Ebaruha y’erimbere oko Abanya Korinto 3:1-23
3 Baghala betu, sinangakanirye nenyu ngoko omundu akakanaya n’abandu b’obunya-kirimu.* Munakania nenyu ngoko omundu akakanaya n’abandu b’ekinya-mubiri,* ngoko omundu akakanaya n’abakine bana omo bwikirirya bw’Ekikristo.
2 Ebyo nabakangiriraya byabya nga maziwa. Sibyabya ng’ebyalya ebikala-kalire. Mwabya isimwangatoka erirya ebyalya ebikala-kalire. Nikwa na lino, simwangatoka.
3 Mukinakwama amalengekania w’abandu. Omo kati-kati kenyu muli eritsuro n’amalwa. Ekyo kikakanganaya ngoko munemuyiwata ng’abandu b’omo kihugho kino.
4 Omughulu omughuma akabugha ati, “Ngakwama Paulo,” n’oghundi ati, “Ngakwama Apolo,” aho isimwatayiwata ng’abandu b’ekihugho kino kwe?
5 Apolo nindi kwe? Na Paulo nindi? Tuli baghombe ababawatikaya erikirirya. Ekyo kisa. Mutwakola ekyo Omukama atusaba erikola kisa.
6 Munahera embuto. Apolo amuta kuyo kw’amaghetse. Aliwe oMungu yo walasayayo.
7 Oyukahera embuto n’oyukuta kuyo kw’amaghetse si kindu. Aliwe oMungu oyukalasayayo.
8 Oyukahera embuto n’oyukuta kuyo kw’amaghetse bakakola omo bughuma. Aliwe, obuli mundu akendisyahembwa busana n’omubiiri wiwe.
9 Tukakola haghuma n’oMungu. Muli ng’eririma eryo oMungu akalima, kandi ng’enyumba eyo oMungu akahimba.
10 Ininemukolesya ekihembo ekyo oMungu aniha, munahira efondasyo ng’omuhimbi oyo wasi erihimba ndeke. Lino oghundi mundu anemuhimba oko fondasyo eyo. Aliwe obuli mundu ritolere inialebya ngoko akahimba oko fondasyo eyo.
11 OMungu abiriyira Yesu Kristo mo fondasyo. Neryo sihali oyo wangahiraho eyindi fondasyo.
12 Omundu mulebe anganahimba oko fondasyo eyo omo horo, efeza,* amabwe w’obughuli, emiti, ebiti ebyumire, kutse obunyatsi.
13 Aliwe oko nduli, omubiiri w’obuli mundu akendisyalangirika ng’ali ati kundi ekiro ekyo kikendisyakangania ng’ali ati. Omubiiri w’obuli mundu akendisyalaba omo muliro, n’omuliro akendisyakangania omubiiri ogho obuli mundu akola ng’ali ati.
14 Ekyo omundu akahimba oko fondasyo eyo kyamatendiaka, iniakendisyahembwa.
15 Aliwe, ekyo omundu akahimba kyamabisyaka omo muliro, iniamabiherya. Anganasyasabuka, aliwe iniakendisyabya ng’oyukabala oko muliro.
16 Simwasi ngoko muli hekalu y’oMungu, kandi ngoko ekirimu ky’oMungu kiri emwisi syenyu?
17 Omundu amatsandya ehekalu y’oMungu, oMungu iniakendisyamutoghotya. Ehekalu y’oMungu yibuyirire. Kandi ehekalu eyo, n’inywe.
18 Isimwayiteba! Obuli mundu oyukalengekanaya ati ali n’amenge omo kihugho kino,* ritolere iniabya mukiru. Aho imw’akendibya n’amenge.
19 Amenge w’ekihugho kino ni bukiru oko Mungu. Kyo kikaleka Amasako iniabugha ati: “Akahamba ab’amenge omo mayele wabo-wabo.”
20 Kandi Amasako akabugha ati: “Yehova* anasi ngoko amalengekania w’abandu b’amenge ni bule.”
21 Neryo omw’inywe simubye omundu n’omughuma oyukayihalamba busana n’ebyo bandu banganakola kundi ebyosi ni byenyu.
22 Paulo, Apolo, Kefa,* ekihugho, engebe, oluholo, ebindu bya lino, kutse ebindu ebikendisyasa, ebyosi ni byenyu.
23 Nenyu muli bandu ba Kristo, na Kristo ni w’oMungu.
Amaelezo awehikwa
^ Kutse “abakasondolawa n’ekirimu.”
^ Kutse “abakasondolawa n’amalengekania w’abandu.”
^ Ni kindu ky’obughuli ekikalua omo kitaka.
^ Kutse “omughulu ono.” Ulebaye amaana w’ebinywa.
^ Ulebaye endomeko A5.
^ Kandi akahulawamo Petro.
