezo awehikwa
^ Kinywa kwa kinywa, “omutwe.”
^ Kutse “olutehi”
^ Alinga ni luholo lw’obunya-kirimu.
^ Ulebaye endomeko A5.
