Ebaruha y’erimbere oko Abanya Tesalonika 3:1-13
3 Neryo kundi twabya isitwangatoka erilindirira omo biro binene, mutwalangira ikyuwene erisighala itw’ibene e Atene,
2 n’eribatumira Timoteo, mughala wetu, kandi omughombe w’oMungu* busana n’engulu mbuya eyilebirye Kristo, atoke eribasikya mutima n’eribakirania, mutoke eribya n’obwikirirya obuwatire.
3 N’ekyo kikendileka omundu n’omughuma w’okw’inywe isyatera* busana n’amaligho, kundi munasi ndeke-ndeke ngoko sitwangabula erihikirwa n’emyatsi eyiri ng’eyo.*
4 Omughulu twabya ewenyu, twabya tubeghere eribabwira ngoko tukendisyaghalibwa. Ngoko munasi, ekyo kyabirituhikira.
5 Neryo kundi nabya isinangatoka erilindirira omo biro binene, munatuma omundu atoke erilebya nga munemuyighendya omo butaleghula, kundi oyukatulengako anganabya iniabiribalengako omo nzira nyilebe, neryo omubiiri munene ogho twakola iniabya bule.
6 Aliwe, Timoteo mwanamahika erilua ewenyu, kandi abiritubwira emyatsi eyuwene eyilebirye obutaleghula bwenyu, n’olwanzo lwenyu. Abiritubwira ati mukinatukwire olukando, kandi ngoko mwanzire kutsibu eritasyatulolako, netu kutya.
7 Busana n’ekyo, baghala betu, omo maligho n’omo bitsibu byetu byosi twabirikiranibwa busana nenyu, kandi busana n’obutaleghula bwenyu.
8 Oko kwenene, twabiritasyabana akaghala,* kundi musikire omo Mukama.
9 Neryo twangakola tuti erisima oMungu busana nenyu, kandi busana n’obutseme bunene obo tuli nabo embere sy’oMungu busana nenyu?
10 Omo kiro n’omwitungyi, tukabya itunemuhatikana oMungu yo kutsibu tutoke eritasyabalolako,* n’eribaha ekyo obwikirirya bwenyu bulaghireko.
11 Tukasaba tuti oMungu na Tata wetu n’Omukama wetu Yesu, batutokesaye eryasa ewenyu.
12 Kandi tukasaba oMungu abawatikaye eryanzana kutsibu, n’eryanza abandu bosi ngoko netu tubanzire,
13 kusudi abawatikaye eribya imunasikire omo mitima, abate n’ekosa kandi babuyirire embere sy’oMungu wetu na Tata, omughulu w’eribyaho ry’Omukama wetu Yesu haghuma n’ababuyirire bosi.
Amaelezo awehikwa
^ Kutse kandi, “oyukakola haghuma netu.”
^ Kinywa kwa kinywa, “isyatsinga-tsinga.”
^ Kutse kandi, “twabirisoherwa erihikirwa n’emyatsi eyi.”
^ Kinywa kwa kinywa, “twabiritasyabyaho.”
^ Kinywa kwa kinywa, “eritasyalola oko busu bwenyu.”
