Ebaruha y’erimbere ya Petro 1:1-25
1 Ebaruha eno ikalua oko Petro, omukwenda wa Yesu Kristo. Ngatumirayo abakalani b’ebiro bike, ababiripanzwa-panzwa omo Pontio, Galatia, Kapadokia, Azia, n’omo Bitinia. Ngabatumirayo inywe mwabirisombolwa
2 erikwamana n’obutoki bw’oMungu Tata bw’eriminya emyatsi isiyiriyakoleka. OMungu abiribayiramo babuyirire erilabira ekirimu kiwe. OMungu mwakola atya mutoke eribya abandu abakowa n’eritsatsangwako omusasi wa Yesu Kristo.
Olukogho n’obuholo bunene bubye haghuma nenyu.
3 OMungu kandi Tata w’Omukama wetu Yesu Kristo apipawe, kundi busana n’obughanyiri bwiwe bunene, abiritubuta buhya-buhya tutoke eribya n’amaha awaliho erilabira erilubuka rya Yesu Kristo,
4 kandi tutoke eribya n’omwandu owate angatsanda, kandi owate angayako omutsafu kutse erihonga. OMungu abiribabikira omwandu oyo elubula,
5 inywe abandu abo oMungu anemuteya omo butoki bwiwe kundi muli n’obwikirirya. OMungu anemubateya busana n’omulamo owakisiya iniakanganibwa omo mughulu w’enduli.
6 Busana n’ekyo, munemutsema kutsibu nomo kinatolere imwalola oko maligho mbiriri-mbiriri omo katambi kake.
7 Ebyo binemubahikira kusudi obwikirirya bwenyu obwabirilengwako, obo bughuli bunene kulenga ehoro eyikatsanda nomo yangabya iyabirilaba* omo muliro, butoke erileka imwapipwa, erihabwa olukengerwa, n’erisikibwa omughulu w’eribisulirwa rya Yesu Kristo.
8 Mumwanzire nomo mutemwatamulolako. Nomo simumulangire lino, mumwikirirye, kandi muli n’obutseme bunene obo tutetwangatoka erikaniako, kandi obutseme obo ni bungyi,
9 kundi mukendisyabana ekikaleka imwikirirya, ni bugha ambu, erisabulwa.
10 Oko mwatsi w’erisabuka eryo, abaminyereri ababya bakabugha obuminyereri oko lukogho olo Mungu angabakanganirye, mubakwesa-kwesa emyatsi n’erisondyayo ndeke-ndeke.
11 Ekirimu ekyabya emwisi syabo mukyabakangania emyatsi eyilebirye Kristo. Babya bakasonda eriminya endambi n’omughulu ogho emyatsi eyo yangabererereko, kundi ekirimu ekyo kyabya ikyabirikangania embere amaligho agho Kristo angalabiremo, n’olukengerwa olwangabere enyuma sy’aho.
12 OMungu mwababisulira ngoko sibabya bakabugha amaminyereri busana nabo. Aliwe, babya bakabughagho busana nenyu. Lino mwabiribisulirwa emyatsi eyo erilabira abandu abaminyisaya engulu mbuya. Ekirimu kibuyirire ekyalua elubula kyo kyawatikaya ababaminyisaya engulu mbuya. Abamalaika banzire kutsibu eriminya emyatsi eno.
13 Neryo muteghekanaye obwenge bwenyu busana n’omubiiri. Muteghaye ndeke obwenge bwenyu, mubye n’amaha omo lukogho olo mukendisyakanganibwa omughulu w’eribisulirwa rya Yesu Kristo.
14 Muli bana b’oMungu abakamwowa, neryo muleke erikwama esyongumbu esyo mwabya mukakwama omughulu mwabya isimulimwamuminya.
15 Aliwe, mubye babuyirire omo mibere yenyu yosi ng’Omubuyirire oyo wababirikira,
16 kundi Amasako akabugha ati: “Ritolere imwabya babuyirire ngoko naghe niri mubuyirire.”
17 Kandi mwamabisaba Tata oyukatswera butsira akasololo, aliwe oyukatswera obuli mundu erikwamana n’ebyo akakola, mubye mukakola ebikakanganaya ngoko mukasagha oMungu omughulu mukine bakalani b’ebiro bike.
18 Munasi ngoko mwabirilusibwa omo maisa matya-matya ogho botata-kulu wenyu babingirayamo, aliwe mumutalusibwa* mugho omo bindu ebikatsanda, omo feza,* kutse omo horo.
19 Aliwe mumwalusibwa mugho omo musasi w’obughuli bunene owali ng’ow’ekyana ky’embuli ekiteko bulema n’ebitingu by’omutsafu, ni bugha ambu, omusasi wa Kristo.
20 Oko kwenene, abya iniabirisombolwa embere efondasyo y’ekihugho yihiraweho, aliwe mwakanganibwa oko nduli y’emighulu busana nenyu.
21 Busana naye mwabirikirirya oMungu, oyo wamulubukaya, n’erimuha olukengerwa kusudi obwikirirya n’amaha wenyu bibye omo Mungu.
22 Neryo kundi mwabiryeribwa busana n’erikwama ekwenene, n’ekyo kyabirileka imwabya n’olwanzo lw’ekwenene ng’abasubeneko, mwanzane kutsibu erilua oko mutima.
23 Kundi mwabiributwa buhya-buhya, mumutabutwa n’embuto eyikatsanda, aliwe mumwabutwa n’embuto eyitetsanda,* erilabira ekinywa ky’oMungu oyuliho, n’oyukendisyabya inianeho kera na kera.
24 Kundi “abandu bosi bali ng’ebiti. Olukengerwa lwabo luli ng’eriwa ry’omwirima. Ebiti bikahonga, n’eriwa iryatoghera ahisi,
25 aliwe ekinywa kya Yehova* kikabyaho kera na kera.” “Ekinywa” ekyo y’engulu mbuya eyatulaghanibawa okw’inywe.
Amaelezo awehikwa
^ Kutse “iyabirilengwako, iyabiryeribwa.”
^ Kutse “mumutahanulirwa, mumutakombolwa, mumutaboholwa.”
^ Ni kindu ky’obughuli ekikalua omo kitaka.
^ Ni bugha ambu, embuto eyikahetaya amatunda.
^ Ulebaye endomeko A5.
