Ebaruha y’erimbere oko Abanya Korinto 13:1-13
-
Olwanzo kyo kikulu oko byosi (1-13)
13 Nomo nangabugha omo mibughe y’abandu n’omo mibughe y’abamalaika, aliwe isiniri n’olwanzo, niri ng’omukenge owakalira kutsibu kutse esembale* eyikaleta efuyo.
2 Nanganabya n’obutoki bw’eribugha obuminyereri, n’eryowa esyokumbo* syosi esikalua oko Mungu, n’eriminya ebyosi ebyangaminywa, n’eribya n’obwikirirya obwangahumisya ebitwa, aliwe nititabya n’olwanzo, iniri bule.
3 Kandi nanganahitya ebindu byaghe byosi busana n’erilisya abandi, kutse inayipipa busana n’eriherera omubiri waghe, aliwe namabya isiniri n’olwanzo, isinendibana kindu.
4 Olwanzo lukahanda omutima, kandi ni lubuya. Olwanzo silulibya n’eritsuro; siluliyipipa; siluliyiheka.
5 Olwanzo silulikola emyatsi eyikita esisoni; silulirondaya endundi yalo nyisa; silulihitana luba-luba; silulibika ekinigha.
6 Olwanzo silulitsemera emyatsi mibi, aliwe lukatsemera emyatsi y’ekwenene.
7 Olwanzo siluliluha; lukikiriraya emyatsi yosi; siluliheraya amaha; lukayiyinaya omo byosi.
8 Olwanzo silwendisyahwa. Obutoki bw’eribugha obuminyereri, obutoki bw’eribugha omo yindi mibughe, bukendisyahwa. Obutoki bw’eriminya emyatsi eyo bandi batasi bukendisyahwa.
9 Lino twasi emyatsi mike, kandi sitwasi amaminyereri wosi.
10 Aliwe, omughulu tukendisyaminya emyatsi yosi, n’eriminya amaminyereri wosi, neryo emyatsi mike eyo twasi, n’amaminyereri make agho twasi, bikendisyahwa.
11 Omughulu nabya mwana, ingabugha ng’omwana, ingalengekanaya ng’omwana, n’erisoha emyatsi ng’omwana. Aliwe lino, kundi nabirikula, nabirileka emibere ey’obwana.
12 Kusangwa lino situlilangira ndeke-ndeke ng’omundu oyukayileberaya omo kiyo ky’ekyuma. Aliwe, hane ekiro tukendisyalangira ndeke ng’omughulu ukalangira omundu busu kwa busu. Lino niasi myatsi mike, aliwe hakendisyabya ekiro inaminya emyatsi yosi, ngoko oMungu asi emyatsi yosi okw’ingye.
13 Neryo emyatsi isatu eyi yo yikisiya: Obwikirirya, amaha, n’olwanzo. Aliwe, ekikulu omo byosi ebyo lw’olwanzo.
