Ebaruha y’erimbere oko Abanya Tesalonika 4:1-18
4 Oko nduli, baghala betu, ngoko twabakangiriraya ebyo mwangakola mutoke eritsemesya oMungu, kandi ngoko byo munemukola, tukabasaba n’eribalemba-lemba omo rina ry’Omukama Yesu tuti mubye mukakolabyo ndeke-ndeke.
2 Munasi obusondoli* obo twabaha obukalua oko Mukama Yesu.
3 Kundi ebyo oMungu anzire bya bino: Anzire imwabya babuyirire, kandi imwayihighula oko buraghane.*
4 Ritolere obuli mundu iniakakirya esyongumbu sy’omubiri wiwe atoke eribya mubuyirire, kandi atoke eribya n’obusike.
5 Siritolere omundu iniabya n’omururu n’engumbu nene omo myatsi y’engyingo, ng’abandu b’ebihanda abatasi oMungu.
6 Omo myatsi eyo, omundu syalabayeho kateho n’erikolera mulikyabo yo muhanda, kundi Yehova* akendisyaha abandu b’amalipizi busana n’emyatsi yosi eyo, ngoko twabya itwabiribabwira n’eribakunga kutsibu.
7 OMungu mwatatubirikira busana n’erikola emyatsi eyiterire. Aliwe, mwatubirikira busana n’eribya babuyirire.
8 Neryo, omundu oyukaghana amahano aya, akabya isyalighana omundu aliwe iniakaghana oMungu oyukabaha ekirimu kiwe kibuyirire.
9 Aliwe, oko mwatsi w’eryanza abaghala benyu, si bugha ambu kandi tubahandikire, kundi inyw’ibene-bene mwabirikangiriribwa n’oMungu ngoko ritolere imwanzana.
10 Kandi nibya kyo munemukolera abaghala betu bosi abali omo Makedonia yosi. Baghala betu, aliwe ekyo tukabasaba kya kino: Mubye mukakola mutya kwilaba aho.
11 Muyikase eribya omo buholo n’abandi n’eritendiyingirya omo myatsi y’abandi, n’erikola omubiiri ngoko twabahana,
12 kusudi abandu abate b’omo ndeko balangire ngoko munemuyighendya ndeke, kandi kusudi isimwabula kindu.
13 Kandi baghala betu, sitwanzire mukabya butsir’iminya ekikendisyahikira ababirihola,* mukasyabya n’obulighe ng’abandu abatawite amaha.
14 Kundi twamabya itwikirirye ngoko Yesu mwahola n’erilubuka, ni bugha ambu itwikirirye ngoko oMungu akendisyatwala haghuma naye ababirihola* omo bughuma na Yesu.
15 Kundi kino kyo tukababwira erikwamana n’ekinywa kya Yehova,* itwe tukendisyabya itukineho erihika oko mughulu w’eribyaho ry’Omukama, sitwendisyatangirira n’ahake ababirihola.*
16 Kundi Omukama iyuwene-wene akendisyakima erilua elubula n’omulenge owasikire, n’omulenge w’omumalaika mukulu, n’engunga y’oMungu, neryo ababirihola omo bughuma na Kristo bakendisyatsuka erilubuka.
17 N’enyuma sy’aho, itwe tukendisyabya itukineho, tukendisyahindanibwa haghuma nabo, erihekwa omo bitu, n’eriyahindana n’Omukama omo kyanya. Neryo tukendisyabya n’Omukama biro byosi.
18 Neryo, mubye mukasikania mutima omo binywa ebyo.
Amaelezo awehikwa
^ Kutse “ebyalayiro.”
^ Omo Kigiriki ni por·neiʹa. Ulebaye amaana w’ebinywa.
^ Ulebaye endomeko A5.
^ Kinywa kwa kinywa, “abaghotsere omo luholo.”
^ Kinywa kwa kinywa, “abaghotsere omo luholo.”
^ Ulebaye endomeko A5.
^ Kinywa kwa kinywa, “ababirighotsera omo luholo.”
