Ebaruha y’erimbere oko Abanya Korinto 5:1-13
5 Ninemwowa ambu oburaghane* buli omo kati-kati kenyu. Kandi ni buraghane obukalire, obo tutetwatowa nibya n’oko bandu abatikirirye. Mubambwira ambu hane omulume oyo wikere n’omukali wa baba wiwe.
2 Ekyo kikabanzisaya? Simwasi ngoko ritolere ikyabita obulighe, neryo omundu oyukakola ekyo atoke erilusibwa omo kati-kati kenyu?
3 Nomo nangabya isiniri haghuma nenyu kibiri-biri, ngabya ininemubalengekaniako.* Nomo nite haghuma nenyu, nabiritswera omundu oyulyakola omwatsi oyo.
4 Omughulu mukahindana haghuma omo rina ry’Omukama wetu Yesu, muminye ngoko ngabya inine haghuma nenyu omo kirimu, n’obutoki bw’Omukama wetu Yesu nabo bukabya ibune haghuma nenyu.
5 Ritolere omundu oyo imwamulekera Sitani mutoke erilusya omwatsi mubi owalyaleta omo ndeko. Neryo endeko iyikendibya iyine n’emibere mibuya omo kiro ky’Omukama.
6 Si kyuwene eritsemera omwatsi oyo. Simwasi ngoko erilolo rike riri ng’elevire* eyikayitsatsanga omo farine yosi?
7 Mulusaye elevire* ya kera mutoke eribya efarine nyihya-nyihya, eyitemo levire. Ritolere isimwabyamo levire kundi Kristo ekyana kyetu ky’embuli ky’Epasaka abirihererwa.
8 Neryo ritolere itwibuka ekiro kikulu ky’Epasaka omo mukati owatemo levire,* n’ibughambu omo byuwene, n’eby’ekwenene, butsira omo mukati owalimo elevire ya kera, n’ibughambu omo rilolo, n’ebituwene.
9 Omo baruha yaghe, munabahandikira niti muleke erikola obwira n’abandu abakakola oburaghane.*
10 Sinabyangakania oko bandu b’ekihugho kino, abakakola oburaghane,* ab’omururu, abakanyegha ebindu by’abene, kutse abakaramaya esyosanamu. Byangabere bitya, ekyo kyangabasabire erilua omo kihugho.
11 Aliwe lino, ngabahandikira niti muleke erikola obwira n’omundu wosi-wosi oyo wasibwemo mughala wetu oyukakola oburaghane,* ow’omururu, oyukaramaya esyosanamu, oyukatsamba abandi, omutamiri, kutse oyukanyegha ebindu by’abene. Nibya isimwalya n’omundu oyuling’oyo.
12 Eritswera abali ehihya w’endeko, oyo si mubiiri waghe. Aliwe, simulangire ngoko ritolere imwatswera abali omo ndeko,
13 neryo oMungu naye iniatswera abali ehihya w’endeko? Mulusaye omundu mubi omo kati-kati kenyu.
Amaelezo awehikwa
^ Omo Kigiriki ni por·nei′a. Ulebaye amaana w’ebinywa.
^ Kutse “inine haghuma nenyu omo kirimu.”
^ Kutse “ekihamya.”
^ Kutse “ekihamya.”
^ Kutse “ekihamya.”
^ Ulebaye amaana w’ebinywa, “Oburaghane.”
^ Ulebaye amaana w’ebinywa, “Oburaghane.”
^ Ulebaye amaana w’ebinywa, “Oburaghane.”
