Ebaruha y’erimbere oko Abanya Korinto 7:1-40
7 Hano ngasubiraya oko myatsi eyo mwahandika. Kyuwene oko mulume eritenditahya n’eritendighotsera n’omukali.
2 Aliwe, kundi oburaghane* bwabirikanyirira, obuli mulume abye n’omukali wiwe, n’obuli mukali abye n’omulume wiwe.
3 Omulume ahe omukali wiwe ekyo asingeneko, n’omukali ahe omulume wiwe ekyo asingeneko.
4 Omukali syawite obutoki oko mubiri wiwe, aliwe omulume wiwe y’uwitebo. N’omulume naye syawite obutoki oko mubiri wiwe, aliwe omukali wiwe y’uwitebo.
5 Isihabya oyukima oghundi ekyo asingeneko mwamabya isimwetalighirana erikola mutya omo mughulu mulebe. Ekyo ikikendibawatikya eribya n’endambi nene y’erisaba. Enyuma sy’aho, ritolere imwatasyaghotsera haghuma Sitani akasyabalengako busana n’eritendiyikakirya ryenyu.
6 Ngabugha ebyosi ebyo mutoke eriminya ekyo muhamulirwe erikola. Aliwe si kyalayiro.
7 Nangananza niti abalume bosi babye basimbi ng’angye. Aliwe, obuli mundu awite ekihembo ekyo oMungu amuha. Itwe bosi tukamukolera omo nzira mbiriri-mbiriri.
8 Ekyo ngabwira abatalungire n’abakwirwa kya kino: Kyuwene kundu bamasighala ngoko niri.
9 Bamatenditoka eriyikakirya, ibalunga. Kyuwene erilunga kulenga eritaluka erikakirya esyongumbu syabo.
10 Ngaha abalungire b’amahano aya: Omukali syatolere erileka omulume wiwe. Erihano eryo rikalua oko Mukama.
11 Aliwe amamuleka, ngambe isyalunga n’oghundi mulume, kutse iniahulikirirana n’omulume wiwe. Omulume naye syatolere erileka omukali wiwe.
12 Aliwe, ebinywa ebi ngabwirabyo abandi (n’ingye ngabugha, butsira Omukama): Omughala wetu amabya n’omukali oyutikirirye, n’omukali oyo inialigha eribya haghuma naye, mughala wetu oyo syatolere erimuleka.
13 N’omukali amabya n’omulume oyutikirirye, n’omulume oyo inialigha eribya haghuma naye, omukali oyo syatolere erileka omulume wiwe.
14 Kusangwa endwa y’omulume oyutikirirye yikalangirawamo nyibuyirire busana n’omukali wiwe. N’endwa y’omukali oyutikirirye yikalangirawamo nyibuyirire busana n’omughala wetu. Bite bitya, abana benyu sibangabya babuyirire. Nikwa lino ni babuyirire.
15 Aliwe, oyutikirirye amasombola erilekana n’omulume kutse omukali wiwe, imwamuleka. Byamabya bitya, omughala kutse omwali wetu syasabirwe erisighala haghuma n’oyutikirirye. OMungu mwababirikira inywe mutoke eribya omo buholo.
16 Iwe mukali, siwasi ngoko wanganasabula omulume waghu? Kutse iwe mulume, siwasi ngoko wanganasabula omukali waghu?
17 Nomo bine bitya, obuli mundu syaleke eribya ngoko abya omughulu Yehova* amubirikira. Ayo w’amahano agho ngaha esyondeko syosi.
18 Omundu amabya iniabirikirawa iniabiribanibwa, isyasonda eribya ngoko abya isyalyabanibwa. Omundu amabya iniabirikirawa isyalyabanibwa, syasabirwe eribanibwa.
19 Eribanibwa kutse eritendibanibwa si ky’ekindu ky’omughaso. Aliwe, eky’omughaso ry’erikenga ebyalayiro by’oMungu.
20 Ritolere obuli mundu iniasighala ngoko abya omughulu oMungu amubirikira.
21 Wamabya iwabya mukobe omughulu wabirikirawa, ekyo isikyaleka iwahangya-hangya. Aliwe, wamasunga akanya k’eribya omo bwiranda, isiwalabayako.
22 Oyo wabya mukobe omughulu Omukama amubirikira, akabya mughombe w’Omukama oyuli bwiranda. N’oyo wabya bwiranda omughulu Omukama amubirikira, akabya mukobe wa Kristo.
23 Mumwaghulwa omo kindu ky’obughuli. Simubye bakobe b’abandu.
24 Baghala betu, ritolere obuli mundu iniasighala ngoko abya omughulu oMungu amubirikira.
25 Oko batalungire, siniwite ekyalayiro ekikalua oko Mukama. Aliwe, ngendibabwira amalengekania waghe kundi niri mundu mutaleghula oyo Mukama abirighanyira.
26 Omo biro bino ebikalire, ngalengekanaya niti kyuwene kutsibu oko mundu erisighala ngoko ali.
27 Unawite omukali? Isiwasonda erimuleka. Sighuwite omukali? Uleke erimuronda.
28 Aliwe, wamabilunga isighutakola erilolo. N’omundu oyutalungire amalunga, naye isyatakola erilolo. Aliwe, abakalunga bakendisyabya n’amaligho omo ngebe yabo. Neryo ngasonda eribawatikya isimwahikirawa n’amaligho ayo.
29 Baghala betu, ano w’amalengekania waghe: Endambi eyikisiyaho ni nge. Neryo eritsuka lino, abawite abakali babye ng’abatawitebo.
30 Abakalira babye ng’abatelira. Abakatsema babye ng’abatetsema. Abakaghula babye ng’abatawite kindu.
31 N’abakakolesaya ebindu by’ekihugho isibalw’ibakolesyabyo luholo-holo, kundi emyatsi eyikalaba omo kihugho yinemubinduka.
32 Sinanzire mukahangya-hangya. Oyutalungire akatsomana omubiiri w’Omukama, kandi ngoko angamutsemesya.
33 Aliwe, oyulungire akatsomana emyatsi y’ekihugho, kandi ngoko angatsemesya omukali wiwe.
34 Neryo akabya n’amalengekania awaghabene. Kutya, omukali oyutalungire kutse oyutewatalunga akatsomana omubiiri w’Omukama. Ekyo kikaleka omubiri n’amalengekania wiwe, ebyosi ibyabya bibuyirire. Aliwe, omukali oyulungire akatsomana emyatsi y’ekihugho, kandi ngoko angatsemesya omulume wiwe.
35 Ngabugha nitya busana n’endundi yenyu. Sindibugha nitya busana n’eribategha. Nanzire imwakola ebitolere mutoke erikolera Omukama omughulu wosi butsir’ilengemerwa.
36 Omundu amabya iniabirikula n’eribya n’obwenge, neryo inialangira ngoko eritendilunga rikaleka iniayighendya muhanda,* aho akole ekyo anzire erikola. Syatakola erilolo, muleke alunge.
37 Aliwe, omundu amabya inikirirye ndeke-ndeke omo mutima wiwe ngoko si ky’omughaso okw’iye erilunga,* kandi amabya inianemutoka erikakirya esyongumbu siwe, kandi amabya iniabiriyisogha omo mutima wiwe ati syendisyalunga, akakola ndeke.
38 Neryo oyukalunga akayira ndeke. Aliwe, oyukasighala atya akayira ndeke kutsibu.
39 Omukali oyulungire syatolere eriluamo omulume wiwe amabya iniakineho. Nikwa, omulume wiwe amabihola, anganalunga n’omundu wosi-wosi oyo anzire, aliwe alunge n’omundu oyukakolera Omukama musa.
40 Nikwa ingye ngoko ngalangira, omundu oyo atsemire kutsibu amasighala atya. Kandi nikirirye ndeke-ndeke ngoko naghe niriko ekirimu ky’oMungu.
Amaelezo awehikwa
^ Obungyi bw’ekinywa ky’Ekigiriki por·nei′a. Ulebaye amaana w’ebinywa.
^ Ulebaye endomeko A5.
^ Kutse “iniatsandya obubikira bwiwe.”
^ Kutse “inianzire erisighala n’obubikira bwiwe.”
