Ebaruha y’erimbere ya Petro 2:1-25
2 Neryo muleke obubi bosi-bosi, amabehi, obulimba-limba,* eriyitsutsa ebindu bya bene, n’olutongo losi-losi,
2 Ngoko esyomekeke sikanza kutsibu amabere, nenyu mwanze kutsibu ekinywa ky’oMungu, ekiri ng’amabere awatatswangene n’ekindu, kitoke eribawatikya erikula n’erisabulwa.
3 Aliwe, mukendikola mutya, mwamatsuka eriyilangirira* ngoko Omukama uwene.
4 Omughulu mukaseghera hakuhi naye, ni bugha ambu, hakuhi n’eribwe eririho eryo abandu baghana aliwe eryasombolawa, ery’obughuli oko Mungu,
5 nenyu muli ng’amabwe awaliho. Munemukolesibwa erihimba enyumba y’obunya-kirimu, mutoke eribya bahereri babuyirire, kusudi erilabira Yesu Kristo mutoke eriherera amahere w’obunya-kirimu, awakatsemesaya oMungu.
6 Kundi Amasako akabugha ati: “Ngahira e Sioni y’eribwe eryasombolawa, eribwe ry’oko ngonde,* kandi ery’obughuli. Oyukendisyikiriryaryo syendisyahemuka.”
7 Aliwe, n’inywe mukamulangiramo w’obughuli kundi mwikirirye. Nikwa oko batikirirye, “eribwe eryo abahimbi baghana ryo ryabiribya eribwe rikulu ry’oko ngonde.”*
8 Kandi “ni ribwe erikatwikalaya, kandi ng’eribwe rikulu erikaleka abandu ibahitana.”* Bakatwikala kundi sibalisikaya ekinywa ekyangahikire oko bandu abo.
9 Aliwe, inywe muli bandu ababirisombolwa, abahereri n’abami, ekihanda kibuyirire, abandu abo oMungu abirisombola batoke eribya buteke bwiwe, kusudi mutulaghanaye emibere mibuya y’oyo wababirikira erilua omo mwirima n’eribaleta omo kyakakala kiwe ekikangabasenie.
10 Kundi kera simwabya kihanda, aliwe lino muli kihanda ky’oMungu. Kera mumutaghanyirwa, aliwe lino mwabirighanyirwa.
11 Banzwa baghe, ngabasaba inywe muli bagheni n’abakalani b’ebiro bike niti isimwakwama esyongumbu sy’omubiri esikalwa nenyu.*
12 Mubye n’emibere eyuwene omo kati-kati k’abandu, kusudi omughulu bakabugha ambu muli bandu babi, ibayilangirira ebibuya ebyo mukakola, neryo ibapipa oMungu omo kiro kiwe ky’erilebya emyatsi.
13 Busana n’Omukama, musikaye ekindu kyosi ekikahirawaho n’abandu. Musikaye omwami kundi ni mukulu okw’inywe.
14 Kandi musikaye abaguvernere kundi bakatumawa n’omwami busana n’eriha amalipizi abakola-nabi, n’erisima abakakola ebyuwene.
15 Kundi oMungu anzire imwakola ebibuya mutoke erikinga obuno bw’abakiru, abakabugha ebyo batasi.
16 Mubye ng’abandu abali bwiranda. Isimwayihambulisanaya omo bwiranda bwenyu erikola* ebibi. Aliwe, mukolesaye obwiranda bwenyu ng’abakobe b’oMungu.
17 Musikaye abandu bosi, mwanze ekihanda kyetu kyosi ky’abaghala, musaghe oMungu, musikaye omwami.
18 Abaghombe basikaye abakama babo n’eribakenga kutsibu. Sibakolere batya abakama abuwene n’abali n’amalengekania awuwene basa, aliwe bakolere batya n’abakama abakalire.
19 Kyuwene omughulu omundu akayiyinaya omo maligho n’eryaghalwa isyetakola kibi kundi anzire eribya n’obunya-mutima* obuwene embere sy’oMungu.
20 Kundi mwamabihunzwa busana n’erikola erilolo, neryo imwayiyinia, imukendibana endundi yahi? Aliwe, mwamabiyiyinia omo maligho busana n’erikola ebyuwene, ekyo kikatsemesaya oMungu.
21 Oko kwenene, mwabirikirawa busana n’ekyo, kundi Kristo naye mwaghalwa busana nenyu. Neryo mwabasighira eky’erileberyako mutoke erikwama ndeke-ndeke olughobe lwiwe.
22 Mwatakola erilolo, n’amabehi mwatasungika omo buno bwiwe.
23 Omughulu babya bakamutsamba,* iye mwatabya akatsambabo.* Omughulu abya akaghalwa, mwatabya akasaghisyabo. Aliwe, mwabya akayihira omo byala by’oyukatswera omo ritunganene.
24 Iyuwene-wene mwaheka amalolo wetu omo mubiri wiwe oko muti, tutoke erisabulwa omo malolo* n’eribyaho busana n’erikola ebitunganene. Kandi “ebironda biwe byabirileka imwalama.”
25 Kundi mwabya ng’esyombuli esiherire. Aliwe lino, mwabirisuba oko mulisya wenyu, oyukateghaya engebe* yenyu.
Amaelezo awehikwa
^ Kutse “obunafiki.”
^ Kutse “erighonza.”
^ Kutse “sonda, coin.”
^ Kinywa kwa kinywa, “omutwe w’engonde.” Kutse “sonda, coin.”
^ Kutse “olutendere olukaleka abandu ibahitana.”
^ Kutse “n’enafsi yenyu.”
^ Kutse “Isimwayira obwiranda bwenyu mo kindu ky’eriswika.”
^ Kutse “ezamiri.”
^ Kutse “bakamubughako muhanda.”
^ Kutse “akababughako muhanda.”
^ Kutse “erilekana n’amalolo.”
^ Kutse “esyonafsi.”
