Ebaruha y’erimbere oko Abanya Korinto 6:1-20
6 Hamabya eritendihulikirirana omo kati-kati kaghu n’omulikyenyu, wanganamutwala oko tribinali ey’abatikirirye? Busanaki ighutamutwala embere syababuyirire b’omo ndeko?
2 Munasi ndeke-ndeke ngoko ababuyirire bakendisyatswera ekihugho. Mwamabya imukendisyatswera ekihugho, mwanganataluka erisoha emyatsi mike-mike?
3 Simwasi ngoko tukendisyatswera abamalaika? Neryo busanaki simwangasoha esyombanza ngengenge esikabahikira lino?
4 Mwamabya n’esyombanza esyo mwanzire muti sisohawe, busanaki mukatwalasyo oko batsweri abate b’omo ndeko?
5 Ngabugha nitya busana n’eribahemula. N’ibughambu omo kati-kati kenyu simuli n’omundu n’omughuma w’amenge oyo wangatoka eritswera abalikyabo?
6 Omo mwanya w’erikola ekyo, omughala wetu akatwala oghundi mughala wabo y’oko tribinali, n’erimusitaka embere sy’abatikirirye.
7 Oko kwenene, mwabiritaluka mwamabya imukatwalana oko tribinali. Busanaki simwangaligha bakabakosera n’eribiba?
8 Aliwe, mukakola muhanda, kandi muk’iba abalikyenyu.
9 Simwasi ngoko abakakola ebituwene sibendisyingira omo Bwami bw’oMungu? Omundu isyabateba. Abandu abakakola oburaghane,* abakaramaya esyosanamu, abakakola obusingiri, abalume abakaligha abandi balume erighotsera n’abo, n’abakali abakaligha abandi bakali erighotsera n’abo, abalume abakaghotsera n’abandi balume, n’abakali abakaghotsera n’abandi bakali,
10 abibi, ab’omururu, abatamiri, abakatsamba abandi, n’abakanyegha ebindu by’abene, sibendisyingira omo Bwami bw’oMungu.
11 Abaghuma b’okw’inywe babya n’emibere eyo. Aliwe lino, mwabiryeribwa, mwabiriyirwamo babuyirire, mwabirighanzwamo batunganene omo rina ry’Omukama Yesu Kristo, n’ekirimu ky’oMungu wetu.
12 Niri n’obwiranda bw’erikola* emyatsi yosi. Aliwe, emyatsi yosi si y’endundi. Niri n’obwiranda bw’erikola emyatsi yosi. Aliwe, sinangaligha omwatsi wosi-wosi akanitabala.
13 Akalyo ni k’enda, n’enda yiriho busana n’akalyo. Aliwe, oMungu akendisyabughaho ebindu bibiri ebyo. Omubiri mwatahangyikwa busana n’erikola oburaghane.* Ahangyikawa busana n’erikola omubiiri w’Omukama. N’Omukama akaha omubiri ebyo alaghireko.
14 Aliwe, oMungu mwalubukya Omukama. Kandi erilabira obutoki bwiwe, netu akendisyatulubukya.
15 Simwasi ngoko emibiri yenyu ni ya Kristo? Neryo mwamalangira ikyanamatolera erimya ekindu kya Kristo n’erikolesyakyo omo buraghane? Iyehe!
16 Simwasi ngoko omundu amaghotsera n’omumbalaka iniamabya mubiri mughuma naye? Kundi oMungu akabugha ati: “Ababiri bakendisyabya mubiri mughuma.”
17 Aliwe, obuli mundu oyumatanibwe n’Omukama ali omo bughuma naye omo kirimu.
18 Musaghe oburaghane.* Awandi malolo agho omundu akakola akabya ehihya w’omubiri wiwe. Aliwe, obuli mundu oyukakola oburaghane akahalaya oko mubiri wiwe iyuwene-wene.
19 Simwasi ngoko omubiri wenyu ni hekalu y’ekirimu kibuyirire ekiri emwisi syenyu? N’ekirimu ekyo kikalua oko Mungu. Inywe simuli benyu.
20 OMungu mwabaghula omo kindu ky’obughuli bunene. Neryo mukolesaye emibiri yenyu erimuha olukengerwa.
Amaelezo awehikwa
^ Ulebaye amaana w’ebinywa, “Oburaghane.”
^ Kutse “Ninahamulirwe erikola.”
^ Omo Kigiriki ni por·nei′a. Ulebaye amaana w’ebinywa.
^ Omo Kigiriki ni por·nei′a. Ulebaye amaana w’ebinywa.
