Ebaruha y’erimbere oko Abanya Korinto 2:1-16
2 Neryo baghala betu, omughulu nasa erisyababwira ekumbo* nyibuyirire y’oMungu, munitasa n’ebinywa by’eriswekya kutse erisondya eribakangania nga niwite amenge mangyi.
2 Munayisogha niti sinendibabwira oko ghundi mwatsi wosi-wosi. Aliwe munayisogha niti ngendibabwira oko myatsi eyilebirye Kristo Yesu misa, n’oluholo lwiwe oko muti.
3 Omughulu nasyabalolako, sinabya n’akaghala. Kandi nabya ngatitimana busana n’obuba.
4 Omughulu nabya ngahubiria, sinabya ngakolesya ebinywa by’erisondya eribalighisya omwatsi, ebinywa ebikabya nga ni by’amenge. Aliwe, nabya ngabugha ebinywa ebikakanganaya amaka w’ekirimu ky’oMungu.
5 Nabya ngakola nitya mutoke erikirirya amaka w’oMungu, butsira amenge w’abandu.
6 Aliwe, tukakanaya oko myatsi y’amenge omughulu tuli n’abandu abakulire. Amenge ayo si w’amenge w’ekihugho kino,* kutse w’abatabali bakyo, abakendisyalusibwaho.
7 Tukakanaya oko menge w’oMungu awali omo ekumbo* nyibuyirire, amenge awabiseme. OMungu ateghekanaya ekumbo eyo yo kera tutoke eribana olukengerwa.
8 Sihali n’omutabali n’omughuma w’ekihugho kino* oyo waminya amenge ayo. Ngabaliminya amenge ayo, sibangitire Omukama wetu w’olukengerwa.
9 Kyo kikaleka Amasako iniabugha ati: “Sihali omundu n’omughuma oyo walangira n’oyo wowa. Kandi sihali n’omundu n’omughuma oyo walengekanaya oko ebyo oMungu abya iniabiriteghekanirya abamwanzire.”
10 Aliwe, oMungu abiritukangania emyatsi eyo erilabira ekirimu kiwe. Ekirimu ky’oMungu kikabisula* emyatsi yosi, nibya n’emyatsi milito y’oMungu.
11 Omundu anganaminya ebiri omo mutima w’oghundi? Omundu akaminya ebiri omo mutima wiwe bisa. Kutya, sihali oyo wabiriminya amalengekania w’oMungu. Ekirimu ky’oMungu kisa kyo kyangawatikya omundu eriminyagho.
12 Mututahabwa ekirimu ky’ekihugho. Aliwe, mutwahabwa ekirimu ky’oMungu. Ekyo kikatuwatikaya eryowa emyatsi eyo oMungu abiritukangirirya.
13 Tukakanaya n’oko myatsi eyo. Aliwe situlikolesaya ebinywa by’amenge w’abandu. Tukakolesaya ebinywa ebyo twakangiriribawa n’ekirimu, tutoke erikangirirya ekwenene y’oMungu.
14 Aliwe, omundu w’ekinya-mubiri* syaliligha emyatsi eyo ekirimu ky’oMungu kikabisula. Akalengekanaya ati emyatsi eyo ni bukiru. Syangowayo kundi ekirimu ky’oMungu kyo kikawatikaya omundu eryowayo.
15 Aliwe, omundu w’obunya-kirimu* akowa emyatsi yosi. Nikwa sihali oyo wangamutswera.
16 Kyo kikaleka Amasako iniabugha ati: “Nindi yo wabiriminya amalengekania wa Yehova* atoke erimukangirirya?” Aliwe, itwe twasi amalengekania wa Kristo.
Amaelezo awehikwa
^ Kutse “esiri.”
^ Kutse “w’omughulu ono.” Ulebaye amaana w’ebinywa.
^ Kutse “esiri.”
^ Kutse “w’omughulu ono.” Ulebaye amaana w’ebinywa.
^ Kinywa kwa kinywa, “kikasonda-sondaya.”
^ Kutse “oyukasondolawa n’amalengekania w’abandu.”
^ Kutse “oyukasondolawa n’ekirimu.”
^ Ulebaye endomeko A5.
